أنوارعبدالرحمن
إذا كانت الجائزة المقدمة (1000) دينار مقابل الفوز في مسابقة للتصوير، فإن هواة التصوير سيبذلون ما في وسعهم لنيل تلك الجائزة.. و( من طمع.. طبع)!
- يبا.. يبا شوف هالصورة؟
شنو هذي؟.. منو صورته؟
- صورة ريال واقف يم سيارته جدام البحر وقاعد ياكل ويقط الوسخ.. جم مرة اكتبوا بالجرايد والتلفزيون لازم نحافظ على بيئتنا
وشكو أنت؟.. ولايكون قاعد اتصور فضايح الناس؟!
- أي.. لازم انجكهم وهم في حالة تلبس.. وهم يشوهون منظر الكويت
وانت اش لك شغل بهالسالفه؟.. يمكن باجر احد يشوفك ويبهدلك.. محد يرضى.. وإلا يمكن يحسبك تصور بناتهم حق مآرب أخرى
- يبا.. انا غايتي أكبر من جذيه.. مالي شغل في بنات خلق الله.. انا الكاميرا الخفيه اللي تلقط هالاهمال والتسيب وال
اسكت بس اسكت.. كلام فاضي.. إن ما بطلت سالفة هالتصوير.. براويك شغلك.. احنا وين قاعدين بأمريكا صاير لي كاميرا خفية.. باجر بطيحون عليك الناس.. وعينك ماتشوف إلا النور..!
- يبا.. ليش هالاحباط؟
اسمعني زين.. دور لك شغل ثاني.. إذا عندك هواية التصوير.. صور لك قطوة وإلا طوفة.. وإلا حتى حشرة.. أبرك لك.. لا اسمع في يوم ماسكينك وغاسلين اشراعك.. لأني بهالحالة ماراح أتدخل.. وقد أعذر من أنذر!
- يبا.. أنت اللي اسمعني.. في جريدة حاطة مسابقة للتصوير.. للمشاهد السلبية والايجابية في المجتمع.. وعليها جائزة مبلغ 1000 دينار
1000دينار؟!!... يه يه يه.. على مسابقة تصوير؟!!
- إي يبا.. عشان جذيه شاد حيلي.. وصرت مثل الكاميرا الخفية.. لأني لازم أصور المشاهد السلبية بهالطريقة.. لأنهم يخربون ديرتنا الحلوة
امممم وأنا أبوك.. الـ 1000دينار هذي زينة.. عشان افتك من مصروفك لمدة سنة!
- يباااا.. من صجك؟!.. آنا إذا بفوز بالـ 1000 دينار هذي بشتري فيها أشياء افبالي
شوف عاد.. عن الربربة.. تبي تقطهم على خرابيط؟.. بس السالفة اني خايف عليك.. محد يرضى ياوليدي اتصوره
- عيل شسوي يايبا.. عندك حل ثاني؟.. لازم ادخل المسابقة واحقق طموحي وأفوز بالـ 1000دينار.. يبا.. هذولي 1000 مو شوية صدقني.. لازم أسوي المستحيل عشان أفوز فيها، 1000 يا يبا فكر فيها!!
انزين.. انزين فهمت..!!.. أدري انهم مو شويه.. قاعد اتوسوس لي مثل ابليس اعوذ بالله منه!.. امممم لازم انفكر بحل
- لقيتها يبا.. لقيتها..
قول.. قول
- بس أخاف اتخانقني؟
قول.. ماراح أخانقك.. احنا في اجتماع سري ومحترم
- يبا اشرايك.. أصورك انت.. اتسوي نفسك قاط وصخ وإلا اتشخبط عالطوفة وإلا أي شي ثاني.. عالاقل نظمن سالفة الصورة السلبية.. ومحد يرفع علي قضية وإلا يغسل اشراعي مثل ماقلت
بس.. يا وليدي.. لو ربعي اللي بالديوانية شافوا صورتي ماتسوى علي.. بصير مسخرة عندهم
- يبا.. منو اللي من ربعك يتابع هالسوالف؟!.. هذولي حدهم.. كوت بوستة.. وسوق السمج!.. يبا فكر بالفلوس مو ابربعك
امممم خلاص.. أمري لله.. بس شوف عاد إذا السالفة جذية.. الألف تصير بالنصيفة بيني وبينك
- امممم .. صار!
استر علي يارب
شي ماشفتوه:
- وقف عندك.. موعيب عليك ريال اشكبرك اتشخبط على طوفة مدرسة؟!
- منووو؟؟؟... الشرطة!