زعل: وزيرة وواخدة على خاطرها قوي من أعضاء مجلس النواب بعد فضيحة مقالها في جرنال اجنبي مشهور واللي بتقترح فيه بيع حاجات كتييييير من الأموال العامة وأصول الدولة يعني مملوكة للشعب.. واضح انها اعتادت ان تفكر وتنفذ من نفسها ولما النواب يعترضوا تزعل وتنقمص وتقاطع البرلمان بحجة انهم لم يدافعوا عنها.. بس الحق يتقال الوزيرة شكرت المسؤول الكبير قوي بعدما دافع عنها واحتوى الموضوع وقال: «مكنش قصدها ودا مجرد راي وما في بيع ولا حاجة».
****
غيظ: حالة من الغضب الشديد انتابت معظم النواب بسبب استمرار مسلسل الدفاع عن الحكومة من اكبر راس في المجلس وبيقولوا والله اعلم انه عايز يحمي الحكومة من خطر السقوط في بحر طرح الثقة بها ولسان حاله: «اهو اللي نعرفه احسن من اللي منعرفوش» رغم أن الدنيا مولعة تحت القبة عن قرارات الحكومة.
****
عجبي: فيلم هندي حدث من نائب من احدى محافظات الصعيد بعد ما اتزنق زنقة صعبة قوي على شاشة احدى الفضائيات الخاصة وهو يحاول لمدة نصف ساعة الدفاع عن موقفه الشخصي في احدى القضايا.. المفاجأة أن شقيق النائب هو من كان يتحدث في المداخلة منتحلا صفة النائب ولما انكشف الأمر اخذ النائب الهاتف ليتكلم مع المذيع ويقول: «أنا اللي بتكلم مش حد تاني».. الغريب ان اللي كشف الفيلم هو احد المتصلين من أبناء الدائرة اللي قال ان ده صوت اخو النائب..وعجبي!.
****
تذكرة: وزير مفيش في قلبه رحمة بالغلابة يردد بين المقربين منه بالوزارة وفى الجلسات الخاصة انه نفسه يرفع أسعار تذاكر مترو الأنفاق.. للعلم ليس وزير النقل ولكنه وزير تاني ممكن نذكر اسمه لاحقا والغريب انه يقول دائما: «احنا حنجيب من فين إيرادات للمرفق ده والظروف صعبة».