أكد الفنان كريم فهمي أنه لا يهتم كثيرا بمسألة تصدر اسمه على «الأفيش»، بقدر ما يركز على جودة العمل ومدى اقتناعه بالدور، وقال: «أنا سهل جدا ممكن أكون بطل في مسلسل، وأطلع ضيف شرف في مسلسل تاني، لو دور صغير عجبني ومعنديش أي مشكلة، المهم أحافظ على قيمتي الفنية والأدبية».
وعن ظهوره كضيف شرف في مسلسل «إش إش» رغم بطولته لـ «وتقابل حبيب»، أوضح كريم، في لقائه ببرنامج «كلمة أخيرة» على قناة ON: «الموضوع بدأ باتصال من المخرج محمد سامي، قال لي عايزك معايا ضيف شرف، قلتله على طول (حاضر يا سمسم) أنا معنديش حسابات البطولة والنجم الأول، أنا بشتغل علشان بحب الشغلانة مش علشان شهرة وخلاص».
وتحدث كريم عن شخصية «فارس أبو العزم» التي قدمها في مسلسل «وتقابل حبيب» وارتبط بها الجمهور، قائلا: «النجاح رزق وتوفيق من عند ربنا، مش دايما المجهود بيكفي، ممكن تشتغل وتتعب وتقدم أحسن حاجة وربنا ما يكتبش النجاح، أنا مش بعرف أفرح أوي بنجاحاتي، دايما بقول الحمد لله، وربنا اللي بيوفق»، مؤكدا أن البطولة المطلقة ليست هاجسه الأساسي.
وكشف كريم عن تردده في البداية للمشاركة في «وتقابل حبيب»، وأوضح: «بعد (ونحب تاني ليه) مكنش في كلام بيني وبين حسام شوقي خالص، وعندما كلمني عمرو محمود ياسين قلت له (أما حسام شوقي يكلمني) وقعدنا شهر محدش تواصل معي لحد ما قولت مش هعمل المسلسل ده خلاص، وبعدين لقيت حسام شوقي بيكملني ومضيت على بياض وبعدين حصل اللي حصل».
وأكد فهمي أن التوازن بين الجانب الاجتماعي والرومانسي في «وتقابل حبيب» كان محسوبا، وقال: «الناس كانت مستنية اللقطات الرومانسية، بس هي جت بجرعات محسوبة، وده زود تشويق المشاهدين، كما كشف أن النهاية السعيدة للعمل كانت متفقا عليها منذ البداية».
وعن تعاونه مع الفنانة ياسمين عبدالعزيز، قال: «كنت متخوف جدا من إعادة التعاون بيني وبين ياسمين وإن الجمهور هيشوفنا مع بعض تاني وكمان تكرار التعاون مع السيناريست عمرو محمود ياسين وغيره، ياسمين كاريزما ماشية على الأرض وعلاقتي بيها غريبة جدا، احنا صحاب أوي بس طول الوقت ناقر ونقير، وبنختلف كتير، وساعات في التصوير نقفش ونقعد أسبوع منكلمش بعض، هي نقطة تحول في حياتي، وجدعة، وبميت راجل، هي كل حاجة وعكسها».