وحدة بوحدة

أنوار عبدالرحمن تعود بوفهد في فترة العصر أن يشرب الشاي ويقرأ الجريدة اليومية بتمعن.. ولكن زوجته ملت من هذا الروتين القاتل.. وحاولت اليوم أن تلفت انتباهه لها.. - بوفهد.. ترى برد الشاي وانت ماشربته. - صبي لي غيره.. بس لا تقاطعيني خليني أكمل قراية هالمقالة. - ماصارت مقالة.. امبقق عينك عليها من ساعة حشى . - وانتي اشعليچ؟.. حتى لما أقرى الجريدة تتدخلين؟- أقول.. ترى اليوم معزومه على استقبال. - روحي.. روحي. - وبروح الصالون بعد اشوي.. استشور شعري واحط مكياج - قلت.. روووحي. - وبمر رفيجتي مها.. باخذها معاي. - مريها.. أوف. - وبحط عيالي عند أمي. - وبعدين.. وبعدين مع هالقرقة.. قلت لچ روحي فكيني. - يعني شنو؟؟.. ماتبيني أقولك اني بروح الاستقبال وبتمكيج بالصالون وبمر رفيجتي وبحط عيالي عند أمي والخدامة بوديها ال... - بس .. بس.. بس.. حشا راديو مو مره.. قاعد أقولچ روحي.. الله يعين لو قايلچ لأ.. اشبتقولين؟؟- قاص عليّ تقولي قاعد تقرا مقالة.. وأنت اتطالع لي بصور هالفنانات. - كيفي.. كيفي.. بس صكي هالاسطوانة.. أعوذ بالله. - انزين.. أشرب الشاي صبيت لك ثاني.. لا تبرد هالبياله بعد. - انزيييين. - ترى سايق أهلك مر اليوم وياب السمچ اللي وصيته عليه. - انزين. - وعطيته الفلوس. - انزين. - ولقيت الفريزر خربان. - آآه.. - ويبت المصلح. - لاحول ولاقوة إلا بالله. - وخذا الفريزر معاه. - انزين. - ويقول تصليحه ياخذ يومين - انزين - وقلت له ش.... - ممكن أقولج شي؟- قول.. تكلم.. من دخلت البيت وأنت ماسك لي الجريده. حشى جنه اللي عندك طوفة مو حرمة. - يعني ما ارتاح افبيتي.. أوف. - وآنا متى تسمعني؟.. متى تسولف معاي؟.. بعد اشوي بتطلع للديوانية وماترد إلا وبطاريتنا خانسة. - كل هذا ما سمعتچ؟.. وانتي خليتيني أركز وإلا أقرى عدل؟- آآخ.. على حظي لو ماخذتلي واحد مايعرف يقرا ولا يكتب.. يمكن أبرك لي. - اشهالكلام الفاضي.. أشوف موحاطة اعتبار للي جدامچ. - محد طاقة جبده ابهالبيت إلا آنا.. أطالع الكل ومحد حاس فيني. - تدرين اشلون.. ممكن تقعدين عند اعيالچ وتشوفين الحلقة اللي اتابعينها كل يوم؟- چذيه يعني؟.. انزين.. اراويك. - فارجي عن ويهي.. يه. - بعد ربع ساعة: - بوفهد.. بوفهد.. طافك نص عمرك.. تعال شوف هالحلات والزين - منووو؟.. أكيد نوال - لا.. لا.. لا ذاك اللي.. ههههه - صكي التلفزيون.. صكيه.. عسى عيونچ العمى. شي ماشفتوه:- بوفهد.. اتصدق مادريت انك تغار علي إلا اليوم. - انزين. - كنت أبي أختبرك . - انزين. - قلت أقص عليك . - انزين. - وفتحت التلفزيون . - انزييييييين.. ارحمني ياربي.