السهرة

  تعال نسهر سوى يا سيّد السهره السهره اللي ما تحيي مالها داعي تعال عالج خفوقٍ زاد به قهره تعال شفني وشف دنياي واوضاعي القلب كلّه حزن والنفس منقهره والعين دمع الفرح في حجرها ضاعي والليله الفرحة اللي قبل منصهره عمّت بمجنونك اللي للغلا ساعي هديّتك من حبيبك ورده وْزهره اجمل زهور الغلا بأشكال وانواعي اغصان شجرة قلوب الحبّ مزدهره وْربيع الاشواق حلّ بوقت مرباعي كنت اتمنى اللقا في كوكب الزهره كنت اتمنى السهر يشرى وينباعي كنت احسب انّ المحبه قبل مشتهره كنت احسب انّ أيّ واحد للهوى واعي اثر الهوى يذبح الرجّال في دهره والحبّ له مدخلٍ ما منْه مطلاعي الحبّ جدول وخفّاق الهوى نهره والحزن للروح مثل الناي للراعي والله ما اكتب قصيدي فيك للشهره يكفيني انت اتعرفني يا اروع ابداعي والسهره اللي ماتحييها مهي سهره لو القمر طلّ فيها مالها داعي