Note: English translation is not 100% accurate
بضاعة خصوصية
16 يونيو 2008
المصدر : الأنباء
بقلم : أنوار عبدالرحمن التنيب
أنوارعبدالرحمنهل يعقل أنه لايزال هناك من يجلب بضاعته إلى مكان عمله، من أجل ترويجها بين زملائه الموظفين، حتى لا تبور؟
بين هيفا وزميلاتها في العمل:
- بنات.. بسرعة تعالوا، قبل لا اييون الموظفين، ياسر وممدوح، وربعهم هاللزقة.
- ليش اش عندج هيفا اليوم؟
- يايبه لكم بضاعة ما تلقونها في الكويت.
- اشدعوة؟!
- صدقوني.. تعالوا وشوفوا.
- اممم.. انزين طلعي شنو عندج؟
- شوفوا.. آنا يايبه معاي اليوم دراعات وشيلات واكسسوارات ومكياچ، وشغلات خاصة.. من اللي خبري وخبركم.
- من صجج؟ لا تشوفنا الحين رئيسة القسم أم محمد.
- أم محمد لاهية عندها اليوم اجتماع برة الوزارة بكبرها.
- خوش عيل.. انزين طلعي اللي خبري وخبركم ههههه
- هههه من عيوني الثنتين، وبعد عندي لكم خلطة سحرية تمنع تساقط الشعر ومضمونة حدها.
- صج؟ ياليت.. الصراحه شعري يتساقط بطريقة مو طبيعية، بس قولي لي اشلون طريقة استعمالها؟
- شوفي.. هذي.. لما تفتحينها تل....
- اش عندكم يا بنات.. اش هالعفسة؟
- انت ييت؟.. ياسر تكفى ممكن تطلع اشوي؟
- ليش؟
- عندي سالفة بقولها خاصة اشوي.
- يعني.. سوالفكم الخاصة ماتطلع إلا بالدوام.
- واااي لا تصير مليق عاد.
- امممم.. شنو هالجنطة اللي معاج، جنها مالت سفر؟
- أوووه انت شكو.. اطلع بس اشوي، روح للقسم الثاني أو تمشي خمس دقايق وتعال.
- مابي.. آنا قاعد لكم اهنيه.. وبشوف شتسوون؟
- قطع لزقه.
بعد ساعة:
- هيفوه.. بسرعه طلعي بضاعتج، ياسر طلع مع ممدوح راحوا الكفتيريا.
- أكيد راحوا الكفتيريا مو للقسم اللي يمنا؟
- إي أكيد آنا سمعت ياسر يقول حق ممدوح أمش نروح الكفتيريا نتريق.
- زين أشوه، بس نادي باجي البنات ابسرعة.
بعد ربع ساعة:
- ها يا بنات، ما عجبكم شي؟
- امبلا.. بس في مقاسات عندج.
- إي.. والمقاس اللي مو موجود راح اييبه معاي باجر.
- انزين الخلطة السحرية مالت الشعر عندج كمية منها؟
- إي عندي أفا عليج.
- وآنا أبي من هالشيلة بس إذا عندج ألوان ثانية.
- مو متأكدة، بس اشوف لج اللي عندي بالبيت.
- انزين هالاكسسوار بجم؟
- بـ 26دينارا.. بسرعة يا بنات اختاروا أخاف أحد يدخل علينا الحين.
- آنا أبي من هالدراعة عندج مقاس أصغر؟
- إي موجود.
- السلام عليكم، أووه بنات اشعندكم؟.. فاتحين محل دراريع واكسسوارات؟
- ايه ده ياجماعة، انتوا عاملين هنا بوتيك.
- وااي قطيعة انتوا اشيابكم، ما مدانا نفتح الجنطة، بهالسرعة رجعتوا؟
- انزين ورونا من هالبضاعة.
- ياسر استح.. مالك شغل بالشغلات الحريمية.
- ليش يعني؟ وريني هالاكسسوار اللي بيدج؟
- أول شي قولي حق منو؟ انت لا متزوج ولا شي؟
- يبــــا انتــي اشعليج؟ آنــــا واحد شراي، بتبيعيني وإلا لأ؟
- هاك شوف.
- ممدوح، اش رايك بهالعقد الحلو؟ خذ واحد مثله حق مرتك إذا سافرت هالسنة لمصر.
- أنا عاوز أشوف الجلابيات، عجباني كتير.
- هيفا، وريه الجلابيات اللي عندج وسوي له خصم، يستاهل ممدوح.
- ترى انت اليوم وايد راهي وتتأمر.
- بتبيعينا وإلا اشلون؟
- تعال انت ومحمود تمقلوا، بس هالجيس مالكم شغل فيه.
- شنو فيه يعني؟
- قلت لك من أول مالكم شغل.
- ان شاء الله بس لا تعصبين فهمنا، فهمنا ههههه.
- ويعه، جبح ويه، بعد تضحك؟
- انزين.. عندج من هالدراعة مقاس ال..
- حلو.. حلو.. صج شي يونس، بضاعه عندي بقسمي، والشباب بعد وياكم يا سلام؟ شي يشرف.
- ممممم أم محمد انتي مارحتي الاجتماع ؟.. آآآنااا آآآسفة.
- لا مــارحت.. وهــذي ثـــاني مــرة اتسوينها، بــس الظاهر مــاينفع معاج إلا لما اسوي لــج لفـت نـظر و..
- آسفة.. والله آسفة.. سامحيني.
- شيلي أغراضج، وجيسج هاللي خاشته تحت الطاولة طلعيه، وتعالي عندي في المكتب نتفاهم، مفهووووم.
- إي مفهوم.. الله يستر اهئ اهئ اهئ.
شي ما شفتوه:
- ها.. هيفوه بشري، اش سوت معاج أم محمد؟
- اممم ردت لي الدراريع، وقالت هالمرة راح اتطوفها عليّ، بس على شرط تاخذ مني الجيس اللي كان تحت الطاولة.
- ليش شنو كان في الجيس؟
- كان فيه.. اللي خبري وخبركم.