أكدت الفنانة نيللي كريم أنها تعرضت لصدمات كثيرة في حياتها الشخصية بسبب حساسيتها المفرطة، وقالت: «الشغل عمره ما كسرني، لكن حياتي الشخصية هي اللي كسرتني، لأني أنا بطبعي شخص حساس جدا وبتأثر جدا».
وأضافت نيللي، في تصريحات تلفزيونية: «في مواقف صعبة كتير تعرضت لها في حياتي.. وكنت أوقات كتير بيأس وبقول هرجع تاني إزاي؟، واللي خلاني أقف على رجلي تاني هي أمي، لأنها شخصية قوية جدا ودايما رافعة شعار لا تراجع ولا استسلام، دائما كانت تقول لي اشتغلي واخرجي من اللي انتي فيه، وبعدها اكتشفت إنه الشغل مهم جدا، والأهم إن صحابك الي حواليك يكونوا بيحبوك من قلبهم دي أكبر نعمة».
وعن كيفية دخولها إلى عالم التمثيل، قالت: «دخلت التمثيل لوحدي، كان في مرة كنت مشاركة في حفلة من حفلات التلفزيون وبقدم عرض باليه، وشافني المخرج يحيى العلمي، وقال «إحنا بندور على حد جديد يعمل الفوازير وفعلا في السنة دي كلموني عشان أعمل الفوازير وساعتها كنت حامل واعتذرت، كلموني السنة اللي بعدها فشاركت في الفوازير بالفعل وعملــــت 15 حلقة، والفنانة ياسمـــــــين عبدالعزيز عملت الـ 25 حلقة الأخرى».