إعداد: هادي العنزي
صفحة «بحري» تلتقي اليوم الحداق عبدالله الشرهان الذي تولع بالصيد عام 2005 وعرف أسرار صيد أسماك كثيرة مثل السبيطي والشعم والشعري والقرقفان والفسكر والهامور والبالول وفنيات صيد السبيطي وأحجام الخيوط المناسبة لصيد الأسياف ومتى يكثر صيد الشعم الأصفر والأزرق وأفضل وأفضل ييمة لهما وأكثر وقت يكثر فيه صيد الهامور وأفضل مكان لصيد الشيمة كما أطلعنا الشرهان على بدايات صيده باللفاح والكاياك وتكنيكاته الخاصة واصطياده لسمكة الماهي ماهي العمانية التي تزن 10 كيلو ومعلومات عن عدّة اللفاح والنصائح التي قدمها لإخوانه المقبلين على هواية اللفاح، فإلى التفاصيل:
بداياتي الفعلية للصيد كانت 2005 وكنت اطلع مع جارنا وهو تاجر أسماك أثناء نزهته شمال وجنوب بحكم انه له معرفة كبيرة بالبحر الى ان تطورت بالهواية واشتريت طرادي الخاص في 2007 كان 16 قدما، وبدينا في مشوارنا البحري الى يومنا هذا، الصيد بكل مكان حلو سواء شمال او جنوب ولكل بحر سمچته، الفسكر والقرقفان والشعم والشعري يكون سمين هالفترة ودسم والچنعد هذا موسمه والعام كان متواجدا بكثرة والبالول والمزيزي والسبيطي سمچة طول السنة مبينة وتكثر في موسمها.
السبيطي يبي ييمه دسمة
ويضيف: السبيطي صيده حسب خبرة الحداق واختيار نوع الييم والتوقيت المناسب هذه الأمور تزيد فرص صيدك انا عن نفسي أحب أحدق له بنفس ييمة مرعاه يعني اذا موجود وفي ميد بحدق له بميد او منجوس او يواف حسب المرعى وبشكل خاص السبيطي يحب الييمه الدسمة وما يطوف المصير وخيوطي 60-70 ومياديري 5/0 الترديعه ركه باع وافضل أوقات صيده على السجي الفجر او المغرب، اذا بطلعه لفاح انصح بميارير التوب وتر ويفضل فيه صوت بعده ميارير الجيرك وتكنيكاتهم سهله كلها على اليوتيوب واهل الخبر مايقصرون وبشكل عام السبيطي سمچة سيف يبين عدل بشهر يوليو واغسطس.
الشعم الأصفر يكثر في الصيف
ويتابع: الشعم الاصفر بالصيف يبين بكثرة والأزرق بالشتاء ييمته بالصيف الشريب والربيانة زينة بعد والبعض يستخدم له العجين وفي الشتاء يدوخ على الربيانة وتحصله عند الطينة قبل نصيده بالدوحة والحيشان والرشدان لكن بعد منع الجون صرنا نحدق له سيف بالدوحة او ننزل له صوب الدعية والونانة والركسة، بالنسبة للهامور هذا وقته ويرجع يبين بكثرة أواخر البرد على شهر مارس وابريل وافضل ييمه له المحاياة ويضرب على الجم واليميام ونحصله عند الطبعانات وعوهه.
وقال: أحجام الخيوط على السيف ناعمة لانه اول وتالي صيدك بيكون قليل من شعم وقرقفان وشعري، غالبا انا أفضل حجم الخيوط من 28-30 وما أنصح بأكثر منهم، إلا اذا انت قاصد سمچة معينة او تدري المكان فيه شي معين انت رايح له مثل السبيطي، الشيم سمچة شمال ومشهور عندنا وأفضل مكان لصيده بالدردور ومتواجد بكثرة بالشمال وأفضل ييمة اليميامة او الزورية محاياة واللفاح حقها يعتبر من أفضل الطرق لصيدها.
بدايات صيد اللفاح
ويضيف: حاولت أغير وأطور من نفسي واستمتع أكثر وفعلا تعلمت اللفاح في 2011 ومارسته فعليا 2013 وفكرته انك تصيد بالطعوم الصناعية، وطبعا تحتاج عدة حديثة من سنارة وخيط ومكينة، اللفاح شيء جدا جميل وممتع لأنه فيه فن وتكنيكات وكل شخص يختار المناسب له لكي يحسن نوعية الصيد، ويختصر عليك الوقت من حيث في سمچة زينة بالمكان او لا يوجد وضيف عليه انك ما تحتاج ييم وغيره، ولقد اصطدت اسماك كثيره تتعدى الـ 10 كيلو، أذكر طلعت سمكة ماهي ماهي بعمان وكان وزنها أكثر من 12 كيلو وهي من أمتع الأسماك بالصيد والاكشن.
ختامية
واختتم الشرهان قائلا: والله للأسف بحرنا من سيئ الى أسوأ، وأكثر شيء يضايقني التلوث البيئي اللي حاصل وبحرنا مع الأسف صاير مكب للأوساخ والجرائم البيئية، يكفي مياه الصرف الصحي غير المعالجة تصب مباشرة فيه من دون اي معالجة، وأنصح كل شخص ما جرب اللفاح بانه يجربه وخاصة بالكاياك سواء لفاح او حداق بحد ذاته يعتبر متعة، والكاياك هو اسكلت الحداق المتنقلة يوصلك للمكان اللي ما يقدر عليه الحداق ولا يقارب عليه الطراد، وأقول للهواة الجدد باللفاح انهم ينتبهون في موضوع اقتناء العدة المناسبة، وانك ما تاخذ شيء فوق حاجتك ومن سأل ما ضاع ويفضل تسأل اكثر من شخص لكي يكون عندك معلومات صحيحة من كذا مصدر وشخص.