نواف الطبيخ حداق عشق البحر وصيد الأسماك تفنن بصيد الهامور والبالول والشعم والسبيطي وعرف أسرار صيد أغلب الأسماك. صفحة «بحري» اليوم دخلت معه في ذكريات بدايات صيده وأماكن صيد سمكة النقرور ومتى موسمها وأفضل طرق صيد معشوق الجماهير السبيطي، وبعد منع الحداقة من الجون اين يذهبون وما أماكن الصيد البديلة، كما اطلعنا الطبيخ على أماكن صيد الشعم الأصفر والأزرق وما السمكة التي بدأ الآن موسم صيدها وأين يكون الفوز بها،ح فإلى التفاصيل: الحداق نواف الطبيخ مع الشعم
في البداية يقول: عشقت الصيد منذ كان عمري 15 سنة كنت أطلع مع عمامي وربعي انحدق اسياف طبعا تعلمت الحداق من صغري مع الحداق المعروف جاسم حياتي وأبيه وبدايتي كانت مثل كل الحداقة اول شيء يتعلم على الترديع وتجربة أنواع الخيوط بألوانها حتى إني وصلت الى كيفية صب البلور وتعلمتها لكن انصحوني بعض الحداقة بعدم صب البلور لأنه مادة الرصاص عند ذوبانها يكون إشعاعها خطيرا على جسم الإنسان.
وكنت أروح الأسياف تقريبا كل سواحل الكويت ومعظم سواحل المملكة العربية السعودية مثل العاموده والمشرحات وراس نيله وضيفه وأحسن صيد بالكويت للسبيطي والشعم بالحيشان والصبية.
صيد النقرور
ويضيف: صيد النقرور له موسم يبدأ من نصف شهر أغسطس وأول سبتمبر يبين جنوب صوب ارياق قاروه وأقواع جليعه والمظروبة وآخر شهر مارس إلى شهر أبريل أما الشماهي صيده يكون شمال فوق عوهة عند الطبعانة على ربيانة، وهذي احسن ييمة حق الشماهي والشيم اصيده فوق الدردور يبيله خيط علاق وميدار ساق طويل ومحاياه والرداع يكون طويل متر تقريبا.
أفضل أماكن الصيد الآن
ويتابع: حاليا أفضل الأماكن للحداق جنوب واللي يحب صيد الشعري والفسكر والقرقفان يروح فوق صوب حالة الزور اما الشمال الحين بين النقرور والنويبي بالركسه وحداقهم بالوقفة.
السبيطي وطريقة صيده
ويقول: أفضل طريقة لصيد السبيطي خيط ركة وأفضل ييمه لصيد السبيطي السلس أو النقاقة يعني أول شيء اذا كنت على السيف لازم يكون عندك طارف أو ساليه تصيد فيها سلوس واذا ما كان عندك ساليه تقدر اذا راحت المايه بالثبر أتدور نقاقه من تحت الصغر واذا ما لقيت مالك الا مصران دياي واذا ضرب السبيطي لا تلشطه بس يود عليه ووداعه لين يطلع.
بالنسبة لي أفضل حداق السبيطي في وقتين: الوقت الاول شروق الشمس (مع شقة النور) الوقت الثاني المغرب (غروب الشمس) وأفضل ييم يستخدم للسبيطي المحايات (زوري الحي + سلس أو مصران).
أماكن صيد الشعم والسبيطي والشماهي
ويضيف: أفضل محادق الشمال من الدفان لي الصبية وعوهة وفيلكا لأن أحب صيد الشعم والسبيطي والشماهي والنويبي.
وأحلى مكان حدقت فيه فوق الابراج صيدي منوع مثل الشعم والنويبي والبالول بس لازم أتنوع بالييمه يعني لازم يكون معاك روبيانة وصلاخة ومچوه وخثاق.
الشعم الأصفر والأزرق
وقال: أماكن الصيد قبل المنع هي الحشيان، وبعد المنع هي الركسة لتنوع الاسماك فيها فتجد النويبي والبالول والهامور والنقرور والشماهي (كثر ما تتعب على القوعة، تطلع معاك السمچة زينة).
الشعم الأصفر تصيده بالصيف والأزرق بالشتاء والنويبي موسمه بلش الحين تقريبا ويقعد لي آخر شهر أبريل وأحسن مكان لهم شمال صوب الدفان والركسة.
ما أوقف عن البحر
ويضيف: ما أقدر أوقف حداق حالي حال كل حداقة الكويت ما أوقف إلى بالكوس أو لمن يصير هوا يعني يعتفس البحر وكل حداقة الكويت مثلي ما يهمه حر أو برد وبصراحة هذي الهواية الوحيدة اللي يقدر الواحد يمارسها بالكويت.
ختامية
واختتم الطبيخ قائلا: أكثر شيء يضايقني بالبحر التلوث اللي صاير بالبحر يعني أنا وايد أشكر ربعنا بالثروة والبيئة على جهودهم بس بصراحة عمري ما شفتهم يخالفون السفن اللي أتفضي مجاريها بالجون وهي طالعة من مينا الشويخ يعني أشوفه كارثة بالبحر مجرى أسود على امتداد البحر ما يندرا مجاري أو زيت مكاين لا يحترمون لا قانون ولا بيئة وهذا الشيء يضايق كل الناس مو بس الحداقة.