نرمين الحوطي
منو منا ما يتذكر هذه الاغنية، ما أدري ليش هالايام تراودني هذه الاغنية؟ هل السبب انني في كل يوم اقرأ أو اسمع عن مصائب تهل علينا، في الماضي كانت الاغاني بل «الإعلام» كله يهدف للبناء، ولكن اليوم اصبحت كلمة الانهيار تتردد في كل لحظة وفي كل مكان واهم مكان صرنا نسمعها فيه مدارسنا.
بالامس كانت حصص الموسيقى لها رونقها، تتذكرون ايامها، كانت حصة الموسيقى تعد مادة اساسية، وكنا ندرس من بداية السلم الموسيقي، أمانة تتذكرون «تافاتي في تاتي والصفقة بصبعين» مو الحين اعتقد ان الشفافية هدمت السلم الموسيقي حتى الطابور صار بس السلام الوطني وتحية العلم، لا وحتى فريق الموسيقى ألغي وصار ينسمع السلام من خلال سي دي.
تتذكرون اول يوم المدرسة وشلون نقعد انحاتي منو، يشيل كل هذي الكتب، واذا نسيتوا، اذكركم، كان اول يوم دوام في المدرسة يسلمونا الكتب كلها مع بعض، لا والشغل تصفف على كيف كيفك يبدأ من الكتاب الكبير الى الصغير، وطبعا كان الكتاب الكبير أهو كتاب العلوم، وكانوا يربطونهم بحبل عشان ما ينفلت، لا وغير جذي مع الكتب 6 كشاكيل، مو الحين كل يوم ياخذون كتاب والكشاكيل على حسابكم طال عمركم، مو قلت لكم «الشفافية»، الله يرحم هذي الايام، بجد كانت حلوة برغم الحبل اللي ابد ما فيه شكل الكشخة.
تتذكرون لما كان يقول الاستاذ ان هذي الصفحات ملغية، يا سلام عيد كان عندنا، لا ونقوم بالتشخبط على الصفحات من اولها لآخرها، لا وساعات أنقوم بشق الصفحات من الكتاب عشان يصير ضعيف، مو الحين التقدم والعولمة والسياسة صارت تدخل في التعليم، بتقولي اشلون، انا اقولكم اشلون، للاسف بعض النواب صاروا هم اللي يشخبطون، على الطلاب مو بس الكتاب وهذا ينجح وهذا يسقط، الله يرحم الزمان.
وين ايام المسجلة السودة ولا نسيتوها مالت استاذ الانجليزي، ايباه كان لي دش علينا وهو شايله عرس عندنا وقمة الوناسة لأن اليوم ليسيننج يعني ما في اسئلة، وروووح سكشن فايف، ترن ترن سكشن فايف، هاي سوبر فالكون، مو الحين حصص العربي مو مفهومة وشرها على الاساتذة اللي يتكلمون لغة مو عارفين زين چان يبتوهم عشان مادة الفرنسي مو عربي، بس شنو نقول الطاسة مقلوبة، وان شاء الله يعدلها.
تتذكرون برامجنا، الله على هذه ايام افتح يا سمسم ولما كنا نقلد كعكي بأكل البسكويت لا ونقوم نسوي مثله وناكل بسرعة وتقوم الوالدة تصارخ من قمة رأسها «قطيعة شنو هالشفاحة من لاحقكم»، الله على هالايام وبالذات يوم الجمعة اللي كنا نقعد فيه من الصبح علشان نسمع اغنية عالم الشعوب تتذكرونها شنو تقول «قصائص لا تنتهي وعالم حلو بهي يسكن في قلوب في قصص الشعوب» شنو اقول، وشنو احچي، كنا نحب الفنان عبدالرحمن العقل ونروح مسرحياته السندباد والزرزور وألف باء تاء، آه خلينا نشوف شنو بيقدمون لينا بالقناة الثقافية الجديدة، اكيد كلها بتكون عن قصص التحرش الجنسي والاغتصاب والمشكلات اللي قاعدة تصير في مدارسنا، يبا قبل ما تسوون قناة عدلوا في مدارسكم قبل، بس المثل يقول المال السايب، وسلامتكم.