النجوم ورمضان

ورود تكشف سـر دخولها للمطبخكل إنسان لديه طقوس معينة يزاولها في شهر رمضان الكريم، وفي هذا الإطار حاورت «الأنباء» المذيعة ورود حيات عن يومياتها في شهر رمضان، وأجابت بكل عفوية وبساطة عن الأمور التي تقوم بها وأكدت انها تحاول ان تختم القرآن اكثر من مرة في هذا الشهر، والى التفاصيل: اشلونچ اختي ورود؟ بخير الله يسلمك. مبارك عليچ الشهر. علينا وعليك. اشلون رمضان معاچ؟ والله الحمد لله تمام. شتسوين في بداية يومچ؟ والله أقصد الفجر وأصلي وأرد أنام وبعدها أقصد الضحى على الساعة 10. شنو اول شيء تسوينه اول ما تقعدين من النوم؟ اغسل ويهي وافرش اسناني (تضحك)، وبعدها ادش المطبخ واشوف شنو صاير بالمطبخ ماشية الامور ولا لأ. يقولون انچ طباخة. منو يقول هذي اشاعة. عيل منو اللي يطبخ؟ الله يخلي الطباخ والطباخة والوالدة وعماتي ويدتي يطبخون ويدزولي، وانا لمن ادش المطبخ ما اسوي شيء بس أطالعهم واشرف عليهم. يعني وردية كل يوم على واحد؟ لا حشى، تدري برمضان لمن الواحد يسوي شيء يدز حق الثاني وچذي واحد يدز حق الثاني وماشية الامور. بعدها شنو اتسوين؟ طبعا اصلي الظهر وأقعد اجابل التلفزيون واشوف البرامج الدينية والمسلسلات. يعني أكثر البرامج اللي اتابعينها اهي الدينية؟ اي خاصة اللي يحطونها في تلفزيون الكويت. يعني ما اتطالعين الا تلفزيون الكويت؟ لا والله اطالع «الوطن» و«الراي» والـ «mbc» واشوف باچي القنوات. عندچ طقوس معينة اتسوينها برمضان؟ اكثرها صلاة وقراءة القرآن واحاول اختم القرآن اكثر من مرة في كل رمضان. اشلون الرياضة معاچ؟ امشي بوساعة قبل اذان المغرب. وين اتمشين؟ ممشى البحر. اشلون السوق معاچ برمضان؟ لا كلش انا مو صوب السوق برمضان، وانا بيتوتية ابطبعي، ورمضان يخليني اقعد ازيادة بالبيت. والغبقات؟ لا بعيدة. ليش؟ انا قليلة الأكل، وفيني معدة، ومعدتي ما تسمحلي آكل متآخر وانام. منو اكثر ممثل او ممثلة اتابعينهم برمضان؟ عبدالحسين عبدالرضا احبه وايد. يقولون قرقيعانچ هالسنة غالي وايد؟ حده 7 نجوم هذا ولدي حبيبي طلولي. ليش غالي وايد؟ لأنه امي دايما اتسوي لنا شيء راقي، وعلمتنا على چذيه، والحين لمن اســـوي حـــق ولـــدي طلــول اناشبها واقولهــــا شوفـــي قرقيـعــــاني كان عندكـــم چذيه. وزواراتچ برمضان؟ اروح عند عمتي واهلي والاصدقاء. ونهاية اليوم؟ أصلـــي وأقرأ القـــرآن وأطالع التلفزيون وأنام.سينا الفارس: أحب «التشريبة» والحلويات الفرنسية وايد اكدت المطربة الكويتية سينا الفارس ان شهر رمضان له طابع خاص في نفسها لانه من خلاله تستطيع التفكير بصفاء ودون تعب بالاضافة انها تعشق لياليه الجميلة التي يزداد فيها الترابط الاسري. سينا تحدثت عن سفرتها في شهر رمضان فكانت هذه الدردشة:  شخبارچ سينا؟ هلا والله بـ «الأنباء». مبارك عليچ الشهر؟ علينا وعليك وعلى امة الاسلام. شلون لياليه معاچ؟ روعة واتمنى ما تنتهي لانها حلوة وايد والاحلى فيها لمة الاهل وتبادل الزيارات مع صديقاتي. وشخبار المطبخ معاچ؟ المطبخ بالنسبة للحريم في هالشهر الكريم شي ضروري حتى لو بعضهم ما يعرفون يطبخون يشرفون على الطباخ اللي يسوونه الخدم. وانت؟ لا انا غير.. شلون؟ اطبخ واشرف وابدع بهالشهر الكريم. شنو اللي تطبخينه؟ كل شي يخطر على بالك «تضحك». طيب شنو الطبخة اللي تحرصين تكون موجودة على سفرتچ؟ والله وايد بس احرص على وجود «التشريبة» والمحروق صبعة والمحاشي وورق العنب وهالطبخات انا اسويها بنفسي ما احب الخدم يشاركوني فيها علشان تطلع ميه بالمية. منوين متعلمة الطباخ؟ من امي الله يخليها لي. وبعد شنو تطبخين؟ احب اسوي الحلويات بنفسي واحرص على الحلويات الفرنسية واللقيمات والزلابية. تحبين منو يكون على سفرتچ؟ اهلي وناسي وكل واحد يرتاح له قلبي علشان تنفتح شهيتي للاكل «تضحك». رمضان شنو يمثلچ؟ الشي الكثير فأنا اعتبره من الشهور اللي اعيش فيها صفاء ذهني لأبعد الحدود خاصة عندما اقرأ القرآن واختمه اكثر من مرة في هذا الشهر الكريم.