إعداد: هادي العنزي
صفحة «بحري» تلتقي اليوم بالحداق طلال الشمروخ الذي حدثنا عن عشقه لصيد الأسماك سواء على الأسياف أو الغبة، ومواسم الأسماك، وخصوصا أسماك الشعم والسبيطي والنقرور والشماهي والهامور، وما هي السمكة المتوافرة الآن وأين تتواجد، وأفضل طريقة للفوز بحبيب الملايين السبيطي، ومكان تواجد شعم الشتاء والصيف، كما أطلعنا الشمروخ علي موسم صيد الجنعد، وأماكن تواجد الشيمة وييمتها المفضلة، والطرق الحديثة بالصيد التي أصبحت حديث الشارع البحري والتي تعتبر نقلة في عالم الصيد، فإلى التفاصيل.
إعداد: هادي العنزيكانت بدايتي بالصيد مع الوالد ربي يحفظه سنة 2002، كان ياخدني بكل طلعة معاه تقريبا، سواء أسياف او طراد، والأسياف اللي كنا نروح لها اسياف الضباعيهة واسياف الفحيحيل، ومن بعدها قمت احب الحداق اكثر واكثر خصوصا عندما يصيد الوالد له سمچه ويقولي تعال اسحبها وبعدها دشيت بالحداق وقمت اطلع واجابل البحر بكثرة سواء بروحي أو مع الوالد او ربعي.
خوارير الخيران فيها شعم
ويضيف: كل سمچه لها موسمها، وكل حداق يعرف موسم السمچه ووين يلقاها، النقرور والشماهي ينصاد بالطبعانات بالأقواع، وأماكن وايد تقدر تحدق لهم، بس نفس ما ذكرت كل سمچه لها وقتها ومكانها، حاليا السمچه متوافره بالجنوب والشمال، عندك الطبعانات حاليا فيها شماهي وهوامير ونقارير، الشعري والفسكره موجودة بالجنوب، اسياف الشمال الشعم حاضر فيها خصوصا الدوحة واسياف الديرة وخوارير الخيران والجزر والشعم يبيله خيط ناعم حجم 27-35.
خيط 60 للسبيطي الأقرع
ويتابع: السبيطي سمچه حذرة ومع ذلك في ناس تصيدها بكمية وبكل طلعة الجواب سهل وبسيط احسب مايته ومتى يبين بالمكان اللي بتروح له، وشوف على شنو يرعى بهذا المكان بتتوفق فيه وتصيده وطبعا لا تنسى العدة تكون مذهبها وعارف شنو خيوطك وشنو مياديرك لان السبيطي سمچه قشره وعادي تقص خيطك، والسبيطي يبي خيط من 40-50 وبعض المرات احط خيط 60 اذا عرفت ان مكاني فيه سبيطي اقرع اما بالنسبة لباقي السمچ فأغلب خيوطي تكون من 40-50.
الشعم والهامور
ويضيف: الشعم بالشتاء احدق له على أسياف الديرة وخوارير الخيران واسياف الجنوب وبالطراد اروح له مداخن الصبية على الرق وصوب الجزيرة الخضرا، طبعا ييمته الشتوية تكون ربيانه يفضل (السعودي المستزرع) لأنه عرد وصلاخه يواف وقوانص ومصارين دجاج، وبالصيف اتعب على الشريب والعجين، اما بالنسبة للهامور فأغلب الأوقات تلقاه بالطبعانات بأقواع معينة على طول السنة، لكن ينصاد بكثرة عقب موسم الخثاق، طبعا يفضل انك تحدق له بسمچه حية مثل (الچم، الشعري، الشعم، اليميام) وطبعا الهامور له حسبة مايه، تحدق له على وقفة المايه، تطرح بمكانك قبل الوقفة بساعة الا ربع او نص ساعة وبعد الوقفة بساعة الا ربع او نص ساعة، لأن هذه هي ماية الهامور.
الشيمة تحدق لها بسمچة حية
ويقول: الشيم عبارة عن سمچه عابرة، واغلب اماكن تواجدها بالأماكن التي فيها تيارات قوية مثل الدردور، صوب جزيرة عوهة، الصبية، وطبعا تحدق لها بسمچة حية مثل الميده او اليميامه، اما النويبية بالشتوية كنت اصيدها على اسياف الديرة، الجزيرة الخضرا، والونانه وبويه الأبحاث ومعبر البواخر وساعات تصدف عند جزيرة كبر، وبالصيف اصيدها بالركسه والدردور، وطبعا تحدق لها بربيانة، زورية، صلاخة ميد ويواف، خثاق.
رحلات صيد وموسم الچنعده
ويضيف، افضل رحلة صيد كانت في ارياق الدرر السنة التي مضت، وكانت السمچه حاضرة ومشكلة (انواع الحمام كلها) والعظيمي والربيب وفسكر وبواليل وچنعد، والدويلمي، كان مجموع صيدنا يطوف الـ70 سمچه وتنوعنا بطرق الصيد مثل الريش والجقنق والكاستنق، والچنعده سمجه عابره، وموسم عبورها يبتدأ من شهر اكتوبر ويستمر معاك لشهر ابريل، طبعا تختلف الأماكن التي تتواجد فيها الچنعده يعني يوم تلقاها بالمكان الفلاني تييلها اليوم الثاني ما تلقاها.
أساليب الصيد الحديثة
وأكد أن: السنوات التي طافت الناس قامت تشوف أساليب جديدة بالصيد، مثل (الجقنق والكاستنق)، وطبعا هالطريقتين قامت تزيد عندنا بالكويت بشكل ملحوظ، والناس قامت تتوجه لها وتفضل صيدها عن صيد الحداق التقليدي، لأن بالأساليب الحديثة تقدر تستهدف اغلب السمچ سواء اللي يرعى بالأقواع او الذي يرعى بين المايتين لأن هذه الأساليب انت تستفز السمچه، واحلى شي انك في المجالين تقدر تصيد السمچه التي يعشقونها بالكويت امثال (السبيطي، الشعم، الهامور، الشيمة، الچنعده، السكن) وانواع كثيرة من السمچ، وأنا أتمنى ان الناس تتوجه لهذه الأساليب لأن فيها مميزات كثيرة، مثل: العدة خفيفة وأقوى مقارنة بعدة الحداق، العدة ما فيها زفرة، الصيد فيها متعة ووناسة، وتقدر تصيد نفس ما ذكرت السمچ الذي بالأقواع والسمچ الذي بين المايتين، فهذا الشيء يعطيك مجالا أكبر لتنوع صيدك والأساليب سهلة وممتعة، وهناك اصحاب خبرة كثر تقدر تسألهم وتستفسر منهم وما يقصرون معاك، وفي أماكن يعطون دورات، وأنا شخصيا دشيت دورة عند شباب وتعلمت منهم وايد شغلات ومن تتعلم على الأساليب الحديثة ومع الممارسة راح تحس انها سهلة وإنك تفهم السمچه شنو تبي بالضبط.
ختامية
واختتم الشمروخ قائلا: وايد شغلات تضايقني بالبحر، أولها أصحاب الجت سكي والذين يؤجرونها للبعض واصحاب المشابك والقراقير والتلوث الحاصل لبحرنا الآن وفي النهاية أتمني من المسؤولين ان يفتحوا الجون للحداقة من جديد وربي يحفظ الجميع.