- تستمر عروضها في الكويت وبعدها إلى قطر والسعودية
بشار حاسم الكندري
عاد فريق مسرحية منتزه الخيران إلى الكويت بعد ان تم عرض المسرحية في سلطنة عمان وتحديدا في مسقط وبنجاح كبير على خشبة مسرح العرفان بمركز عمان للمؤتمرات والذي يتسع لـ 3500 متفرج.
المسرحية من بطولة ماغي بوغصن وبشار الشطي وهيا عبد السلام وفؤاد علي وعبدالله عبدالرضا وإيمان الحسيني وصمود المؤمن وروان العلي ومحمد المنصوري والغالية ومشاري القبندي وأحمد العوضي وشهد العميري وهي من تأليف أحمد العوضي ومن اخراج شملان النصار.
«الأنباء» هاتفت هيا عبدالسلام بعد عودتها حيث قالت: «العرضين اللي سويناهم في سلطة عمان كانت ليلة استثنائية بصراحة أقول لك شي يعني أنا بصراحة بهالعرض المسرحي بالتحديد غير رأيي في وايد أشياء يعني شفت أشياء ما كنت أشوفها من فترة طويلة وكان النجاح شوي مختلف في العمل لأن كان فيه حب من الداخل وهذا الحب قاعد يحقق النجاح لله الحمد وأول مره اشوف بعيني بحضور 7000 شخص في ليلة واحدة كانوا حاضرين في اليوم نفسه على العرضين وإنك تشوف الجمهور على ثلاثة أدوار في المسرح نفسه ويكون فل وكلهم يرددون الأغنية ومستانسين معاك وطبيعي نستانس وياهم وتحس بالنجاح وحتى احنا كفنانين من نشوف بعض على المسرح نشعر بالفخر وكان شي من الخيال والحمد لله يا رب ونفس هالنجاح شفناه لما كنا في دبي وحاليا مستمرين في الكويت ومكملين بالنجاح الحلو وتعدينا الـ 70 عرض تقريبا».
اما النجم فؤاد علي فقال: «وايد سعيد بعرضنا في سلطنة عمان وعرضنا عرضين على مسرح العرفان وما شاء الله كان حضور جماهيري كبير والعرض الواحد كان فل والمسرح يشيل 3500 متفرج وجمهور عمان كان متفاعل جدا معانا وفرحنا بشوفتهم واندماجهم وقبلها كنا في دبي وأيضا عروضنا كانت (كامل العدد) وحاليا مستمرين بعروض الكويت وبعد الكويت عندنا جولة في قطر والسعودية».
اما النجم بشار الشطي فقال: «طبعا سعيدين وايد في نجاح مسرحية منتزه الخيران في سلطنة عمان الحبيبة وعرضنا عرضين كانوا مثل الخيال في مسرح العرفان وهو مسرح عالمي بكل المقاييس وتخيل معاي حضور 3500 شخص في كل عرض وهذا يعتبر رقم كبير جدا وشي خيالي واستمتعنا مع الجمهور العماني اللي فعلا كان ترحيبه ومحبته لنا كبيرة وكانت هذي ثاني محطاتنا في الجولة الخليجية بعد عروضنا في دبي الحبيبة وبعدها راح يكون عندنا عروض في دولة قطر وبعدها بالمملكة العربية السعودية وحاليا نكمل عروضنا في الكويت مع جمهورنا الغالي واحب اني اشكر كل القائمين في سلطنة عمان على هذا التنظيم وهذا الترحيب وهذا الحضور الرائع واشكر كل طاقم العمل من الفنانين والفنيين وما خلف الكواليس على جهودهم بأن تظهر هذه العروض بالشكل اللائق واللي من خلالها نرفع اسم الكويت في كل العروض الخليجية».