(1)
أهل الكـويـت أهـلـك وهـم طـول الـزِّمَـنْ لـك عـون
مالك غنى عنهم ولا هم عنك يستغنون
سير ابمسار الأهل في الچايدة والهون
هم الأهل كلهم مِنْهُو ايفارج هَلَهْ
من صار من دونهم عايش فلا عيش لهْ
لو غاب منهم أحد شدَّك عليك الولهْ
لا انت ابناسٍ لهم وهُمْ فلا ينسونْ
(2)
دوِّر على اللي يفيدك واترك العايل
ما ينفعك في حياتك تتبع المايل
الصيت يبقى ابدْ ولَّا العمر زايلْ
دور عن الهون ولا تتعب بلا فايدهْ
ولا تشغل النفس باتعابٍ وهي زايده
واترك اهمومك بعيد وخلّها شارده
لا تْصيرْ للهم في طول الدَّهرْ شايلْ
(3)
لا تمل كِثر العمل لكويت تستاهل
لا تكون عن ودها في دنيتك ذاهل
هي أمنا ضمت الشايب مع الجاهل
اشلون نرضى أحد منا يضايقها
ينشر بلاويه ويضايق خلايقها
لو كان صادق يعيش العمر عاشقها
ومن خيرها وبرها طول العمر ناهل
(4)
عشنا بديرتنا على كِلْ حالَهْ
ما فينا اللّي دار للمال بالَهْ
ولا الذي يمشي ادروب الرذالهْ
إحنا هوانا من هوى الدار صايرْ
لو دارت الدنيا ومرت عَبايرْ
الكويت أمنا لكن الضِّدْ باير
ترى الوطن غالي ولا من بدالَهْ
(5)
شللي تبي غير راحة ما تفارجها
في بلدة عَز داخلها وخارجها
داير اتنكد بفعلك في خلايجها
اقنع بحالك ولا اطالع إلى العالي
لك ما كِتِبْ لك ولو جاسيت الأهوالِ
الله قسم للبشر حظهم وهو الوالي
نفسك ترى مالها غير أمر خالجها