الفروانية «ستي»

 أنوارعبدالرحمنيقولون الصراحة راحة، وأنا بالمقالة هذي بفضفض وبتكلم وأضحك وأتغشمر، بدون مبالغة أنا أحب أتسوق في الفروانية خاصة إذا كنت برفه عن نفسي شوي، ومن جم يوم خذيت العايلة وقلت أغير جو ويشترون بعض الشغلات غير المهمة في نظري ولكن عندهم شي ثاني، المهم ظنيت ان بعد العيد ما راح ألاقي زحمة، ولكن الصحيح ان الشارع ما شاء الله كالعادة ازدحام وحوسة، اللي يجذبني للفروانية ان اللي يسوق فيها أكيد يكون باله طويل، لأنك وأنت ماشي بسيارتك تلقى فجأة لف عليك باص أو نط بويهك واحد يعبر الشارع وغير جذيه محد يخليك تلف من اللفات الجانبية فتقط نفسك وسط سرعة وزحمة السيارات، يعني غصب طيب لازم يمررونك، وإلا أدعمهم وطوف (عادي) والحلو بعد في هذا المكان ان ما في أولوية لا لحرمة ولا لشايب أصلا الشياب مساكين مالهم ريل هناك، فالكل يبي يعدي اللي جدامه ويأخذ مكان غيره، ويسكر على الناس، فمو غريبة طول ما أنت سايق تسمع «الهرنات» وإلا يطل عليك واحد يتحلطم أو يسبك لأنك حشرت سيارتك بين السيارات عشان تعدي، وكل هذا وأنت تسوي نفسك ما تدري (يحليلك)، الشي الحلو في هالمنطقة ما تلقى تطبيق للقوانين يعني تشوف الغالبية ما يستعملون حزام الأمان والموبايلات مباشرة على الأذن وعينك عينك، وأنا وحدة للحين ما طبقت قانون (منع استخدام الموبايل بدون سماعات) عشان جذيه المكان هذا يناسبني، وغير هذا اتسكر على السيارات اللي واقفة في الموقف بحجة انك بتروح اشوي وترجع، والمشكلة ان ما في مواقف كافية فوين تروح الناس وتسفط؟ بالفروانية تشوف الباصات اللي صايرة المدة الأخيرة تسابق الريح والسيارات الصغيرة كأنها تقولك البقاء للأكبر وللأقوى، يعني سيارتك تندعم بس عشان الباص حضرته يطوف، الفروانية حلوة لأنك تتعلم فيها قاعدة التطنيش، وتطنش اللي يعترض على سياقتك أو مريت جدامه بالقوة والحيلة، والعالم في الفروانية كلها تعلموا يطنشون ويسوق كل واحد على الجنب اللي يريحه، فما تشوف أحد يهوش عليك بيده غير اليديد على المنطقة و(الحريم)، وغير هذا إذا عندك وقت فراغ وتبي تغير من طريقة تفكيرك وتنسى همومك، فالوقت هناك يروح عليك وينقضي بدون لا تحس، لأن بالك راح يكون مشدود مع طريقة اللي يسوقون وينطون حولك من كل صوب، وبعدها صدقني بتأخذ كيلو كنافة حارة وترجع لبيتكم وأنت تغني بعد. يمكن في ناس تقول ما تحب الفروانية يمكن لبعدها عن منطقتهم أو زحمتها، ولكن أنا بالنسبة لي استانس فيها ولا عندي مشكلة في دخول مضمار السباق والمنافسة في السياقة مع باقي الناس، ويمكن من الأسباب الرئيسية اللي حبيت فيها التسوق في هالمنطقة أني في الغالب ما اشوف «الكاسيات العاريات» بكثرة هناك، وتلقى خليط عجيب من الجنسيات المختلفة والكل رايح يقضي شغله، وقبل لا أختم كلامي أشكر الشرطة هناك والدوريات وأقول لهم رايتكم بيضه، واحس بعض الأحيان من كثر الزحمة في هالمنطقة وكثرة التجاوزات (طبعا أنا.. مو.. وحدة منهم) حلو انكم تتبـــــعون مـــــقولة «طنش تعش» عشان احنا رواد هذي المنـــــطقة ندبر روحنا ونمشــي على الجنب اللي يريحنا وهذي الغمنده. ويعطيكم العافية وتسلمون. شي ما شفتوه: قرائي الأعزاء اللي خليته يحب يتسوق في الفروانية يذكرني بخير ويدعي لي، ترى هالموضوع صدقوني متعوب عليه وايد، طول ما أنا أكتبه لكم أحس اني داشة معركة مع ذاكرتي عشان أصور لكم بس اشلون الفروانية ستي في نظري منطقة حلوة.