العجمي: الچنعد العود «بيَّـن» والسبيطي يطير بالبكرة

اعداد: هادي العنزي البحر والصيد له مراحل، بدايته قعدة على السيف وتشويح بكرة ولا يقبل صاحب الخيط إلا الاستمرار والوصول إلى أعلى قمة الصيد، الحدّاق فيصل العجمي تحدى أصعب مراحل هواية الحداق حتى وصل بخبرته رأس الهرم وقد التقت به صفحة «بحري» هذا الاسبوع وقد حدثنا عن بداياته بالصيد وأين تتواجد أسماك الشماهي ومتى يضرب السبيطي وإلى ماذا يحتاج للفوز به وأين يكثر صيد النويبي والهامور، كما أطلعنا العجمي على المناطق التي تحتوي على صيد وفير وما هي أكثر الأشياء التي تضايق أصحاب الطراريد ومعلومات وافية وكافية لكل باحث عن السمكة وزفرتها. فإلى التفاصيل:بداية، بما ان دولة الكويت غالبية بيوتها قبل كانت مطلة أو قريبة من البحر فنجد الشباب يحبون القعدة على السيف خاصة بعد مغيب الشمس، وتحلى القعدة بحداق السيف واغلب الشباب تحصل معاه خيط ومشوح له چم بكرة بحر ومنها حبينا الصيد، ومع الوقت واحد من الشباب خذاله طراد 16 قدما وما كنا نباعد على أسياف الفنطاس والمنقف وما جاورها، ومرة نزلنا وكان البحر دهنه واعتقد انه كان مبيت النية مفول بنزين، وباعد شوي وين الوجه يالحبيب قال قريب ووجه ناحية الشرق بنص الدرب قال بروح كبر طبعا موجة اي طراد مار كانت تعفسنا شوي، المهم عجبتني سالفة كبر بس الطراد ما يساعد انك تباعد ولا يشيل اكثر وتصير احراجات، قلنا ناخذ طراد اكبر شوي يعني بو 24 قدما ووكلنا واحد من الشباب بما انه اكثرنا خبرة الحبيب طمر من 16 قدما الى منى يخت 36 قال هذا اللي تباعد ولا تحاتي وفيه تكييف وغرف نوم ومطبخ انا ما اقتنعت فيه بس كانت الفكرة عاجبة الشباب وصار تصويت ووافق أربعة وخذيناه وصارت الطلعات أبعد صوب الارياق والقطع الجنوبية، واذا احتر الجو انزل الغرفة وتكييف وأحلى تقييلة، بعد سنة تقريبا بعناه وبعدها بفترة خذيت لي 16 المنيوم وصرت أباعد فيه من الخيران لأم المرادم وضربنا مرة هوى حركت من الجزيرة لي خيران حروة الساعة وزود وبعدها بعته عشان ما أغامر مرة ثانية وأباعد فيه لأن البحر بالنسبة لي وناسة مو رزقة ولا يصلح انك تغامر، وخذيت طراد اكبر ومن كل هذه الاحداث السابقة الذكر عشقت وتولعت بالصيد والخيط. الچنعد العود صوب الأرياق ويضيف: حاليا مبين غالبية السمك مثل النقرور والهامور والحمام والچنعد العود يحصلونه صوب الأرياق طبعا مغاوص وبما ان غالبية طلعاتي جنوب هالوقت أنصح بأقواع قاروه وطبعاناتها وأم ديره. طلعات بحرية متنوعة وصيد وفير وتابع: بخصوص أفضل الرحلات فهي كثيرة والصيد أرزاق من موزع الأرزاق سبحانه، مرة على ايام التشخيط حصلنا تقريبا 12 چنعدة في جزيرة أم المرادم وكانت الطلعة جميلة من الشباب اللي ويانا خالد الكندري وفهد الصويتي وعبدالله بن سلامة، ومرة طلعنا صوب المحادق اللي بالمنطقة المحايدة بين الكويت والسعودية وصدنا يمكن خمس فروخ شماهي وعندق وحمرا وبالول وشعري يعني مشكل والعدد كان طيب مع الشباب يعقوب العلي وبوفهد الهويدي، وقبل فترة طلعنا فوق جزيرة فيلكا وسوينا تزفيرة وصدنا سبيطي وثلاث مزيزية وفرخ شماهي ونويبي قط وشيل لين خلص الييم واجمل شيء بالحداق اذا منزل دريه صدر وقاعد تحدق ورى وتسمع صوت الدريه ضارب عليها هذاك الهامور اللي يطيب خاطرك بسحبته طبعا ما تدري شلون وصلت لصدر الطراد ركضه والا طمرة وحده تبي تلحق عليه لا يلحف بميفرته، وطلعة اخرى جميلة مع خالد الكندري والصويتي جنوب صدنا 90 طلاحة تقريبا اذا حضر الراس تحتك لازم تستغل الوقت لأنه فترة ويروح فحاول تخلي شغلك زاهب سواء تريش او ييم ومن ميادير وبلود من يقص على طول ردع والا تكون مزهب لك خيوط احتياط. ومرة معاي العم الغالي بوبدر الهاجري طلعنا على اذان العصر برمضان طبعا اكثر الشباب اللي دقيت عليهم قالوا رمضان والجو حار إلا بوبدر صديق الدروب ما عنده مشكلة وطلعنا جزيرة كبر صوب النيوه صدنا يميام ونزلناه محاياه قبل الفطور بساعة تقريبا وضرب علينا هذاك الهامور المدبغ اللي ما ينشال بالجزه لازم منتب طبعا صورناه وعلى طول للشباب اللي يقولون حر عشان نحرك مشاعرهم شوي ومرة دقو عليّ الربع فهد الجميع وجراح الجميع قالوا تونا طالعين من شمال صوب طبعانة ام الفحم والحصيلة 52 نقرور طريجعي طبعا الطريجعي هو النقرور الصغير مثل البالول والهامور، المهم طلعت اليوم الثاني مع اخوي حسن دهرب. وكانت الحصيلة 34 نقرور طريجعي احجامه جدا طيبة، وطبعا وناسة البحر بالجمعة الطيبة مع الشباب الطيب. الشيم ما عمر حدقت له والشماهي العود صيدته صعبة ويقول: الشيم ما عمري حدقت له لكن اللي اسمعه انه يحب الزوري محاياه واماكنه الركسة، اما الشماهي فيحب الربيانة ومرات يضرب على المحاياة اذا عود لكن اذا عود حيل والمحاياة شيب او بويه صعبة جدا تطلعه لأنه عرد ويسحب لين يوصل للشيب ويلف عليه، ويقص خيطك وأماكنه واجد الركسة البويات الجنوبية، الارياق، وصيده غالبا بالسجي اذا التيار خفيف والوقفة وبعد الوقفة بشوي اول ما تجر المايه. السبيطي يبيله مسايس ويضيف: السبيطي اذا كان مجموعة ما يضرب على الخيط، واذا كان بروحه تشوفه حذر يطق الييمه ويبتعد عنها بعدين يضربها مرة ثانية ويطير بالبكرة اول ما يضرب يبيله مسايس وهو من الاسماك الحذرة لازم تستخدم له خيط ضعيف من الخمسين لي الخمسة وثلاثين اذا سيف والمايه صافية شوي اما اذا المايه دلخه يضرب حتى على خيط السبعين وبما ان اماكنه دايم قريب السيف فيرعى على الزوري والمنجوس فتحدقله على مرعاه، ويضرب على العجين والمصير، اما بخصوص الخيط والركه او علاق يضرب على الركه بلد خراري افضل مايه له هي اعلى مد واذا صادفت طلوع الشمس او غروبها. ما يعجبني الربادي والكسول بطلعات البحر وقال: غالبية الربع اللي اطلع معاهم بحر شباب تحطهم على يمناك انا اللي ما يعجبني بالبحر الشخص الربادي الكسول وربعي ليسوا من هذه النوعية، ولا اقدر اعدهم بالافضلية لكن كأكثر طلعات معاهم فيصل الهاجري بو بدر، يعقوب العلي، احمد المليفي، فهد الجميع، خالد الكندري فهد الصويتي وحسن دهراب وكلهم خير وبركة. النويبي والهامور ويضيف: النويبي موجود بكثرة في الشمال مثل الدفان والدوحة والحيشان البويه الصفرا اذا ما فيه غزر عادي حمل فساد موجود بس بالغزر تصيده بالفسادة ومن ناحية اوقاته فهو موجود بالشمال ويكثر مع قرصة البرد، اما بخصوص الهامور فوقت عبوره بعد الخثاق يعني من شهر مارس وابريل لكن الهامور موجود طول الموسم في الميافر والطبعانات واحسن حزة له وقفة المايه وافضل ييمة له المحاياة. رسالة لانشاء مسنات جديدة وأكد ان البحر وناسة ووسعة خاطر لشريحة كبيرة من الشباب والشياب وحافظ الشباب من هالخراب اللي ابتلي فيه بعض الشباب ربي يهديهم، فيا ليت الجهات المسؤولة عن المسنات تكثف جهودها وتكثر لنا المسنات، وتهتم فيها يعني من مسنة الكوت ما فيه مسنة جنوب بعدها الا الخيران لانه بالـ«ويك اند» زحمة مو طبيعية وبعض الشباب ربي يهديهم يصطفون على المسنة مع انه فيه مصافط وبراحة عوده واتمنى توفير الخدمات اللي بالمسنات مثل بقالة، محل ادوات الصيد. ختامية وفي الختام اعرب فيصل العجمي عن شكره لجريدة «الانباء» وصفحة «بحري» على هذه المقابلة الطيبة، ودعمكم لرواد البحر وفتح نافذة للتنفيس عن مشاعر الحداقة واصحاب الطراريد وهمومهم البسيطة.