هادي العنزي
صفحة «بحري» تلتقي اليوم بالحداق باسل الفيلكاوي الذي حدثنا عن بداياته على الأسياف وأسباب عشقه لها وإلى ماذا يحتاج حداق السيف من شروط للفوز بالسمچة المطلوبة وما ييمة سبيطي الأسياف وعلى أي مايه يبين وأفضل وقت لصيده وأين تتواجد أسماك النويبي والشعري ولماذا فضَّل الأسياف الشمالية عن الأسياف الجنوبية؟ وأفضل مكان حاليا حاضرة فيه السمچة والصيد وفير وأماكن تواجد شعم الصيف والشتاء. كما أطلعنا الفيلكاوي على حجم خيوط السبيطي والشعم وأنواع الييم الأخرى التي يفضلها السبيطي وهل لصيد الأسياف حسبة معينة ومعلومات مميزة عن فنيات صيد الأسياف؟..
فإلى التفاصيل.
بدايتي بالصيد كانت بسنة 2005 على الأسياف وكان معاي ربي يذكره بالخير سهيل العطار وولد خالي محمد الفيلكاوي وكنا نروح اسكلة سوق شرق وأغلب الأسياف الشمالية انحدق عليها مع أسياف الجنوب ومع الأيام والممارسة الحمد لله قمت اتعلم أكثر وأكثر وبديت أتطور من ناحية الخبرة بالحداق ومن بعدها بلشت أحدق بالطراد بسنة 2009 مع إبراهيم الشطي وبدر كرم والأماكن التي كنا نذهب إليها هي الحيشان والرشدان والدفان.
الأسياف يبيلها صبر
ويضيف: صيد الأسياف جدا سهل وما فيه أي صعوبة أبدا أهم شي ترتب عدتك بالشكل الصحيح من حجم الخيط والميدار والييمة المناسبة حق السمچة اللي مستهدفها وتكون عارف السيفة ان فيها صيد وعليك بالصبر لأن صيد الأسياف يحتاج إلى بال طويل عكس تماما عن صيد الغبة وهذا شيء معروف عند الكل والأرزاق بيد رب العالمين.
السبيطي يبي فن
ويضيف: السبيطي من أكثر الأسماك المفضلة عند كل الحداقة تقريبا وصيدها ممتع جدا والسبيطي من الأسماك الحذرة وصيد السبيطي يبيله فن وأي حداق يتفاخر بصيد السبيطي وموجود على الأسياف الشمالية والجنوبية وييمته حسب المكان وفي أماكن يرعى على الزوري وفي أماكن يرعى على السلس وايضا ما يمنع انه ينصاد بييم من نوع آخر مثل العجينة ومصران الدجاج واليواف، وكل سيفه لها حسبة فهناك أسياف يبين عليها السبيطي بماية الثبر وفي أماكن يبين على ماية السجي وخصوصا اول السجي او شق النور وطبعا ما يمنع انه ينصاد بالأوقات الثانية وبالنسبة حق الخيط اللي أحدق له فيه مقاسه من 40 الى 45 والميدار من 0/3 الى 0/6.
الشعم يبي خيط ناعم
ويتابع: أساسيات صيد الأسياف أول شيء تتأكد من السيفة انه فيها السمچة اللي بتحدق لها بعدها ترتب العدة المناسبة على سبيل المثال بتحدق حق الشعم خيطك يكون ناعما ومقاس الخيط من الـ 30 الى 35 والميدار مقاس 2 وبعد ما ترتب عدتك وشغلك لازم تعرف الييمة المناسبة حق السمچة اللي مستهدفها وأفضل المايات بالصيد في السيفة اللي تروحلها وهذه اي أحد يقدر يكتشفها مع الممارسة وكثرة التردد على المكان نفسه.
النويبي والشعري
ويضيف: النويبي موجود في المحادق الشمالية منها الدعية والركسة والأبراج والدفان وافضل موسم حق حداق النويبي من شهر نوفمبر الى شهر مارس والشعري موجود في المحادق الجنوبية بكثرة وفي أماكن كثيرة منها جليعة او أقواع قاروه والأرياق والشعري موجود على مدار السنة والأحجام الكبيرة بين شهري يونيو ويوليو.
أفضل أسياف الشمال
ويقول: كل الأسياف فيها خير سواء جنوب أو شمال، لكنني أفضل الحداق بأسياف الشمال والسبب انه السمچة اللي أغلب الحداقة يحبونها مثل الشعم والمزيزي والسبيطي موجودة بكثرة، وأفضل أماكن الصيد حاليا بالشتاء عندك الأبراج والدعية وبوية الأبحاث والسمچة الموجودة نويبي وشعم والمزيزي.
شعم الصيف والشتاء
ويضيف: الشعم من ناحية الأسياف موجود تقريبا بأغلب الأسياف وأفضل الأماكن لحداق الشعم هي الدوحة والفنطاس وأفضل أوقاته بالصيف ويبين على رشة الماية وأفضل ييمه له الشريب والربيان السعودي والعجينة وبالنسبة لشعم الشتاء يقل على الأسياف ويبين داخل البحر وأماكنه الصبية والأبراج وبوية الأبحاث والرقوق والييمة ربيان سعودي، والنقرور والشماهي بالأماكن الشمالية يكون موسمها شهري مارس وأبريل ويفضل حداقهم بالطبعانات وجزيرة عوهة، وبالنسبة للاماكن الجنوبية أفضل موسم لهم هو شهرا أغسطس وسبتمبر ويتواجدان بكثرة بالطبعانات وأقواع قاروه والأرياق.
ختامية ونصائح
واختتم الفيلكاوي قائلا: أكثر شيء يضايقني أولئك الذين يرمون مخلفاتهم بالبحر وايضا اللي يمر عليك بسرعة عالية وانت جالس تحدق ويخرب عليك ويعفس جوك دايس، ونصيحتي حق كل حداق انك تصبر على رزقك والرزقة اللي مكتوبة لك مافي أحد بياخذها غيرك، وأتمنى من إخواني الحداقة انهم يحافظون على بحرنا الغالي ورب يوفق الجميع.