جاسم العبوه لـ «الأنباء»: تمنيت أن أقدم برنامج «خواطر».. وأتابع مسلسلات خليجية

بشار جاسم يتميز المذيع جاسم العبوه بابتسامته وتلقائيته على شاشة «الوطن» من خلال تقديمه لبرامج مختلفة، فكان المشاغب في «واتس اون» والمحاور الجاد في «صباح الوطن». ولجاسم العبوة طموحاته ورأيه الخاص في العديد من الأمور التي تحدث فيها أثناء لقاء «الأنباء» معه، واليكم تفاصيل الحوار: كلمنا عن عودة برنامج «صباح الوطن»؟ ٭ بداية احب ان اشكر ثقة تلفزيون «الوطن» اني اكمل لـ «السيزن» الثاني بـ «صباح الوطن»، وأتشرف بالعمل مع طاقم مبدع ومجموعة مميزة من المعدين والمذيعين، وبالنسبة لي أشوف انه «صباح الوطن» برنامج مميز لأنه يستقطب فئات عمرية مختلفة ويطرح مواضيع متنوعة، واني أكون جزءا منه هذا شي أفتخر به. كلمنا عن التغييرات الجديدة بالبرنامج؟ ٭ بالموسم اللي طاف كانت لي فقرة بروحي اللي اهي فقرة «مهنة» نتعرف من خلالها على وظايف مختلفة، وكانت فقرة خفيفة وحلوة لأنها أتاحت لي فرصة أشوف واجرب وايد وظايف، وهالموسم غيرنا من باب التنويع وتخصصلي فقرة «الاتيكيت» اللي تتكلم عن آداب الأكل والشرب والمشي ووايد أشياء ثانية تتعلق بالذوق العام، بالنسبة للبرنامج بشكل عام تمت اضافة فقرة متعلقة بالفاشن وفقرة لايف ستايل وفقرات ثانية متنوعة. وين برنامج «وتس اون» ليش توقف رغم نجاحه؟ ٭ كل إنسان يحب يطور من نفسه ويمشي بطريج يديد يكتشف فيه أشياء مختلفة، ولهالسبب عمر اختار طريج الإذاعة، تدري التنويع ضروري عشان تكتسب خبرة، طبعا أتمنى له كل التوفيق ويمكن نرد بالمستقبل كل شي جايز. مو شرط.. «بنات وبس» كانت تقدمه حصة وزينة وصار لحصة واستمر.. ٭ بالنسبة لي برنامج «صباح الوطن» والنقل المباشر كان خطوة كبيرة ومع الوقت صار صعبا انك تجمع برنامجين لأن «واتس اون» كان يتطلب ان أسافر وايد و«صباح الوطن» يتطلب نقلا مباشرا، وبرنامج «واتس اون» انشهر لأنه فيه ثنائي جاسم وعمر ووجودنا مع بعض اهو اللي ميز البرنامج. دخولك بانتخابات احدى الجمعيات ما يشتتك؟ ٭ هالخطوة صار لي سنين افكر فيها ولما سمحتلي الظروف أقدمت عليها، وللأمانة موضوع انتخابات الجمعية يأخذ من وقتي بس إن شاء الله في حال وصولي لمجلس ادارة الجمعية راح تكون الاجتماعات أو ضرورة تواجدي بالجمعية اما العصر أو المغرب، وعندي «صباح الوطن» الصبح يعني ان شاء الله ماكو تعارض، ولأنهم منفصلين ما احس انه هالشي يشتتني وأتمنى أكون قدها. شرايك بظاهرة المذيعين الممثلين؟ ٭ شخصيا أنا افضل انه الواحد في المجال الإعلامي يركز على شي واحد، يعني يا مذيع أو ممثل، بس مثل ما قلتلك من قبل كل شخص يطمح حق شي معين ويبي يطور من نفسه، ويمكن في منهم شاف انه التمثيل خطوة إيجابية له أو كان هواية وحب ينميها، هذي آراء واختيارات شخصية بالنهاية وكل شخص عارف قدراته. منو يعجبك فيهم؟ ٭ الصراحة أنا مو من متابعين المسلسلات وما اقدر أقولك من عجبني أو منو احسن من الثاني. هل لو عرض عليك تمثل؟ ٭ لا، مثل ما قلت من قبل اني أفضل اركز على التقديم فقط. برنامج تطمح انك تقدمه؟ ٭ أكيد كل مذيع يطمح يكون عنده برنامجه الخاص وكان ودي يكون لي برنامج يفيد الناس ويعطيهم معلومات بس بنفس الوقت يكون ممتعا، إن شاء الله يتحقق طموحي واقدر اعطي برنامج حلو. منو المذيع رقم واحد بـ «الوطن» من وجهة نظرك؟ الكل فيهم الخير والبركة وكل مذيع فيه شي يميزه. برنامج عربي تمنيت انك تقدمه؟ ٭ من احب البرامج عندي واللي احرص اني أتابعها دايما اهو برنامج «خواطر» اللي يقدمه احمد الشقيري، وكنت أتمنى اني اقدم معاه أو اني اقدم برنامجا بقوة برنامجه. «راديو الوطن» ليش ما عندك برنامج فيه؟ ٭ في بدايات «راديو الوطن» تم تقديم فكرة وتسجيل حلقة «بايلوت» بس الله ما كتب نكمل وبعدين اتجهت لـ «صباح الوطن» وخليت كل تركيزي فيه والحمد لله.