منهو الذكي فيهم

أنوار عبدالرحمن وليد سيدخل في مسابقة (أذكى طالب) وعليه أن يجيب عن أسئلة غير اعتيادية، فكانت أمه من المشجعات له في خوض تلك المسابقة.. - وليد تكفى.. عاد شد حيلك هالمرة وجاوب عدل على هالاسئلة. - يمه قلت لچ أنا أعرف.. لا تساعديني بأي جواب.. انتي اقري لي بس الاسئلة وأنا أرد عليچ. - الله يستر.. لا تييب نتيجة مثل ذيك المرة.. واتفشل جدام الناس. - يمه انتوا ما فيكم إلا اتحبطون الواحد.. أنا أصلا جاوبت ذيك المرة أجوبة أحسن من كل اللي ادخلوا المسابقة! - وليد الظاهر انك نسيت الاجوبة اللي بدعت فيها وخليت لجنة التحكيم يسوونها نكتة والحضور قاموا يدزونها بالمسجات. - شفتي اشلون ولدچ مو أي شي!.. وبخليهم هالمرة بعد يشوفون منو الولد اللي بياخذ شهادة أذكى طالب؟! - ما قول إلا الله يستر.. والحين خلني أقرى لك الاسئلة.. رقم 1.. من أذكى الكمبيوتر والا الانسان؟ - الانسان.. لان أهو اللي سوى الكمبيوتر.. والكمبيوتر إذا صكيناه وقف مخه بس الانسان إذا نام يشتغل عقله الباطن. - إجابة مقنعة تبشر بالخير.. انزين رقم 2.. القول المشهور.. «أنا أفكر إذا أنا موجود» وضح معناه؟ - معناه ان اللي يفكر بس أهو اللي موجود.. والنايم واللي يطالع التلفزيون مو موجود.. يعني أشباح! - من صچك هذي إجابة؟! - يمه أنا قلت لچ اقري الاسئله وبس.. وما عليچ من أجوبتي. - انزين بشوف شنو آخرتها معاك.. ليش العملات النقدية الخليجية ما تتشابه مع ان مواطنين دول مجلس التعاون اخوان يجمعهم النسب والدم؟ - لانهم اخوان من أم وحدة.. عشان چذيه أسماؤهم مختلفة! - يا سلام.. حدك وليد بدعت.. لاحد يسمعك ويقول هذا من وين ياي؟! - كملي.. يمه وبتسمعين أكثر! - اضمن لك العلامة الكاملة من الحين إذا كانت أجوبتك چذيه: - امممم.. اتوقع انا بعد چذيه.. كملي يمه كملي.. انا أعجبچ. - ليش المدرس في أغلب الاحيان يعطي درسه وهو واقف؟ - عشان ما يكتشف ان واحد من الطلبة أطول منه وينقهر! - وليدوه صدقني بعد شوي بحذف عليك اورقة الاسئلة.. واهدك! - خلاص.. خلاص.. راح أجاوب إجابات عدلة. - انزين.. ليش أغلب التلاميذ في الكويت يتجهون لدراسة المواد الادبية؟ - لان عيب عند أهلنا العيال يطلعون مو امأدبين! - أنا أقول.. يا وليدي.. فلحت ونجحت!!.. خل إجاباتك عندك أحسن لك. - كملي يمه تكفين.. لا تعصبين.. تكفييين. - اففف.. ليش أبراج الكويت ثلاثة يم بعض مو واحد؟ - لان الواحد فيهم يستحي يوقف بروحه والناس يطالعونه.. عشان چذيه خلى أخوانه يوقفون يمه. - هههه ضحكتني.. صچ شر البلية ما يضحك. - موقلت لچ يمه اني باخذ شهادة أذكى طالب؟ - انا من الحين أقولك.. لا اتعب نفسك وتدخل المسابقة. - كملي يمه.. حمي الوطيس.. وناسه. - ليش المسرحيات بانحدار في وقتنا الحالي وأصبحت بلا لون ولا طعم؟ - لان المؤلف واللي معاه يطبخون المسرحيه من دون نفس. - عجيييب.. أنت وأجوبتك.. لماذا لا تفوز المرأة في الكويت في الانتخابات البرلمانية بالتصويت؟ - لانها مانزلت بالقنوات الفضائية ڤيديو كليب تستعرض فيه برنامجها الانتخابي. - فكرة حلوة يا ذكي.. المفروض يستشيرونك قبل الانتخابات.. ما علينا.. الكتاب باين من عنوانه.. السؤال يقول: لماذا يطلب من مزدوجي الجنسية التنازل عن جنسية واحدة ويختار الاخرى؟ - عشان اللي يتنازل عنها يعطونها للبدون. - هاا؟!!.. امممم.. ليش هالفكرة ماطرت على إدارة الجنسية؟! - لان مكاينهم خربانة.. ما لهم خلق يصلحونها.. ويطبعون جناسي يديدة!! - وليدوه.. أذلف عن ويهي.. الشرهة علي اللي قاعدة أسمع أجوبتك الغبية.. أنا أنصحك لا اتعب حالك وتدخل المسابقة.. عشان لا اتفشلني وياك. - ما بي.. بدخل المسابقه.. واتحدى الطلبه كلهم. - عيل كمل الاسئلة الثانية بروحك.. ومالي شغل فيك! شي ماشفتوه:- اممم اشهالسؤال الغريب.. ليش أهل الصين واليابان أغلب أسمائهم مختصرة من حرفين أو ثلاث.. هااا؟!.. يمه ممكن اتساعديني بهالسؤال. - ما بي.. انت واحد مغسولة الايد منك.. مادري طالع على منو؟!! - يمه تكفين.. أبي مساعدتچ.. بس بهالسؤال. - ممم مادري... ليش اسمائهم «صن.. ينغ.. داي» أنا أعتقد يمكن لانهم دايما مستعيلين.. وماعندهم وقت مثلنا يسمون أسامي اطويلة! - هههه صچ لا قالوا يايمه.. هذا الشبل من ذيك اللبوة!!