الرشود: السبيطي يضرب أول الثبر وأول السجي

«أباري الحظور وأفوز بالصبور» كلمات صغيرة كان لها وقع كبير في نفس حداقنا محمد الرشود فقد عشق البحر والصيد من ضربة «فريالة» و16 إبرة تلقاها في المستشفى، حادثة الفريالة جعلت منه اليوم حداقا ذا خبرة لا يستهان بها، صفحة «بحري» استرجعت معه ذكريات الطفولة ونشأته في عائلة بحرية من كبيرها حتى صغيرها. فتعال أخي القارئ لنتعرف على حداقنا لهذا الأسبوع وندخل معه في حوار به معلومات قيمة تحمل إثراء لثقافة الحداق. بداية يقول الحداق محمد الرشود: شوف نحن عائلتنا كلهم أهل بحر ونحن من سكان حي الوسط، وجدي يمتلك حظورا في شرق أمام المستشفى الأميري وكانت بدايتي أباري الحضور مع الوالد وعمامي وكان عمري وقتها 9 سنوات وكان الصيد كثيرا من صبور وشعم وميد وسبيطي، واذكر أول مرة صار لي حادثة بالبحر كنت داش الحظرة مع الوالد وما كنت لابس البوت ودست على فرياله وانتفخت قدمي والوالد ذهب بي للمستشفى الأميري وغزوني 16 ابرة تقريبا ومن بعد هذه الحادثة تولعت بالبحر اكثر واكثر، وكنا نذهب مع الوالد نحدق على سيف الزور وصيدنا شعم ومزيزي وسبيطي والصيد متوافر في ذلك الوقت واول سمكة صدتها عالسيف كانت حاسوم ومع الأيام كبرت واشتريت طرادا صغيرا وبدأت أذهب مع صديقي مرزوق الأذينة بطلعاتي للحيشان والرشدان والفنطاس والمسيلة. أفضل ييم لصيد السبيطي ويضيف: السبيطي أفضل ييمة له بدون منافس هي النقاقة من يشوفها يضربها واذا موجود السبيطي وقاط نقاقه تصيده يعني تصيده ما يقاومها، طبعا النقاقة نصيدها عندما الماية تطيح نحصلها تحت الصخر مع الشرايب وطريقتها انقص راسها وتسلخ جلدها وتشوحها وعندك المصران ممتاز بس لازم المكان ما في نويتش لانه يطيرها عكس النقاقة عرده وما يطقها النويتش، وعندك السلس ممتاز والزورية الحية والميتة والزورية الحية لها شكات معينة في ناس تشكها من ظهرها، وفي ناس تخيطها بالميبر من ذيلها وتطلعها قبل راسها من تحت الجلد والسبيطي يضرب أول الثبر وأول السجي. حجم الخيط ويتابع الرشود: حجم الخيط يعتمد بالدرجة الأولى على المكان اللي تحدق فيه اذا المكان رملة وطينة أحدق له بخيط ناعم 35 أو 40 لا يقصه السبيطي بسرعة واذا مكان صخرة نحطله خيط 60 وفوق واذا مكان طبعانة وسيام وصياخ نحطله 80 واحسن شي انا أحطله ركه باعين وميدار صفر6. نصائح واحتياطات قبل رحلة الصيد ويضيف: انصح الشباب اذا فكر يطلع اول شيء يتأكد من الجو وحالة البحر ومن سلامة المكينة ويتأكد ايضا من اغلاق المقر وتكون معاه كمية من البنزين احتياطية، ويكون معه ملمص ثاني احتياط، اذ انقص الملمص، والأهم الماي الزايد ضروري جدا ويتأكد ان السباحات موجودة وان يملأ خزانات الطراد حتى لو المكان الذاهب إليه قريب ويتأكد من تلفونه فيه شحن ويأخذ معه شاحن واذا كان هناك تلفون ثان احتياط احسن، ويتأكد من الاجهزة الملاحية من قارمن والبلاد والديره ويأخذ نفيقيشن ثاني احتياط يشتغل على البطارية، وقبل لا يطلع يبلغ احدا من ربعه او اهله عن مكانه واول ما ينزل من المسنة يشوف الديره كم ويسجلها عشان لا ينسى واهم شيء اذا بيروح مكان اول مرة لا يروحله بالليل لازم نهار عشان يشوف عدل وبعد ما يرجع انصحه يشغل ماكينته بماي حلو ويرش العربانة والتواير بماي حلو عشان لا تصدي. مواسم صيد الاسماك يقول: مواسم صيد الاسماك بالنسبة للهامور والبالول اصيده تشخيط من شهر يونيو لغاية شهر ديسمبر ويكثر في شهري اكتوبر ونوفمبر وهو موجود في أشهر مارس وابريل ومايو ولكن القصيع كثير وما تقدر تشخطله، واما بالنسبة للسبيطي والمزيزي على حسب المكان بالدفان اصيده في أشهر فبراير ومارس وابريل وبالحيشان من شهر مايو لغاية آخر نوفمبر ويكثر في شهر اكتوبر، وشهر ديسمبر ويناير تصيده على ربيانه بأطيان الصبية، اما بالنسبة لشعم الرقوق فأصيده من شهر مايو لغاية شهر نوفمبر على الشريب أما بالنسبة للشعم الأزرق من شهر ديسمبر الى شهر مارس اصيده على الربيانه السعودية الخضراء، اما الشعم الاصفر ابو صر فينصاد بالغزر بدفان والركسة على مصران وربيانه من شهر مارس لغاية شهر مايو ومن شهر اكتوبر لغاية شهر ديسمبر ويبي ركه طويلة، اما بالنسبة للنقرور فأحسن وقت شهر ابريل ومايو وانا عن نفسي لا احب حداق النقرور لانه مزعج ويخلط معاه كثير من سمك الچم اما بالنسبة للنويبي من شهر مايو لغاية شهر نوفمبر فتصيده بالركسة على خثاق وصلاخ وبالحيشان يكثر بشهر اغسطس لغاية شهر نوفمبر يُصاد على الزورية وتكون نويبية الحيشان معروفة كبيرة وحجمها عود، أما بالنسبة للشيم فيُصاد من شهر يونيو لغاية شهر سبتمبر بالدردور على يميامة حية أو ميدة وبالحيشان بين شهر سبتمبر وأكتوبر على زورية حية تُصاد ورا البوية الصفرة بالخيوسة اما بالنسبة للجنعد فيُصاد بالدوحة صوب المزارع شهر اكتوبر ونوفمبر على مجوه حية طفاحي. صيد النويبي قبل طيحة الشمس ويضيف: بهذا الوقت اكثر سمكة حاضرة الشعم والنويبي، اما بالنسبة للنويبي بين المسيان قبل طيحــــة الشمس بساعة اول الثبر وسماري اذا حضر تحتك راس تصيد منه كمية طيبة وما يروح عنك الراس لانك قاعـــــد تسمر معاه وهو تحت يمشي وانت تمشي مع المايــــه وتصيده على علاق خيط 50 وميدار صفر 3 وربيانــــة مقشرة اما بالنسبة للشعم هالأيام يُصاد بأطيان الصبيــــة مقابل مداخن الصبية بحر5 أول السجي لازم تضع اكثر من خيط، انا عن نفسي اقطّ 8 خيوط واقعد ساعة ما يبين شي متى يبين واحد اسحب خيوطك وخلك على خيطين لان يحضر عدل وما تلحق ويكون الراس تحتك وتصيد منه لما تشبع ويبين اول الثبر بعد على بحر 8 يبيله خيط 30 وميدار رقم 3 وقص الربيانة 4 قطع. صيد 18 «مزيزي» بساعتين ويضيف: الرحلات التي قمت بها كثيرة ولكن افضل رحلة صيد كانت مدتها ساعتين وكنت طالع بروحي وكانت الساعة الرابعة عصرا وذهبت الحيشان وحزتها توفقت وصدت 18 «مزيزي» وكان الصيد هذا بساعتين فقط وترى الحيشان كلها رقوق والغشيم لازم يدعم بالرق والذي لا يعرفها لا يدخل لها، ومن افضل الرحلات الاخرى كانت مع صديقي حبيب الشمالي بالحيشان شهر فبراير صدنا 97 «شعم» ومن افضل الرحلات كانت تشخيط هوامير طول اليوم ما صدت ولا شي ومن وقفت المايه الساعة 4 العصر السنانير ما توقفت وصدت 8 بواليل كبار بنص ساعة تقريبا غير اللي أفلت من خيطي.