إعداد: هادي العنزي
الكاياك رياضة واللفاح والحداق طرق صيد اجتمعوا الثلاثة ليكملوا حلقة التحدي والمتعة والاكشن في صيد الأسماك، صفحة «بحري» اليوم تلتقي بالحداق حسين عبدال الذي جمع الرياضة بالكاياك وهواية الصيد باللفاح والحداق في وقت واحد فزرع التعب والجهد والوقت وحصد خبرة بصيد اغلب أنواع الأسماك تميزه عن باقي الحداقة، كما اطلعنا عبدال على افضل طرق الصيد ومميزات اللفاح وأيهما افضل لفاح السيف ام الطراد ونصائح لكل من يرغب تعلم الصيد باللفاح والكاياك ومعلومات جديدة شغلت الساحة البحرية فإلى التفاصيل:
بديت الصيد منذ الصغر وكان عمري 8 سنوات تقريبا وحبيت البحر وتعلقت فيه بسبب الوالد يطول بعمره وخالي عبدالله الموسوي بوعيسى فكنت أشوف أبوي كل ما يطلع بحر مع خوالي يجيب لنا سمج واستانس، ودائما نروح الأسياف وأول شي تعلمت عليه السالية وكنت استمتع فيها وكل ما نروح البحر لازم آخذ السالية معاي واصيد فيها ميد وربيان وبياح وشعم وزوري بأسياف الشمال ونادي ضباط الجيش، وبعدها علمني الوالد شلون أحدق وأمسك الخيط وطريقة النابر ومتى ألشط وشلون أردع، والأماكن اللي نروح لها كثيره في السابق الجنوب والشمال مثل الرشدان والحيشان والمضروبة وعوهة وأم المرادم وقاروه والطبعانات والبوية الصفرا.
طرق صيد جديدة
ويضيف: الحداق شي أساسي تعلمنا عليه من صغرنا فمن المستحيل ننساه لذلك حتى لو أصبحنا في الوقت الحالي بتطور كبير في طرق وأساليب الصيد فلا زلنا نحدق.. ولكن مع التطور لأساليب وطرق الصيد الحديثة وهي الكاست (اللفاح) والجق لها أكثر متعة وتحد لأنه أصبحت رياضة قبل الصيد فإذا اجتمعت الرياضة والصيد فتجتمع المتعة وكذلك التحدي والمنافسة الشريفة بنفس الوقت بين الربع على الصيد لنوع سمجة معينة باستخدام عدة معينة فهذا شي ممتع الصراحة (نصيحة لحد ياخذ التحدي بشكل أكبر من حجمه لأنه بالنهاية رياضة والرزق من رب العالمين) وبالنسبة للعدة في طرق الصيد الحديثة هي عبارة عن الصيد بالسنارة (القصبات) والمكاين وكذلك تختلف الخيوط عن خيوط الحداق في طرق الصيد الحديثة فيتم استخدام خيوط الحرير، وفي نهاية خيط الحرير يتم ربط خيوط الفلوروكاربون وميزتها ما تبين بالماي وحق اللشطة ما يكون مثل الحرير + الميارير (اللورز) وهي الطعم الصناعي سواء من الخشب أو البلاستيك أو الربل وكذلك الجقات ويكون من الرصاص فمن هنا حبيت الطرق الحديثة للصيد وتعمقت فيها.
مميزات اللفاح
ويتابع: الكاست (لفاح) أو جق = المتعة والتحدي + إنك كل فترة تحط لك هدف (سمجة محددة) وتاخذ فترة علشان توصل للهدف والأهداف كثيرة رغم إن نمارس الكاست (اللفاح) والجق من فترة طويلة إلا إنني كل يوم اتعلم شغلة جديدة وكل يوم أحط لي هدف معين وأحاول أوصل له وشي مهم جدا علشان الإنسان يتطور (لازم يحط بباله لو شنو يشوف نفسه محترف راح يبقي يتعلم كل يوم شي جديد لأنه التعليم حلقة مستمرة ليس لها أي سقف محدود)، واللفاح أو الجق هو عبارة عن استخدام القصبات (السنانير) والمكاين والخيوط (حرير + فلوروكاربون) وكذلك الميارير (اللورز) والجقات وكل نوع فيهم له سبحة معينة وطريقة معينة بتحريكه لجذب السمج وإيحائه بأنه طعم حقيقي سواء بحركته أو أكشنه صوته، ومن الأشياء اللي تميز الطرق الحديثة تروح البحر وترجع بدون زفرة الييم، أما بالنسبة عن أفضلية الحداق أو الطرق الحديثة الكاست (اللفاح) والجق ما نقدر نحدد أي نوع فيهم الأفضل فبعض الأحيان طريقة تتفوق على الطريقة الثانية فالشي هذا يعتمد على المكان والسمجة شنو تبي فالناس اللي تستخدم الطرق الحديثة ما يهمها الكثرة بالصيد بل يهمها الأكشن والطريقة والتحدي والهدف اللي حاطه حق نفسه فهنا الفرق.
بدايات الكاياك
ويضيــف: بدايـاتــي بالكايــاك من 2011 في الخيران وجربت أكثر من نوع وشركة وبعدها حبيت أربط هواية الكاياك مع الصيد وانزل فيه في البحر المفتوح ومن الوقت هذا صرت أبحث أكثر عن الكاياك وأتعمق فيه وأشوف فيديوهات وأتابع بطولات لين صارت هواية أساسية عندي فأغلب طلعاتي بالكاياك للصيد بالطرق الحديثة والحداق وبعد فترة من الاستخدام فمن الطبيعي مواجهة صعوبات والمرور بأخطاء لأنه كل خطأ نمر فيه نتعلم منه والبحث العميق عن المعلومة بعدها قمت أسوي فيديوات أشرح فيها أمور عن الكاياك وقمت أعطي نصايح في السوشال ميديا والانستقرام علشان الكل يستفيد وبعد مرور فترة مجموعة كبيرة من الشباب طلبوا مني أسوي دورات تعليمية فبدأت دورتين ليفل 1 والسلامة وليفل 2 الصيد بالكاياك والأساسيات، ونصيحة لكل رواد الكاياك إنه ياخذ الكاياك كرياضة بالدرجة الأولى وبعدها يدمج الصيد بالرياضة ويكون معاه لايف جاكيت مهم جدا.
لفاح الطراد والسيف
ويقول: لفاح الطراد او السيف كل نوع منهم له متعته الخاصة ووقته حسب الأجواء والظروف من صغرنا دائما نطلع بالطراد ونرد بخير، الطراد في أماكن كثيره تقدر تروح لها وعدة خيارات بالتغيير والوصول لمناطق بعيدة فهذه أشوفها ميزة بالطراد، أما الأسياف فلها نكهة خاصة جدا، فالخير كله موجود بالأسياف بس الواحد لازم يتعب على المايات الصح ويركز على المكان ويعرف ماياته لأنه كل سيفة تختلف ماياتها بكل موسم وكثر ما ركزت راح توصل حق نتيجة لأنه ما في شي ياتي بدون تعب، وبالنسبة لي دمجت الطلعات بالطراد والسيف بشغلة وحدة وهي الكاياك انزل من الأسياف وأغطي أماكن كبيرة أكثر من السيف وأقل من الطراد واستمتع جدا بالكاياك.
افضل طريقة للصيد
ويضيف: أفضل طريقة فعالة في الصيد هي الجهد المبذول من الشخص والتعب في دراسة عدة أمور منها المايات مثال إذا بتكلم عن سيفة لازم أجربها على مدار السنة وفي جميع المايات والأوقات علشان أحكم على المكان مثال بالحمل والفساد بدايته ولا آخره بالسجي أو بالثبر أو الوقفات للماية فهذه كلها عوامل مساعدة حق كل مكان يختلف عن الثاني وكل ماية وكذلك إذا تبي تعرف الأسياف والأقواع الطيبة سواء سيف أو طراد لازم تعرف الأرض اللي تحتك هذه راح تختصر عليك وايد أشياء مثال احنا ننطر لمن تقص الماية ونشوف الأرض هل صخرة ولا طينة وهل فيها مرعى شرايب ودود وقشريات اللي تتغذى عليها الأسماك فهنا نعرف انه الشعم والقرقفان كمثال موجود وكذلك الزوري والمنجوس والسلس إلخ.. فالعملية مو إني آحكم على المكان من أول مرة بل هو مسألة تعب ووقت.
ختامية
واختتم عبدال قائلا: كل شخص جديد يدخل هواية اللفاح إنه ما يتسرع ويبي يعرف كل شي بوقت واحد لأنه طرق الصيد الحديثة بحر كبير ومتشعب فإذا يبي يعرف كل شي راح يتشتت وممكن تصير ردة فعل ويكره ويترك الهواية، فالتدريج مهم حتى الانسان الخبرة كل يوم يتعلم شي جديد فكثير من الناس يدخلون بالهواية ويبون يشترون كل شي وينجرفون وراء لعبة التسويق أو ماركة معينة أو يشوف أشخاص صايدين بقصبة أو ميرور ولون معين ويبي يروح ويشتري نفسهم وممكن ما ياخذ حبة بل أكثر فهذا غلط ولازم يصير وعي وكل شخص ياخذ احتياجه فقط ونصيحة لكل شخص قبل لا تشتري اسأل وابحث في أشخاص كثيرة لهم خبرة وما راح يقصرون.