فاطمة الطباخ «راسها يابس» في «تو النهار»

مفرح الشمري بعد النجاح الذي حققته الاعلامية والممثلة فاطمة الطباخ في مسلسل «ساهر الليل» الذي عرض في شهر رمضان الماضي على شاشة تلفزيون «الوطن»، تشارك هذه الايام في مسلسل «تو النهار» الذي كتبه جاسم الجطيلي ويخرجه محمد دحام الشمري في دور رئيسي مختلف عن دورها في «ساهر الليل» يحمل بين طياته الكثير من المفاجآت والمتناقضات للمشاهدين، على حسب قولها. واكدت الطباخ في حديث مع «الأنباء» ان نجاح دورها في «ساهر الليل»، حملها مسؤولية كبيرة للمحافظة على مستواها الفني الذي وصلت اليه في الفترة الحالية، فإلى التفاصيل: فاطمة، من «ساهر الليل» الى «تو النهار»، شلون تصفين نفسچ؟ (تضحك)، في «ساهر الليل» كنت انسانة امية وفقيرة ومسكينة ولله الحمد المشاهدون احبوني من خلال هذا الدور، لكن في «تو النهار» انا انسانة غير بكل ما تحمل هالكلمة من معنى. شلون؟ راح تشوف الويه الثاني لفاطمة الطباخ بهذا المسلسل، راح تشوف وحدة «راسها يابس» وصريحة والكلمة اللي بقلبها على لسانها ما تخاف من احد، ووحدة تحب امها اكثر من ريلها، بس الدور عجيب، وانا اشكر المخرج المبدع محمد دحام الشمري انه اختارني لهذا الدور. بس انتي للحين ما قلتيلي شنو دورچ بس عطيتيني اوصافه. دوري دكتورة. صچ والله؟ ايه والله، بس دكتورة عجيبة وباسها قوي وتعامل الناس بعفوية وتلقائية وصريحة لأبعد الحدود. ومنو امچ اللي تحبينها اكثر من ريلچ؟ الفنانة القديرة طيف. شلون لقيتي الايام الاولى لتصوير المسلسل؟ وايد حلوة، وانا بصراحة احب اشتغل مع المخرج محمد دحام الشمري لأنه مخرج منظم لأبعد الحدود وعنده ادارة انتاج ما شاء الله عليها تشتغل باخلاص. وشخبار الاذاعة؟ ماشية وعندي كذا برنامج فيها مثل برنامج «شباك تذاكر» مع المذيعة نادية ياسين في اذاعة البرنامج العام بالاضافة الى برنامجين في اذاعة البرنامج الثاني «من هنا وهناك» و«حرار» مع زميلي عبدالله الانصاري.