إعداد: هادي العنزي
تعلم على يد والده حداق السيف ودفار الحظره ونصب الطاروف، عشق صيد بحر الكويت إلا ان غليله لم يشف فاتجه الى محادق عمان، صفحة «بحري» تلتقي اليوم بالحداق صلاح الفرحان الذي حدثنا عن السمكة الحاضرة الآن وتحذيره من السبَّق وتجربته لصيد الأسماك العمانية ولماذا كل منطقة في عمان لها طريقة بالحداق وأهم مناطق الصيد في عمان مثل الشويمية وجزر الحلانيات ومنطقة خلوف ومتى يكون موسم الصيد في عمان، كما أطلعنا الفرحان على نوع الييم المستخدم وطريقة استخدام الخيط الأسود الحرير والتنسيق قبل السفر والتكلفة ومعلومات متنوعة عن اساسيات صيد المحادق العمانية، فإلى التفاصيل:
بداياتي بالحداق كانت مع الوالد، ربي يرحمه، منذ الصغر، وكان يودينا الشاليه، وتعلمنا منه كثيرا من طرق الصيد منها حداق السيف وعلى الاسكلة، وكانت الأمور بسيطة وما فيها اي تكاليف لتوافر صيد السمك، وتعلمنا نصب الطاروف، وكنت انا ما احب الطاروف عشان يكون فيه صيد وايد وقباقب كثيرة وتبريزها كان ياخذ من وقتنا ويؤخرنا عن الحداق، وتعلمنا ايضا دفار الحضرة اللي كانت عندنا بالشاليه وتنظيفها ووضع السمچ بالزبيل والحضره لازم نباريها كل يوم وما كان الوالد يخلينا نطوف يوم واحد حتى لا يخيس السمچ فيها.
سمچة الشمال والجنوب حاضرة
ويضيف: السمچة الحاضرة الحين الشعم والنويبي والسبيطي والبالول سمكة شمال وتكثر بالجون والدفان والركسة وعند مداخن الصبية وعوهة والاقواع الشمالية، وانصح الشباب هاليومين أن يكونوا قريبين ولا يباعدوا لأننا على ابواب السبق الجو فيها متقلب، وحاضرة ايضا سمجة الجنوب مثل الشعري والنهاش والفسكر والعندق ومكانهم فوق كبر عند صخرة تيلر وامديره واقواع قاروه وام المرادم والزور.
تعامل الشعب العُماني
ويتابع: صيد عمان تجربة ناجحة وحلوة وتستأنس منها، فيها تنوع السمچ بكثرة ومحادقها طيبة وكل منطقة لها طريقة للحداق بس لازم تكون تعرف وتسأل قبل لا تروح حتى تعرف ماذا تحتاجه وما ينقصك الامكانيات بسيطة عندهم وبدائية ومتواضعة لكنها حلوة، وبصراحة فيها نوع من الماضي الجميل وبساطته وتعامل الشعب العماني الطيب معاك ومساعدتك بأي شيء يقدرون يخدمونك فيه اكثر ما يميزها.
خلوف وشويمية وجزيرة مصيرة
ويضيف: افضل اماكن الصيد في عمان الشويمية وجزر الحلانيات والراس الحمر واقواع متنوعة فيها الهامور والنهاش والشعم العملاق يسمونه «الخناف» والشماهي والبزيمي والجنعد والتقوى وانواع كثيرة، وعندهم سمچة مو موجودة عندنا بالكويت تكون في البحر الغزير صعب تحصلها ويسمونها العندقة بس مو نفس العندقة التي عندنا وقريبة من الشماهي ولكن لونها نفس لون النهاش وقوية بصيدتها ولذيذة الطعم بس يبيلها خيط قوي، ومنطقة خلوف صيدها الشعم بأحجامه الكبيرة وكل حبة توصل 2 كيلو ويمكن اكثر، ويخلط معاك نقرور ونويبي وقليل الهامور تحصله، وجزيرة مصيرة بعد فيها سمچة زينة وخدماتها ممتازة والسكن فيها متنوع والصيد بعد متنوع ومشكل تروح لها بعبارة، هي عبارة عن جزيرة كبيرة فيها جميع الخدمات من المطاعم والسوبر ماركت والفنادق وكل شي تحتاجه موجود فيها، وهم تقدر تحدق فيها سيف واسيافها حلوة ورملة وحتى اذا في هواء تقدر تروح الجهة الثانية وامورك طيبة، مواسم الصيد في عمان يبدأ من شهر اكتوبر وينتهي بشهر ابريل وبعدها قفال لأن عندهم يبدأ الهوا والجو يتغير ويبدأ الخريف، وفي بعض المواسم يبچر شوي تقدر من منتصف شهر سبتمبر يبلش الحداق والييم عندهم العومه والخذاق.
طرق صيد العُمانيين
ويقول: الحداق في عمان دائما سماري اول ما يوصل الصياد المكان يجرب الصيد السماري ويشوف في سمچة او غير موجودة حتى يقلب ويدورها لين يحصل الراس بعدها يقط سن ويسمونه «هنقر»، واكثرهم ما يقط السن لكي يستطيع انه يقلب بسرعة اذا وقفت السمچة ولكن سمچة التقوى صيدها سماري لأن الراس يمشي ويتابعونه وكل ساعة يقلبون وراه وحداقها بين المايتين، وايضا طريقة صيد العمانيين غير بالخيط الأسود الحرير لأن السمچة التي عندهم (هوام) ودائما معاهم عصاية اذا وصلت السمچة يطقها ويدوخها وبعدها يبرزها وهم يحطون 3 الى 4 ميادير اذا شبة السمچة وكانت تحتهم عشان يصيدون منها اعدادا كبيرة.
التنسيق قبل السفر
ويضيف: الطريقة الصحيحة حق اللي يبي يروح عمان ويحدق هناك اول شيء يكون عارف شنو نوع السمچة اللي يبيها ويحرص عليها لأن مناطقهم بعيدة عن بعض وعمان كبيرة، ويحرص على التنسيق قبل لا يسافر ويكون سأل اهل الخبرة والتعرف على الامور الاساسية والاستفادة من خبرة الذي راح قبل وعرف طريقة الحداق فيها وتقل التكلفة عليه وما يخسر تكلفة زيادة وتكون الحسبة واضحة عنده.
ختامية
واختتم الفرحان قائلا: اتمنى التشدد على النزول للبحر وتكون هناك رقابة مشددة وغرامة كبيرة، وممنوع ينزل اي اجنبي للبحر وحتى لو عنده ترخيص الا مع صاحب الطراد المواطن، مع الاسف الشغلة عندنا سايبة مع انه ديرتنا صغيرة وتقدر تسيطر عليها بطريقة سهلة انك تحط نقاط في اماكن متفرقة وتتابع كل حداق بالرادار من غير ما تنزل بحر وتعرف وين راح ووين طرح وتنطره حتى يوصل على السيف وتفتشه. وربي يحفظ الجميع.