خالد سعد ونص مثقل شعرا وحبا وتمكنا، يجبر الذائقة على قراءته أكثر من مرة وفي كل مرة سيكون هناك إعجاب جديد بما يقدم هذا الخالد شعرا وإبداعا، باختصار هو من سيختصر كثيرا من الشعر بهذا النص الجميل.. أدعكم معه:
لا تفسر غيابك ولا تقول ظرفك
نظرات عينك عن سواليفك تنوب..
الا المهم خل التفاصيل خلفك
يا دوب تروى شوفك العين يا دوب..
لبى حضورك رغم حزنك ونزفك
مثلك حضوره يا ابيض القلب محسوب..
تشيل هم العمر من فوق كتفك
وانت ارهف من النود في لحظة غروب!
على الغموض اللي سكن فيك اعرفك
واشوف فيك الحب مقري، ومكتوب..
وصفتني قلبك، ودليت وصفك
هذا وقلبك دونه عثور ودروب..
ومتعبني بطيبك وذوقك ولطفك
لا ناوي ترحم، ولا ناوي تتوب!
وتعرض علي زينتك وتلد طرفك
تبي العروق تذوب والخافق يذوب..
وتقول: يا شاعر علي شح حرفك
لو كان حرفك يروي عقول وقلوب..
واقول: يا زين التمس منك عطفك
الوصف في صوب، وقصيدي لك بصوب..
اليا وصفتك بكسب ذنوب وصفك
وانا بصراحة ماني بناقص ذنوب..
خالد سعد الدوسري