إعداد: هادي العنزي
صفحة «بحري» تلتقي اليوم الحداق عبدالله المشموم الذي تولع بحب البحر صغيرا، فكانت بداياته على الاسياف وتفننه بصيد اسماك الجنعد واوقات عبور النقرور والشيم واماكن تواجدهم واهم الاسماك الحاضرة الآن في الشمال والجنوب واسرار صيد السبيطي، وافضل ييم له ومتى تبين الجنعده العودة واماكن صيدها، كما اطلعنا المشموم على موسم الهامور وطريقة صيده والطريقة الجديدة للفوز بالجنعده التي توفر الوقت والجهد ومعلومات عن صيد المحادق الشمالية والمحادق الجنوبية وانواع الاسماك التي يبحث عنها الحداق الكويتي في اغلب رحلات صيده، فإلى التفاصيل:
تولعت بحب البحر والصيد منذ صغري مع الوالد وكان يطلعني معاه على الأسياف وحبيت هذه الهواية لين طلعت ليسن، بعدها قمت اروح اسياف الكويت من الشمال الى الجنوب وكان الصيد طيبا ولما تخرجت اهدتني والدتي طرادا في سنة 2008، وكان الوالد يعلمني على الطراد من ناحية التنزيل وتصعيد الطراد وكنت أروح لمحادق الفنطاس والحيشان والدوحة وكبر وقاروه وأم المرادم وبعدها قمت اطلع بروحي وتعلمت كل شي في البحر.
أوقات عبور النقرور والشيم
ويضيف: النقرور والشيم يبين بشهر ابريل وسبتمبر، اول عبور للنقرور من الجنوب وعند الطبعانات وفوق كبر وينزل الى الفنطاس وبعدها يروح شمالا بالأطيان ويدش الجون وبعدها يصعد الى جزيرة عوهه أماكن الصيد الطبعانات وصوب الصبية وبر كاظمة وطبعانة عوهه، الشيمة وقت عبورها من الشمال ولازم تكون المايه حمل أماكن حداقها راس الأرض الدردور ومدخل الحيشان هناك معبر وفيه دردور تبين فيه الشيمة.
أسماك حاضرة الآن
ويتابع: السمچة الحاضرة الآن في الأقواع الجنوبية الشعري والبواليل والعندق والقرقفان، وفي الجزر تحصل شعاري وبواليل وفسكر وقرقفان وچنعد وعندك الطبعانات يبين فيها هوامير وبواليل وشماهي، وفي المحادق الشمالية مبين نويبي وشعم وبواليل ونقرور وينم ووحر وسبيطي وفي محادق الجزر فيلكا وعوهه تحصل شماهي ونقارير وشعم وسبيطي وبالول.
ركة طويلة أو طفاحي للسبيطي
ويضيف: السبيطي تحصله بالرقوق اكثر شي وسمچه ذكية وله مايه يضرب فيها، وعلى حسب الوقت اللي بتصيد فيه السبيطي لازم تعرف شنو الييمه اللي تكون موسمها مثلا موسم الميد تكون الييمه زوريه محاياة وخيطك ركه طويلة او طفاحي وعندك النقاقه تقص راسها وتحدق فيها ومصيران الدجاج هذه افضل ييمه حق السبيطي، ولما تحدق لا تحرك الخيط لأن السبيطي قبل ما ياكل يلعب بالييم ويكون حريصا وبعدها يضرب.
ضربة الچنعدة طرب
ويقول: الچنعدة موسمها في شهر نوفمبر واول عبورها يكون حجمها صغير مو كبيرة وتبين دائما في الجنوب من جليعة الى أم المرادم وطريقة وافضل طريقة لصيدها هي التشخيط بالقفشه والبورد وعلى شهر يناير وفبراير تبين الچنعدة العودة بكبر وقاروه وأم المرادم وتقدر تصيدها بالجقق لأنها تكون بالعمق اغلب الأوقات، وسر حبي لها هو طريقة صيدها لان يبيلها فن وتكون عارف شنو تبي الچنعدة ولما تصيدها تحس بشعور عجيب واحلى صيد لها يكون بالسنارة للحجم الكبير منها وعندما تضرب عليك تسمع صوت المكينة طرب.
طريقة صيد الشعم والهامور
ويضيف: ما في احد ما يحب الشعم وصيدها واكلها وتتواجد بالرقوق وداخل الجون اكثر شي، وطريقة صيدها بالصيف خيطك ركه طويلة وييمتك شريب، وفي والشتاء ييمتها ربيان ومصران دجاج وركه طويلة ويكون الخيط من 25 لغاية 40، مميزات الشعم انها سمچة ذكية ولها طريقة سحبة للخيط تعرف انها شعم وفي ناس يحدقون بالسنارة وطريقة سهلة وصيادة عن تجربة لان السنارة تلشط على طول، الهامور اماكن صيده اكثر شي بالطبعانات والاقواع موسمها شهر ابريل وسبتمبر وتكون المايه فساده وتحدق له على ماية ثبر ويكون خيطك من 80 وفوق الييمه المفضلة للهامور الجم ويكون محاياة والخثاق واي سمچة حيه ثانية تكون حجمها من كف اليد واكبر بشوي ولازم تكون صبورا على الهامور لانه عادي تصيده بيوم ويوم ثاني ما تصيده.
ختامية
واختتم المشموم قائلا: اكثر شي يضايقني بالبحر اذا كنت طالع ويصير شي بالطراد فجأة طبعا طلعتك خربت او نسيت شيئا مهما بالبيت والطلعة ما تسوه من غيره، واذا كنت طالع مع واحد غشيم بالبحر ما تدري تدير بالك عليه او على البحر والمشكلة يسبب لك مشاكل بالطلعة حتى لو تعلمه ما ينفع معاه فتضطر انك ما تكمل طلعتك معاه، وطبعا التلوث والقراقير والصيد الجائر وتسكير الجون على الحداقة.