ويش أعني لك أنا؟!

مشعل دهيم يا حبيبي كل شيء بقـضاء ما بأيدينا خلقنا تعساء ربما تجمعنا اقدارنا ذات يوم بعد ان عز اللقاء وكان هذا آخر اللي غردت فيه.. وبدينا بالنهاية افترقنا بلا وداع.. واستدارت وانتهى كل الكلام.. وابتدت خطواتها تعزف لحن غيبة طويلة.. كنت اناظرها وأنا حاير وفي بالي سؤال.. ليه راحت؟ ليه راحت؟ لين غابت بالزحام انتهينا ومضى كل إلى غايته.. بعدها في كل ليله كنت أرسم ورد في بالي.. واقطف منه وردة امسك الوردة بيدي وانزع الاوراق.. واردد: هي تجيني؟ ما تجيني هي تجيني ما تجيني؟ لين اجفاني تعانق بعضها تلحف عيوني وانام ولا صحيت إلا وهي تاقف بالي.. ارتبكت وصحت فيها: تذكرين يوم كنتي تسأليني.. ويش أعني لك انا؟ قولي انك ما نسيتي قولي انك تذكريني.. صدقي أكذب عليك إن قلت لك وقتها ما كنت فاهم ويش كنتي تقصدين.. كنت أحاول إني استوعب أحاسيسك واقول انتي.. وأسكت.. وكنتي تقولين كمل ليه تسكت قول ويش ودك تقوله..؟ كنت اراوغ بالاجابة.. كنت أقول إن المطر روح السحابة.. وانك أول من حرث هالبال بالطاري يوم بدفتر اشعاري قصيد.. وكنت اقول: إبكي لأن الدمع يغسل ما علق بالجفن من أحباب كانوا.. لاحظي احباب «كانوا».. كل هذا من هبالي يوم من بالي نفيت اللي في بالي.. أهلي أصحابي غلايض كل غالي كنت اقول انتي صباحات الوطن للمنفي اللي عذبه طول الحنين كل مشتاق لدياره وصوت جاره.. وشم ريحة شيلت أمه يوم صدره ضاق به من همه، واسمعه يومه.. يتمتم آه يمه.. آه يمه.. كل هذا من هبالي.. كنت أفكر فيك دايم لجل يرجع بك خيالي.. وأرسمك قدام عيني وأزعلك وتبعدين.. وانا انادي تعالي وتبعدين.. وارجع انادي تعالي وتبعدين.. وارجع انادي تعالي وتبعدين.. وارجع انادي تعالي وتبعدين.. وارجع انادي تعالي وتبعدين.. وارجع انادي تعالي وترجعين.. كل هذا لجل اقول امزح معك.. ماهقيت انك زعولة انتِ تعني لي الكثير.. ذكريات، وعمر فات، وصــــاحب من قبل اعرفك، كنت اسولف عنك يمه.. بس ما.. شي ماقدر اقوله. شي ماقدر اقوله.. بس انا لي كلمتين.. ويش يعني المطر والارض تترجى هطوله؟ ويش يعني الأب لاطفاله اذا ما لاح زوله؟ ماعتقد في يوم ثاني فيه مرة راح تسأليني ويش أعني لك انا؟ ويش أعني لك أنا..؟ بس أنا أبيك جاوبيني.. ويش أعني لك أنا؟ ويش أعني لك انا؟