صفحة بحري اليوم التقت بالحداق حمد الصقعبي الذي بدأ عشق البحر ونبرة السمكة من السيف فكانت أولى طلعاته راحت منه البكرة بحر وبعدها اصبح خيطه يرجع بكل قطه بسبيطي وشعم وهامور وبالول وشماهي وشيم، وقد حدثنا عن افضل أماكن تواجد النويبي والشعم والسبيطي وبماذا يختلف الشعم الأصفر عن الأزرق وما هي ييمة كل واحد فيهم بالصيف والشتاء ومتى يضرب السبيطي وماذا يتطلب من الحداق عمله للفوز به، كما اطلعنا الصقعبي على ييمة الهامور بالطبعانات والأقواع الصخرية وحاليا موسم أي سمكة، كما أكد أن النقرور حاضر بعوهة وكبر فإلى التفاصيل:
بدأت الصيد على السيف مع صديقي الذي جعلني «اتولع» بالبحر وكنت صغيرا وخبرتي مو نفس خبرته واصطحبني معه الى الدوحة قبل المنع حاليا، وكنا نصيد السبيطي والمزيزي والشعم بأحجام متفاوتة، هذه بدايتي وما كنت أعرف اردع الخيط وبعدها شريت طراد 14 قدم اتحاد أول طراد لي وبعدها كبرت وكبرت معي هواية الصيد وبدأت أرافق الأصدقاء خلال رحلات صيدهم خصوصا مع أخي ورفيق دربي النوخذة أحمد فاضل دشتي.
ييم النويبي يختلف في الشتاء والصيف
ويضيف: النويبي مكانها أغلب الحداقة تعرفه ولا تتكاثر بالموسم بالدفان والحيشان ومداخن الصبية فهي ممنوعة حاليا وموجودة على مدار السنة ولكن مو بكثرة شهر أكتوبر مع دخول البرد لغاية شهر مارس وموجودة بالركسة بالصيف لكن مو بالكمية أو بالأحرى العدد الكبير ممكن بالصيف تكون تلاقيط من 10 إلى 15 حبة ولكن ييمتها تختلف في الشتاء والصيف، وبالصيف تبي صلاخ الميد أو زوري أو عووم وساعات على حسب المرعى بس الأغلب صلاخه وطبعا كلما كان الييم فرش كانت فرصة الصيد أوفر وفي الشتاء السمكة تبي ميدار صغير وييمتها الربيان السعودي ويكون صيدها بكميات كبيرة.
الشعم الأصفر يختلف عن شعم الرقوق
ويتابع: الشعم الأصفر يختلف اختلافا كليا عن الذي يعيش بالرقوق الأبيض أو الأزرق صيدتها متعة وطعمها لذيذ ونبرته بالخيط تختلف مع مرور الوقت الواحد يده تاخذ على الخيط ويعرف شلون سحبة الشعم الأصفر، وأنا أسميه «الوحشي» وفي ناس تسميه «الدولار» من كبره وموجود على مدار السنة ولكن بالموسم شهر ديسمبر لغاية آخر مارس بالصبية والدفان والفنطاس على الطبعانات أما الأزرق أو الأبيض موجود بالرشدان والحيشان وحاليا ممنوع الصيد فيها وبالموسم موجود بالصبية والييم ربيان سعودي أو خثاق وبالصيف يبي صلاخة ميد.
السبيطي عنيد
ويضيف: السبيطي قصة عشق وأول أيامي كان يضرب عليّ ويقص وكل ما أنوي أصيده أكون متجهز يا يفلت ولا يقص طبعا بعد ما تعلمت شنو يبي ييمه والخيط وكنت أصبر عليه وأطول بالي ومتجهز ومرة من المرات قلت حق واحد من الربع ماني قادر أصيده كل ما أصيده يفلت أو يقص طلع معاي وضرب على الخيط، وقد علمني شلون يوادعون السبيطي وصدته ومن بعدها عرفت له عدل والسبيطي سمكة ذكية حتى الجزه إذا شافتها ترد تنزل عنيدة وساعات تسبق الخيط ويتهيألك إنه مقصوص يعني حتى إذا صعدت وييمتها على حسب مرعاها ساعات تبي مصران الدجاج وساعات تبي سمكة حية مثل الزوري أو الميد أو البياح أو العوم كل واحد يعتمد على طريقته، أنا دائما أحط له خيط قوي يعني 50 وفوق إذ كان المكان فيه صخر، أما الطين عادي احدق له بخيط ناعم ولكن ليس بالمضمون الواحد يصيده بخيط ناعم يبيله مسايس وخفة يد وموادع ودايم أحدق بميدار 0/6 أو 0/5 وافضل اماكن من بعد تسكيرة الجون والدوحة الصبية والمركز العلمي وأسياف البحر جنوب وشمال وعوهة.
هامور الأطيان لونه فاتح
ويقول: الهامور والبالول موجود بالطبعانات والأقواع الصخرية بالركسة وعوهة وييمته السمكة الحية مثل اليميام والمجوه والچم وخيط درية من 100-120 وميدار خرواش وسمكة كل ما كبرت وكل ما كانت عردة بالسحبة وعنيدة شوي، ومشكلته الهامور وأنت ساحبه لازم ما تعطيه مجال لأن يرجع حق ميفرته وإذا دش انسى يطلع وانت ساحبه يبطل حلجه ويعبي ماي يصير مثل السطل ثقيل وبالصيف بالأطيان يصير لونه فاتح حيل يقولون عنه رعوي ويتكاثر مع موسم الخثاق، والشماهي أطلقوا عليه «أسد البحر» من كثر ما هو عنيد وموسمه شهر أغسطس لغاية أكتوبر وسمكة الشيم مع الرطوبة بالصيف بالدردور وطبعانات جنوب وأرياق قاروه وييمته ربيانه حية أو ربيانه جامبو ولازم خيط قوي من 80 وفوق.
الفرق بين صيد الجنوب والشمال
أما عن الفرق بين صيد الجنوب والشمال، فأكد أن أغلب أماكنه معروفة مثل عوهة الصبية الركسة الشمالية والجنوبية والدردور والطبعانات، أما الجنوب أقواعها أكثر وجزرها أكثر وجنوب على مدار السنة وحتى بالغوص المايه صافية وسمكتها موجودة بأماكن مختلفة وأيضا موسم التشخيط حول الجزر عكس الشمال المايه دلخه، وأحب أن أقول لإخواني الحداقة ان النقرور صار يبين بعوهة وكبر وبالطبعانات والهامور والبالول مبينين عدل.
ختامية وشكر
واختتم الصقعبي قائلا: أود أن أشكر جريدة «الأنباء» على تخصيصها صفحة تعنى بالبحر والصيد والمتمثلة في صفحة «بحري» وعلى مقابلتي هذه، وأوجه رسالة إلى المسؤولين بضرورة زيادة عدد المسنات وصيانة الموجودة وفتح جون الكويت للحداقة، كما أتمنى من كل صاحب طراد المحافظة على نظافة البحر والاهتمام بعدة السلامة والإسعافات الأولية خصوصا اللايف جاكيت.