وجه الفنان تامر حسني رسالة إنسانية إلى جمهوره حثهم فيها على تقدير الوقت والعمر، مؤكدا أن حياة الإنسان ما هي إلا عدد محدود من دقات القلب التي لا يجب إهدارها في المشاعر السلبية من الحزن والخلافات، وكتب عبر صفحته الرسمية بـ «فيسبوك»: «ربنا سبحانه وتعالى بيخلقك ويديك هديه، 5 مليارات دقة قلب مثلا لو هتعيش لـ 75 سنة أو 80، شوف بقى تقريبا أنت ضيعت منها 2 مليار ونص خلاص، طبعا كلامي على المواقف اللي في إيدينا نغيرها، فا تيجي بعد شوية تقول لنفسك أيه ده! هل المواقف اللي عيشتها دي كانت مستاهلة أضيع عليها من عمري كل الدقات دي؟».
وأضاف حسني مؤكدا على ضرورة استعمال العقل في حساب الأمور التي تستحق، قائلا: «أنت أو إنتي من دلوقتي قولوا لنفسكم، هل القصة دي أو الزعل ده أو المشكلة دي هتاخد من حياتي مثلا 20 ألف دقة قلب.. هل تستاهل؟ المقصود إنك متضيعش عمرك ودقات قلبك على حاجات متستاهلش».
واختتم رسالته: «دايما بقول إن اللي صاحي دلوقتي والكلام وصله أو وصله بعدين يبقى فعلا هو محتاج يسمع الكلام ده عشان يتقدم ويغير في نفسه لأن في حاجات حلوه مستنياه، وميبصش للماضي عشان محدش هيعرف يمشي لقدام وهو باصص لورا أكيد هيقع او هيمشي غلط، بص قدامك ركز في ورقتك وحالك مش حال الناس، مستنيك نجاح كبير روحله ومتضيعش وقتك ودقات قلبك في حاجات متستاهلش».
من جانب آخر، احتفل تامر أخيرا من خلال حسابه الشخصي على «إنستغرام»، باختيار منصة «بيلبورد عربية» أغنيته «الاحتياج وحش» كأفضل فيديو كليب لعام 2025، معبرا عن سعادته، واعتباره تقديرا مهما للأغنية، بالإضافة إلى توجيه الشكر لكل الصناع والقائمين على العمل.