أكدت الفنانة مايان السيد أنها بدأت مشوارها في عمر الـ 17 من خلال الإعلانات، وقالت: «بشتغل من وأنا عندي 17 سنة، وقررت أنفصل ماديا عن أهلي واصرف على نفسي، ولما قررت أوقف الإعلانات، قولت أنا عايزة أمثل في مسلسلات وأفلام، وعملت أوديشن اتقبلت من أول مرة، وفي هذه السنة شاركت في مسلسلين، منهم واحد كنت هطلع بطلة في العمل واعترض عليا البطل فجسدت صاحبة البطلة، وكان بالنسبة لي مش مشكلة لأني عايزة أمثل فأي حاجة تيجي»، مشيرة إلى أنها لم تكن متصالحة في البداية مع الشهرة، مضيفة: «دلوقتي أحب الشهرة وتصالحت معاها، جات عليا فترة كان عندي فوبيا ومكنتش احبها بعد ما كان يجيلي تعليقات سيئة ويطلع علي إشاعات، لكن اشتغلت على نفسي، وعرفت أن وجود ناس بتحبني ويتابعوني نعمة».
وتطرقت مايان، في تصريحات لبرنامج ABTalks الذي يقدمه الإعلامي أنس بوخش، على «يوتيوب»، إلى الإخفاقات التي مرت بها، قائلة: «من سنتين عملت مسلسل لم يحوز إعجاب الناس وكانوا يشتموني، وعرفت هنا يعني إيه الناس تقول تعليقات وحشة أوي، وكنت أقرأ كل حاجة ووقتها كنت مش واثقة في نفسي وانتظر تصفيق الناس فتعبت وفكرت في حاجات كتير منها اني ماكملش في المهنة».
وكان للخوف حيز في حياة مايان، حيث كانت تشعر به لكنها تصالحت معه، واستطردت: «كنت بخاف من الموت جدا وبعدين تصالحت معاه، وكنت قاعدة اتأمل وشعرت إن جسمي جزء من الطبيعة بس لما الروح بتروح من الجسم، الجسم بيرجع للأرض المكان اللي اتخلق منه وروحي بتروح لربنا، هو فيه أمان أكتر من كده؟!».