بشار جاسم
نواف القريشي فنان موهوب له العديد من الاعمال، لكنه ينتظر المخرج او الفرصة التي تبرز مواهبه لأنه ضد التطبيل للمخرجين والمنتجين على حسب قوله.
«الأنباء» التقت نواف ودردشت معه بالعديد من الامور المرتبطة بالمجال الفني واليكم تفاصيل الحوار:
نواف انت بديت بمسلسل «جرح الزمن» سنة 2001 للحين ما خذيت فرصتك ليش؟
شوف انا شخص لا راعي مشاكل ولا شي، ولو تسأل اي واحد باللوكيشن وانطباعه عني راح يقولك اني ملتزم واحفظ النص ولا عندي عداوات.
عيل وين المشكلة؟
المشكلة مو مني انا، لأني ما احب اطبل حق المنتجين ولا اترزز في شركات الانتاج، والكل يعرف رقم تلفوني.
مو كل الممثلين يطبلون حق الممثلين.
انا اتكلم عن نفسي يعني انا عندي موهبة، والادوار والفرص من رب العالمين.
يقولون ان نواف دائما ياخذ دور البديل، يعني اي واحد يعتذر يتم ترشيحك.
هذا الكلام مو صحيح، وممكن في بداياتي بسنة 2000 تقريبا، لكن حاليا مستحيل وما اقبل في هالشي.
قدمت دور حلو في «صاحبة الامتياز» وهو دور المعاق وبنفس الوقت كنت مخرج منفذ فشلون نسقت بينهم؟
مسلسل «صاحبة الامتياز» له فضل كبير عليّ واساسا ما كان في دور شخصية المعاق، وكنت بوقتها المخرج المنفذ لأني كنت حاب اجرب عالم الاخراج واحنا نصور بأحد اللوكيشنات كان وقت الحلقة ناقصا، واقترح المؤلف سعد الدهش والمنتج نايف الراشد ان يكون في حدث جديد بالعمل وهو بيت لمياء طارق، ويكون لها اخ معاق وانا داش في اللوكيشن وشافني المخرج والمنتج رشحوني لهذا الدور وقالوا لي ما في احد غيرك يمثله، وبالفعل رحت لنادي المعاقين وشفتهم وقعدت معاهم بالاضافة الى اخو رفيجي كان معاق واخذت الكاركتر منهم، والحمد لله الدور نجح واهوا اللي كان سبب شهرتي.
طيب عقب هالدور قدمت دور بسيط مع فرح بسيسو في مسلسل «بين الهدب دمعة».
«بين الهدب دمعة» صورته قبل «صاحبة الامتياز» لكن انعرض في قناة غير مشاهدة وبعد اعادته الحمد لله اخذ المسلسل نسبة مشاهدة عالية ودور كان مميز، والناس تذكره.
تفاصيل الحوار في ملف ( pdf )