قبل لا أدخل في الموضوع، أطالب بحماية مقالتي هذي من اللطش غير المشروع، وأحذر بقوة من سرقة أفكاري الأدبية والعلمية والفلسفية والنفسية، من قبل بعض اللي يدعون انهم يعطون دورات وورش للناس عشان تخفيض ضغوطهم من العمل والبيت، وأنا اليوم أضيف علما جديدا مبتكرا ما سبقني له أحد، يعالج ما نصادفه كل يوم من ضغط مهم في شوارع الكويت، وهو بعنوان (كيف تستفيد من الازدحام المروري وتستمتع به؟).
فلا يخفى عليك عزيزي القارئ الازدحام في شوارع الكويت، عند التوجه أو الخروج من العمل أو المدارس، أو إذا كنت رايح للسوق وقت فتح المحلات أو وقت خروج الموظفين منها، ولا لقوا لها حل ولا أظن راح تنحل في المستقبل القريب، لذلك أقدم لكم بعض النصائح اللي راح تفيدكم خلال فترة وقوفكم بسياراتكم طوابير في الشارع حتى وصولكم للبيت:
- 1 - أنصحك أيها السائق انك تأخذ معاك قبل ما تطلع من البيت سندويتشات تسد جوعك وتسليك، وترمسين واحد فيه شاي وواحد فيه قهوة، ولا تنسى تأخذ معاك تمر أو قطع من الكاكاو، وإذا كنت تحب المكسرات أحفظها بعلب داخل درج السيارة عشان تكون جاهزة في وقت الحاجة.
- 2 - إذا كان عندك فيلم ما شفته أو شريط كاسيت ما سمعته، اختار لك كل يوم شريط معين عشان تشوفه أو تسمعه وتستفيد خلال انتظارك في الشارع.
- 3 - إذا كان عندك بلاك بيري أو لاب توب، جيبه معاك عشان تتصفح على المواقع وتدخل الماسنجر.
- 4 - إذا كان معاك عيالك، لا تنسى تشاركهم ويشاركونك في وجبة الغداء أو العشاء في السيارة، وعليك انتهاز الفرصة في فتح حوار صريح مع أبنائك وتصبح فرصة انك تتقرب منهم خلال ساعات الانتظار هذي.
- 5 - لا يمنع انك تجيب مخدة وبطانية، للي يحب يأخذ غفوة من عيالك وينام حتى وصوله للبيت.
- 6 - لا تتحرج عزيزي القارئ من مشاركة الناس اللي واقفين معاك في سياراتهم بالشارع، من انك تتعرف عليهم وتسولف معاهم وتكون صداقات جديدة.
- 7 - إذا كانت معاك زوجتك، فهي فرصة بأنك تلقالك عذر بأنك قضيت معاها كم ساعة وانت تستمع لسوالفها من دون مقاطعة.
- 8 - إذا كنت من هواة نظم الشعر أو الخاطرة، فبإمكانك انك تكتب بعض الأبيات أو الخواطر، وهي فرصة لاقتناص الأفكار.
- 9 - إذا كان عند عيالك واجبات أو دروس، فبإمكانهم يحلونها ويراجعون حتى للامتحانات الفصلية.
- 10 - عزيزي السائق، إذا كانت الحلول هذي ما ترضيك ولا تشعر انها تفيدك، أنصحك عند خروجك من البيت في أوقات الازدحام، تترك سيارتك عند الباب، وتأخذ لك «قاري» أبرك لك وأنفع لصحتك، وأسرع لوصولك للمكان اللي تبيه.. صدقني.
[email protected]