- يا سلام شنو هالبوكيه الحلو؟ اقول هنوده.. منو داز لچ هالورد الحلو من الصبح؟
- ههه.. هذا حقي آنا.
- أدري حقچ انت، مو حق ويهي هالشيفة، بس أقصد منو هاللي مغرم فيچ ودازه لچ من صباح الله خير.
- واااي.. سمروه، انت ما تفهمين اشقاعدة أقولچ؟.. اقولچ هذا حقي آنا.. يعني مني آنا؟
- شنو يعني حقچ انت ومنچ انت؟!
- هذا البوكيه اللي جدامچ آنا دازته لنفسي، أمس شفته عند محلات الورد وعجبني، قلت أدزه لنفسي وأونسها.
- شنووو؟ شهالخبال؟.. في واحد يدز لنفسه بوكيه ورد، انت صاحيه وإلا مينونه؟
- افففف.. صج مليقة، اشفيها الانسان إذا أهدى نفسه ورد، وإلا كافئها بهدية حلوة؟ ترى مو شرط ننطر من الناس تسعدنا، يعني ممكن الواحد هو اللي يسعد نفسه.
- لا تقولين بعد إن الكيكة اللي من چم يوم وصلت لچ، انت اللي شاريتها لچ بمناسبة عيد ميلادچ؟
- أي... وبعد الحلو اللي وصلني ذاك الشهر من نفسي، كنت مكافئتها على حصولي على شهادة اجتياز دورة التنويم المغناطيسي، وبعد الرسايل اللي توصلني من فترة لفترة بإيميل الدوام.. أنا اللي أرسلها حقي عشان أحثها على الانجاز والنجاح في حياتي العلمية والعملية.
- ماااالت سليييحط.. وأنا حسبالي كل هالسوالف من معجب والا من صديقة عزيزة، طلعتي انت اللي امسوية كل هاللويه.
- اشفيها يعني؟ المفروض كل انسان يقدر نفسه، ويحثها على العطاء.
- أنا ما قول إلا الله يكملچ بعقلچ.. الظاهر هذا تأثير الدورات البايخه اللي تاخذينها، وقاصين عليكم الدكاتره بالكلام اللي ماله فايدة، ويسحبون منكم هالبيزات وانتو تضحكون.
- اففف.. يااااربي، ممكن تكرميني بسكوتچ وتروحين تكملين شغلچ، أنا ما اناقش وحدة مخها مقفل مثلچ.
- هههه.. ضحكتيني، أنا بس خايفه باچر تشترين سياره لنفسچ هديه، بس ما تعجب نفسچ لما تشوفها هههه.
- يعني يكون تنكتين، صج انچ انسانة سطحية.. وبااايخة!
شي ما شفتوه:
- صباح الخير.. هنوده، سامحيني على غشمرتي معاچ أمس، بس أنا فكرت بكلامچ ولقيته صحيح، لازم الانسان يسعد نفسه بنفسه.
- شفتي اشلون.. كلامي كان مؤثر.
- إي.. طبعا عشان چذيه كتبت عن نفسي قصيدة غزل، ودزيتها لي مسج باسم مديرنا.
- شنوووو؟
[email protected]