- النويبي ييمته صلاخ الميد والچنعدة تييبها بالتشخيط
عشق الخيط وزفرة السمجة حتى الجنون، أغرم بصيد المحادق الشمالية والجنوبية والأسياف، اكتسب الخبرة على يد نواخذة كبار، صفحة «بحري» تلتقي بالحداق احمد السعيد الذي حدثنا عن بداياته البحرية ومتى يبين النقرور والشماهي وأفضل ييمة للفوز بالشعوم الراهية وأفضل وقت يحضر فيه السبيطي ومتى موسم الهامور وأماكن تواجد أسماك الشيم والنقرور.
كما أطلعنا السعيد على أفضل رحلة صيد كانت له وأين يوجد الچنعد وأفضل طرق صيده وشرح طريقة الصيد بالركَّه والعلّاق ومعلومات بحرية مميزة تجدونها في هذا الحوار، فإلى التفاصيل:
بداية: تولعت بحب البحر والخيط وزفرة السمجة من يوم كنت صغير وكان الوالد يطلع مع ربعه ويرد البيت يجيب الصيد معاه فكنت اشوفه ومع الايام اقوله يعلمني ويوديني معاه وبلشنا نروح اول شي الاسياف منها اسياف الفنطاس والواجهات واسكلة شرق هي اول بداياتي بالحداق وبلشت احب الحداق واسوي عدة خاصة لي واروح بروحي او مع مجموعة من الربع منهم ولد عمي وعيال خال الوالد ومع ربع الوالد واكثر الامور التي تعلمتها هي حسبة الماياة والموادع والترديع واشلون اعرف السيف اللي عليه صيد وشنو ييمة كل سمجة بالصيف والشتاء وشنو تحتاج سمجة الشمال والجنوب واشياء بحرية اخرى كثيرة حتى اصبح البحر بيتي الثاني وهواية الحداق عشقي.
النقرور صيده بالدفان
ويضيف: النقرور يبين على شهر أبريل تقريباً وصيده يكون بالدفان والاقفاص وعوهة والركسة ويتواجد بالغزر شوي واكثر شي بالشمال واماكن معينة، وبالنسبة للشماهي وفرخ شماهي يتواجد بالشمال والجنوب وانا شخصياً صايده بالجنوب بأقواع الفنطاس ويتواجد اكثر شي بالغزر امثال الأقواع الشمالية التي فيها غزر صوب القفاصة والطبعانات وعوهة.
المزيزية والشعوم الراهية بالشمال
ويتابع: الاماكن التي بها صيد كثيرة وحالياً بموسم الشتاء هذا الصيد يبين بأول الجون مثل الدفان وقوعة الابراج والركسة وطبعانة ام الفحم وبكل الجون تقريباً غير الاماكن الممنوعة واتمنى ان يفرجونها علينا ويفتحون الجون، وبالنسبة للسمكة المتوفرة حالياً بكثرة المزيزي والشعم والبواليل والنويبي والمجوة والوحر والخوفعة وبالنسبة للنويبي ينصاد اكثر شي بالغزر ويتواجد بجميع اماكن صيد الشمال وبالنسبة للمزيزي والشعم متواجدين حالياً بكثرة بالشمال والاحجام الراهية بالرق وبالنسبة للغزر تتخالط السمكة اللي ذكرتها.
السبيطي يبين مع رشة المايه
ويضيف: السبيطي كل حداق يحبه ويتفاخر فيه والكل يتمناه وصيدته تكون بالخبرة والذكاء وانا شخصياً طول مسيرتي بالحداق والبحر صيدته مرة وحدة واتمنى اني اصيده مرة ثانية ويتواجد اكثر شي عند الاسياف واماكن الرق ونادر ماتحصله بالغزر وطريقة صيده تختلف حسب المكان حسب الوقت وحسب القوعة او السيف الذي يتواجد فيه وغالباً يبين مع رشة المايه وافضل حجم خيط له من50 - 55 وتكون ركة طويلة وميدار من 01 - 06 والميدار على حسب الييمة وطبعاً الييمة تفرق هم من مكان الى مكان ثاني ويحتاج للفوز به الهدوء والموادع الصحيح.
الشعم والهامور
ويقول: الشعم موسمه الشتاء والصيف واكثر شهر يبين فيه مايو بعوهة والرشدان والحيشان بس بالشتاء يتكاثر وتحصله بالغزر والرق يجيك كبير بس موكثر عدد الغزر، ييمته المفضلة بالشتاء هي الربيانة والمصير وبالصيف ييمته الاساسية الشريب والربيانة ويضرب على المصير والخيط يكون من 27 - 45 وافضل الماياة دورة الثبر، والنسبة للهامور طبعاً مايته بالغزر ويتكاثر بالطبعانات يتواجد بالجنوب والشمال واكثر مكان يتواجد فيه الطبعانات وافضل اوقات صيده يكون بوقفة الماية وييمته تكون ربيانة كاملة او ميده او صلاخة ميد وجم صغير او مجوة والخيط 60- 100.
كل محدق له مايه وييمة
واضاف: الاماكن التي اروحلها اغلبها محادق الشمال قبل بالرشدان والحيشان اما الحين احدق بمحادق التي خارج المنع مثل الدفان والركسة والابراج وكم قوعة معينة وبمحادق الجنوب عندي اقواع الفنطاس ويتوفر فيها الشعم والفسكر والسبيطي والبواليل والشعاري طبعاً كل محدق له مايته وييمته.
النويبي والشيم
وقال: النويبي اماكنه معروفة البوية الصفرا والركسة شمالية والجنوبية والدفان صوب المداخن وطبعاً ييمته المفضلة صلاخ الميد والربيانة والزوري والمنجوس، وبالنسبة للشيم له اوقات معينة بالصيد مثل شهر مارس وأبريل ومكان معين طول السنة ويكثر صيده في قطعة الدردور وفي قوعة معينة في عوهة ويتواجد بأكثر من مكان وييمته المفضلة المحاياة مثل ميدة يميامة مجوة يعني السمك الصغار.
رحلة صيد لا تنسى
ويضيف: افضل الطلعات تكون مع اخواني حمد العبيدان وعبدالعزيز السعيد وعبدالله الانصاري من احلى الطلعات والصيد معاهم.
اخر رحلة طلعت فيها قبل شهر تقريباً صدنا فيها حدود٦٧ شعم و٥ مزيزية و٣٠ نويبية كبار وكانت الطلعة بطراد النواخذة علي العبدالهادي وخالد العلي درازي حجم ٢٧ قدم ورحنا قوعة حوالين مداخن الصبية والبوية الصفرا وكانت على ماية الثبر والطلعة بدأت من الـ ١٠ صباحا وحتى الـ ٥ عصرا. فعلا رحلة لا تنسى ابدا.
صيد چنعد الشتاء بالتشخيط
وأكد ان: صيد الچنعدة اكثره يكون بالجنوب وعن طريق التشخيط واللفاح وحالياً في طريقة جديدة يستخدمونها الشباب اسمها (جق) يكون الطراد واقف وينزلون شغلة نفس الميرور، واكثر الاماكن التي تتواجد فيها بالفنطاس وجزيرة كبر وقاروه وام المرادم، وبالنسبة للفسكرة موجودة بأماكن كثيرة بأسكلة المركز العلمي والخيران وصوب أسياف الفنطاس وقوعة الفنطاس وييمتها بالصيف تضرب على الشريب والربيانة وصلاخة الميد وبالشتاء تضرب على الربيانة وتمتاز بطعمها الحلو ونشاطه وقت الصيد.
طريقة الركّة والعلاق
ويضيف: افضل طريقة بالصيد هي الركة واستخدمها تقريباً في جميع اوقاتي بالصيف او الشتاء وجنوب وشمال وفي بعض اوقات وقفة الماية استخدم مثلاً للنويبي طريقة العلاق بميدارين او ميدار واحد والركة العادية تكون بميدار وبلد حق صيد اسماك البواليل والهوامير والنويبي، وبحداق السيف تكون ركة مع مدور وبلد خراري وميدار 01 ونازل على حسب السمجة واذا موجود السبيطي احرص على الييمة الطرية مثل الزورية والسلس والمصير.
ختامية
واختتم السعيد قائلا: اكثر الاشياء اللي تضايقني قلة المسنات وزحمتها وبالصيف يضايقنا الجت سكي وبعض الشباب يتعمدون انهم يقربون ويضايقون الحداقة، وفيه بعض من الحداقة ربي يهديهم يمر عليك بسرعة عالية وانت طارح ويجيك الموج يعفسك فوق تحت، وايضا رمي العلب والاكياس الفارغة بالبحر وهذا التصرف غير اخلاقي مسببا مناظر غير حضارية وفي الختام أتمنى الصيد والسلامة للجميع.