دلال العياف
رسالة صوتية مرت علي من خلال تداولها عبر وسائل التواصل الاجتماعي أثارت حفيظتي وما ان وصلتني الرسالة الى ان رفعت السماعة ودارت مكالمة هاتفية مليئة بمشاعر وطنية عالية تفوق الحد وتتجاوز حدود المحبة النابعة من القلب، وعبرت كعادتها أم سوزان بسجيتها العالية ولهجتنا اللي تريح اليوف وقالت:
والله يا ان كل كلمة حجيت فيها كانت من قلبي ويوفي وبالفعل هناك جنود مجهولون ما تهمهم دعايات ولا يهمهم ظهور إعلامي وكل غايتهم ومرادهم حب هالديرة وترابها العطر الخنين، ما تفاجأت من دورهم ومواقفهم الأصيلة لأني على ثقة ان هذا هو حب الكويتي للكويت ما يساوم بحبه ابدا ويعطي ولا ينطر عطية بالمقابل لأن هذا الكويت مهما عطيتها تظل اللي عطيته جليل بحقها وحقها وخدمتها واجبة.
وأضافت أم سوزان: وانا رايحة اتقضى قريضاتي بالجبرة واشتري خضرتي شفت هالبنيات بنات الكويت اللي قاعدين يراوون اميمتهم الكويت برهم لها بسكات رايحين يتشرون هالمنتح الكويتي يدورون الزين وللامانة ماقط شفت هالبنية اعرفها من صوتها ويوم اني شفتها شلون تراكض وتنقي الخصرة الزينة ومن مالهم الخاص وفليساتهم وكل هدفهم التطوع ويفيدون شعبهم وهي هنادي الجناعي الله ياحلوهم فز قلبي لهم ويدورون ويوزعون ولا همهم يعلنون وانا شفتهم بصراحة بالصدفة، أما عن الشيخة بسمة الصباح، الله يحفظها، ما قصرت وبعد هي من مالها الخاص ومن اول ما بلشت ازمة كورونا واهيا تشتغل ومتطوعة لجل الكويت ولا تبي شي غير خدمة بلدها وتشتري هالخضرة من مالها الخاص وبجهدها ومعاها بنات مثل الورد مطوعات ووراها سيارتين ثلاث وتدور وتوصل ليه الجهراء وتوزع على الناس والاسر المتعففة وحتى اخوانا البدون وانا شخصيا وصلتني نقصة، ولا احد يدري من بلشت الازمة ولازالت وربي تشكر على الجهود المبذولة لجل الوطن.
أما عن رئيس اتحاد المزارعين عبدالله الدماك ودوره في هالأزمة فما اقدر أحجي لان ما يوفيه وبالفعل اهما لوما وجود الوسيط اللي ياخذ المنتج ويبيعه على الجمعيات جان احنا عندنا وفرة في هذي الازمة وحتى ليه جدام لان تربتنا خصبة وفيها خير هذي بلدنا بلد خير وطبعا ما قصرت الوزيرة الشؤون اللي بادرت بمنع الوسيط وانها تكون من المزارع ليه الجمعيات دون وسيط وهذا راح يكون اوفر وراح تكون عندنا محاصيل ومنتجات زراعية بوفرة.
وأنهت كلامها بان ديرتنا ديرة خير وكل شي فيها الله يحفظها ايدياتها كريمة وتعطي البعيد والقريب، لكن ودي ان تتوافر فرص العمل بالجمعيات تكون للكويتيين من المتقاعدين او اللي قاعدين ببيوتهم ومسجلين بديوان الخدمة وما طلع دورهم وقاعدين بستفيدون منهم واهما ما يقصرون عيالنا او اخوانا البدون يشتغلون ما فيها شي والأزمة بينت المعادن وفزعتهم ما قصروا قواهم الله.. وحتى هالاراضي الموجودة لدى من يملك مزرعة ومخليها دون زراعة ومسويها سكن يا ريت والله تستثمر وتنزرع او تعطى للشباب اللي مقدمين على بيوت ينعطى لهم منها سكن ومنها تنزرع وبجذي نكون شجعنا الشاب الكويت، والكويت كانت ومازالت وستكون ديرة خير.