مفرح الشمري
وجهت الفنانة امل محمد عتبا لادارة انتاج مسلسل «نور في سماء صافية» الذي يعرض حاليا على شاشة أبوظبي بسبب عدم وضع صورتها في مقدمة المسلسل الموجود فيها جميع صور الفنانات المشاركات في هذا العمل خاصة ان هناك فنانات صورتهن موجودة وهي اقدم منهن في الساحة الفنية. واضافت امل في حوارها مع «الأنباء» انها «متحسفة» على التعب الذي عانت منه عندما كانت تصور مشاهدها في «دمعة يتيم» بسبب المخرج المساعد نور الضوي الذي كان يعاملها معاملة «جافة» حسب قولها. وطالبت بعض المنتجين بألا يلجأوا الى مساومة الفنانين على اجورهم لاننا لسنا في «شبرة خضرة».. فإلى التفاصيل:
شخبارچ امل؟
الحمد لله.
شنو يديدچ؟
خلصت من تصوير مسلسل «دار الايتام» و«قصة هوانا» و«نور في سماء صافية» اللي الحين ينعرض على شاشة ابوظبي وهالايام قاعدة اصور «ايام الفرج».
يقولون تفننتي في تعذيب شجون الهاجري في «دار الايتام»؟
«تضحك» تبي الصچ انا من زمان ابي امثل دور شريرة ولله الحمد تحقق هالشي في هذا المسلسل بفضل الله ثم بفضل المخرج منير الزعبي لانه كان عندي رغبة من زمان في ان اجسد مثل هذي الادوار القريبة لقلبي وبصراحة طلعت الشر اللي فيني بشجون الهاجري اللي شافت الويل مني ومن ابوها احمد مساعد واتمنى ان ينال هالدور اعجاب المشاهدين.
افهم من كلامچ ان المخرجين هم اللي يحطونچ بأدوار الطيبة؟
اكيد لانهم يقولولي ويهچ مو ويه شر ويه وحدة طيبة وانا يكون عاجبني الدور فوافق ان امثله.
وفي «قصة هوانا»؟
دوري فيه ام شيماء علي بس خطه وايد حلو لانه يحارب الطائفية اللي موجودة حاليا خاصة فيما يخص الزواج وانا مستانسة وايد على هذا الدور اللي ابي اوضح فيه انه ماكو فرق بين المذاهب الدينية لاننا كلنا مسلمون ونخاف رب العالمين وانا سعيدة وايد بتعاملي مع المخرج العبقري محمد القفاص في هذا العمل.
وايام الفرج؟
شفيه..
شنو دورچ فيه؟
ما اقدر اصرح الحين بطلب من الجهة المنتجة وانا احترم رغبتهم وكل اللي اقوله ان المسلسل من انتاج باسم عبدالامير وتأليف عبدالعزيز الحشاش واخراج جمعان الرويعي وبس.
وبس؟
ايه وبس «تضحك».
طيب امل شلون لقيت التعامل مع الفنانة القديرة سعاد عبدالله؟
والله والنعم في ام طلال تعاملها راق مع الجميع وانا استانست بالعمل معها في «فضة قلبها ابيض» و«نور في سماء صافية» اللي قاعد ينعرض الحين على ابو ظبي، بس عندي عتب بسيط على هالمسلسل.
«مقاطعا» شنو؟
كل الفنانات المشاركات بالعمل حاطين صورهم عند اساميهن بالمقدمة الا صورتي مع انه في فنانات انا اقدم منهن بالساحة.
بلغتيهم عتبچ؟
ايه بس ماكو اجابة واضحة وما ادري ليش هضموا حقي بهالطريقة.
يمكن ان مساحة دورهم اكبر من مساحة دورچ؟
حتى ولو كان عيل ليش حاطين صورة الفنان عبدالله غلوم اللي يصير اخوي في المسلسل مع انه حلقاته قد حلقاتي في العمل خاصة انا وياه نمثل فترة معينة وتعدي.
بلغت ام طلال بهالشي؟
لا والله بس بلغت ادارة الانتاج وما اخذت منهم لا ابيض ولا اسود.
بصراحة امل شلون المنتجين معاكم؟
بعض المنتجين چنهم قاعدين في «شبرة الخضرة» وايد يحنون على الفنان بأنه يقلل من سعره مع انهم ماخذين مبلغ محترم من القنوات وللاسف هذا الشي صار وايد هالايام واتمنى من هؤلاء انهم يغيرون طريقتهم لان الفنانين لهم سعر معين ومعروف واذا تبي تشتغل معاه عطه سعره خاصة اذا كان الدور راكب عليه لانه اذا اعتذر راح يكون العمل أي شيء اذا يبتوا فنان ثاني علشان يجسد دوره خاصة ان المشاهد صار يفهم هالامور.
شنو العمل اللي ندمت على مشاركتچ فيه؟
بصراحة «دمعة يتيم» مع انه الدور عادي بس لانه مع الفنانة القديرة حياة الفهد وافقت عليه ولكن ندمت بعدين بسبّة المخرج المساعد نور الضوي اللي كان يعاملني معاملة جافة وما ادري شنو السبب مع اني ملتزمة بمواعيدي اللي يحددونها ادارة الانتاج، لدرجة انه في مرة من المرات تهاوشت معاه لان كان عندي مشهد واحد «لطعني» باللوكيشن الى وقت متأخر علشان يصوره وبلغت هالشي للفنانة القديرة حياة الفهد بس ما تغير اسلوبه معاي مع ان المخرج الاصلي حسين ابل كان في غاية الاحترام معاي وماني عارفة ليش نور الضوي «شايف نفسه» وقررت اني ما اشارك في عمل هو موجود فيه، وتحسفت على تعبي في «دمعة يتيم» بسبته.