بشار جاسم
عرفناه من خلال بعض الدعايات وخصوصا «عطوني عيدية»، حيث اشتهر ببراءة وجهه وضحكته المميزة والكاريزما العالية والتلقائية، حيث كان عمره 5 سنوات والآن 16 سنة.
«الأنباء» حاورت ضاري الرشدان بحضور والده وحاورناه بالعديد من الأمور وعن سبب ابتعاده وتغيير شكله والعديد من الأمور الفنية... وإليكم التفاصيل:
ضاري وينك مختفي عن الساحة الفنية؟
٭ انقطعت بسبب الفئة العمرية للدور أو للدعايات كأطفال وخصوصا سن المراهقة وخصوصا في ناس بالوسط الفني تخرب عليك وما تبيلك الخير.
وضح لي اكثر.
٭ يعني بعض المنتجين يكون اسمي موجود لعمل معين وينشال بدون لا ادري وساعات اتفق على دور واكتشف انهم بلشو بتصوير المسلسل بدون لا ادري...
يمكن لأن شكلك تغير وكبرت بالعمر.
٭ جايز ويمكن ان الأدوار ما تبي هالعمر بالذات.
الحين چم صار عمرك؟
٭ حاليا كملت الـ 16 سنة.
العمر كله.
٭ تسلم يا خوي.
يمكن الستايل اللي انت مسوية مكبرك نوعا ما خصوصا الشنب الكثيف غير ملامحك.
٭ يعني أنا بعمر الـ 16 سنة أكيد بيكون لي ستايل معين وحاليا الشنب يعتبر موضة وبالفعل الكل يقول لي شكلك متغير.
متى بلشت بالمجال الفني؟
٭ بلشت بسنة 2007 وكان عمري بوقتها 5 سنين وشاركت في أوبريت فريج الخير وبعدها بسنة شاركت بمسلسل الهدامة إلى أن شاركت بالعديد من الدعايات للبنك الوطني ومن خلالها انشهرت.
منو اللي اختارك للدعايات؟
٭ أول دعاية لي واللي كانت سبب شهرتي هي للبنك الوطني (عطوني عيدية) واللي اختارني هيثم الحجي والمخرج خالد الرفاعي وكانت اكثر دعاية حبوها الناس.
لما تشوف الدعاية حاليا تضحك وتستغرب؟
٭ طبعا اضحك وايد لأني كنت صغير وكنت شيطان لكني وايد افتخر باللي سويته لأن الناس حبوني وايد ووين ما أروح يتصورون معاي ومحبة الناس نعمة من الله..
شنو المسلسلات اللي شاركت فيها بعد شهرتك بالدعايات؟
٭ الهدامة والجدة لولوة قرمش تذكرة داود وأم البنات كنت وايد صغير.
هل صحيح انك كنت راح تشارك بمسلسل «زوارة الخميس» وتم استبعادك؟
٭ اي نعم كنت المفروض اني أشارك وامثل دور حفيد أمي الغالية وأستاذتي الفنانة القديرة سعاد عبدالله ولكن قبل لا يبلشون التصوير استبعدت من ناس معينة.
شنو الشي اللي ما حبيته بالمجال الفني؟
٭ ما حبيت نظرة الناس للفنان ان الممثل مجاله مو زين وأنا أشوف العكس وان احنا نمثل بلدنا الكويت ونفتخر، وهالشي لمسته لما أسافر خارج الكويت وأشوف اخوانا الخليجيين يتصورون معاي وحابين أعمال الكويت وهم حابين الدعايات.
وين ناوي تدرس بعد مرحلة الثانوية؟
٭ والله أنا كنت وايد محتار وودي ادخل كلية الحقوق لكن هالشي راح يتعارض مع موهبتي وقررت اني بإذن الله ادرس بالمعهد العالي للفنون المسرحية علشان اكون ممثل أكاديمي.
والد ضاري: «مدراء الإنتاج اهما اللي خلو ضاري يبتعد»!!
أثناء حواري مع ضاري كان متواجد والده حيث لاحظت عليه استياء بسبب ابتعاد ابنه ضاري عن الساحة الفنية وعندما سألته فتح قلبه لي وقال:
أنا مستاء جدا من مدراء الإنتاج لبعض المسلسلات وساعات نروح نوقع عقد لدور معين وبعدها يكشتون فينا أو بالأحرى يستبعدون ولدي ضاري من العمل وبدون أي سبب ومدراء الإنتاج يوصلون كلام غير صحيح للمنتج أو المخرج وتكتشف انهم بلشو بتصوير المسلسل والدور طار لطفل آخر، وأحيانا مدراء الانتاج يقولون ضاري عنده عمل ثاني وما نقدر نجيبه رغم انهم يقدرون ينسقون له بين اكثر من عمل وغلب الفنانين يصورون اكثر من عمل.. وأنا أطالب كل المنتجين وأقول لهم ديروا بالكم من بعض مدراء الإنتاج وتلاعبهم سواء مع ضاري وغيره.