طارق العلي: «أنا ما أذّي ربعي بس ربعي اللي يأذّوني».. وهيا الشعيبي ستشارك في عمل «الشعبي»

ما عندنا طوائف بالكويت وكلنا أسرة واحدة وبابنا من فولاذ للتصدي للفتن.. ومسرحيتي المقبلة «انفولو» أشرطتي تنباع «چدام عيوني» والمصنفات الفنية ساكتة..  ورفضت أصور مع فتاة ڤيديوهات خادشة أطالب بزيادة الدعم المادي للفرق المسرحية الأهلية.. و«نقابة الفنانين» لا تتبع أي جهة ودورها كبير داود حسين فنان بمعنى الكلمة وعبدالناصر درويش مكسب لأي عمل.. وأتمنى النجاح لحسن البلام مفرح الشمري Mefrehs@ طارق العلي (مع حفظ الألقاب) وجوده في أي مكان يثير الناس كبارا وصغارا، لأنهم يشعرون بانه قريب منهم، يعني بالكويتي «منهم وفيهم»، مهما قالوا عنه لا يهمه لأنه فنان واثق من نفسه وفنان يعرف من أين تؤكل الكتف. بومحمد «طارق العلي» حل ضيفا على «الو الأنباء» فاستقبل اتصالات محبيه وقراء «الأنباء» بكل صدر رحب حتى «المحرجة» لأنه كتاب واضح أمام الناس وليس لديه ما يخفيه عنهم.. فإلى التفاصيل: وصال: شخبارك بومحمد؟ ٭ الحمد لله. عندي سؤال من زمان ودي أسأله حقك؟ ٭ تفضلي. ليش بومحمد في مسرحياتك تتحچى عن الطوائف؟ ٭ أنا ما أتحچى عن الطوائف لأنه أصلا هالشي مو عندنا احنا بالكويت أسرة واحدة ولا يمكن أي احد ان يخترق هالأسرة لأنه بابها من فولاذ وحافظها الرحمن من أي شي وأنا بالعكس في مسرحياتي نحارب هالشي ولا اركز عليه لأني ما أحب الفتنة ولله الحمد ياما حاولوا ان يسوون فتنة بهالبلد ما قدروا لأنه أهله متماسكين ويوأدون أي فتنة مهما كان حجمها والله يحفظ الكويت ويحفظ أميرها وولي عهدها وأهلها الطيبين. أم علي: بومحمد شلونك والله يعطيك العافية؟ ٭ الله يعافيچ أم علي. والله يمدحون مسرحيتك الاخيرة بس للأسف ما شفتها؟ ٭ حياچ بأي وقت تحبينه بعد أسبوعين، وشوفي المسرحية. تم بس عندي طلب بومحمد؟ ٭ امري. والله ودي تردون انت وهيا لأنكم ثنائي ناجح والله يلعن الشيطان اللي دش بيناتكم؟ ٭ الله يهديها ان شاء الله ويوفقها بأعمالها اللي قاعدة تشتغل فيها. علي محمد: شخبارك بومحمد؟ ٭ الحمد لله علي. بومحمد عندي اسئلة صريحة ابي لها اجابات صريحة ممكن؟ ٭ تفضل. وينكم عن الظواهر الشاذة اللي قاعدين نشوفها في مواقع التواصل من فيديوهات وقحة وقليلة أدب ليش ما تتحجون عنها؟ ٭ تحجينا على الظواهر بشكل بعيد عن التركيز واللي يفهم يفهم، خصوصا انك عندك رقابة في المسرح والمفروض انك تحط لها ألف حساب وبعدين انت في بلد قانون فما يجوز انك تشرح اكثر للقضية المطروحة بس احنا نشير عليها بكل أدب ونحذر من هالظواهر السلبية اللي قاعدين نشوفها في الانستغرام وغيره وأنا مرة من المرات رفضت التصوير مع بنية من بنات الفيديوهات الخادشة للحياء في مطار الكويت لأني ما أتشرف أتصور معاها وهالشي مو لاني چدام الناس بس لأني بالفعل ابغض هذي الفئة الضالة. طارق، ليش مسرحياتك فيها بعض الالفاظ الخادشة للحياء؟ ٭ هذا الحجي شكثر يقولونه وشبعت منه ومرات اضحك عليه لأنه مو صحيح، والدليل انه الكثير من العائلات للحين تحضر مسرحياتي وإذا شايفين فيها شي من اللي يقولونه اعتقد انهم يسحبون علي ولا يحضرون والمصيبة اللي يقولون هالكلام عمرهم ما حضروا لي مسرحية وماشين على وكالة يقولون وما يقولون وأحب أقول للي يروجون لي هالكلام استريحوا وأنا عندي زوجة وبنات أخاف عليهم مثل ما خاف على أهل الكويت وعمري ما اجرح مشاعرهم بكلمة خادشة على المسرح اللي مرات نقط فيه قطات ماشية مع حدث المسرحية بس هالقطات ما فيه خدش لمسامع الحضور المتعنين لمسرحي وبعدين الحين الناس يشوفون كل اللي يبونه بالانستغرام ومو بحاجة اني أقولهم عنه في المسرح. صفية مهدي: عندك مسرحية يديدة؟ ٭ ان شاء الله في عيد الفطر مسرحية «انفولو» تأليف نوال العامر وإخراج عبدالعزيز صفر وان شاء الله تعجبكم وتستانسون فيها. راح تعرضون مسرحية «صيدة بلندن» بالسعودية؟ ٭ يوم 15/4 بالرياض وأنا أحب أشكر صاحب السمو الملكي الأمير سعود بن نايف بن عبدالعزيز ال سعود أمير المنطقة الشرقية على كافة التسهيلات والشكر موصول لامين الأمانة بالمنطقة الشرقية فهد الجبير ومحمد الصهيان ولرجال هيئة الأمر بالمعروف والنهي عن المنكر لتفهمهم دور المسرح والتجربة مو غريبة علي بالمملكة العربية السعودية وسبق اني عرضت في الدمام وكانت العروض ناجحة بتواجد جمهور عائلي كبير وكذلك بالرياض واحنا نحترم قوانين كل بلد نعرض فيه لأنه القوانين متغيرة في الدول الخليجية. فيها تغييرات مسرحيتك في عرض السعودية؟ ٭ طبعا العنصر النسائي استبعدته وهناك بعض المشاهد تم تغييرها لتناسب الجو في السعودية، ولله الحمد جميع الدول الخليجية اللي نعرض فيها نلقى فيها تسهيلات كثيرة والجمهور السعودي عارف مسرح طارق ويتابعه وايد. محمد: مبروك على رئاسة فرقة المسرح الشعبي؟ ٭ الله يبارك فيك وفرقة المسرح الشعبي فرقة عريقة واكبر من اسمي وأنا أشكر اخوي د.نبيل الفيلكاوي على هذا التكريم والتشريف وتنازله يدل على أخلاقه الكريمة لأنه يرأس نقابة الفنانين وان شاء الله نسوي شي لهذي الفرقة العريقة في المستقبل القريب وأنا في هالمناسبة أطالب المجلس الوطني للثقافة والفنون والآداب بزيادة الدعم المادي للفرق المسرحية الأهلية لأنهم مو جمعيات والدعم الحالي ما يوفي التزامات هذي الفرق وأملنا كبير بأخونا الأمين العام م.علي اليوحة في دعم هذه المطالبة. بس يا بومحمد في فنانين مو راضين انك تكون فرقة المسرح الشعبي العريقة؟ ٭ والله هذا رأيهم وطارق العلي ما فرض نفسه انه يمون رئيس الفرقة الأخ د.نبيل الفيلكاوي تنازل عن منصبه وقال لي انك انسب واحد انك تقود الفرقة في هذا الوقت وأنا وافقت واللي مو عاجبه بكيفه ما دام أعضاء الجمعية العمومية بالفرقة موافقين ومؤيدين لتوجه د.نبيل الفيلكاوي. هل نسمع قريبا أخبار زينة لفرقة المسرح الشعبي؟ ٭ إن شاء الله وأنا أول ما استلمت لقيت نص مسلسل جديد مركون في الأدراج راح نقدمه للتلفزيون بنظام المنتج ويكون أبطاله جميع أعضاء فرقة المسرح الشعبي بما فيهم الفنانة هيا الشعيبي لأنها لها حق المشاركة ولها الحق في الكرسي اللي قاعد عليه وصحيح انه بينا قضايا بس مو من حقي ان امنعها من الشغل مع فرقتها المسرحية وإن شاء الله الأمور تسير على ما يرام ويطلع هالمسلسل الى النور. بومحمد ليش ربعك الفنانين يحاولون إيذاءك بالكلام؟ ٭ «يضحك» مشكلتنا منا وفينا والمصيبة أنا في شغلي وربعي يؤذوني وأنا عمري ما أذيت احد فيهم ما أقول الا الله يهدي هالفنانين ويبعدون عن الحجي الفاضي. منو اللي دخلك للفن؟ ٭ الفنان بدر الطيار هو اللي دخلني الفن ومن يقول غير هالحجي ما عنده سالفة. طارق وينك عن مسرح الطفل؟ ٭ والله أنا متابع له بس طموحي مو مسرح طفل أنا طموحي اني أقدم مسرح كبار وأناقش فيه القضايا الموجودة بالساحة بأسلوب طارق العلي وليس بأسلوب آخر. شنو دور النقابة في المحافظة على الفنانين؟ ٭ دورها كبير والدليل ما حدث للفنانين الكبار لما حولوهم النيابة لعبت النقابة دور لا يمكن لاحد ينكره ولله الحمد حاليا تسير على خطى ثابتة وأعضاؤها تعدى عددهم الخمسين عضوا وكلهم من الشباب ولله الحمد الجميع حاليا يشعر بسعادة لوجود نقابة وهالنقابة يقودها شخص عزيز وهو د.نبيل الفيلكاوي اللي استطاع ان يتحمل كل شي علشان تكون عندنا نقابة ولا أنسى دور شخص آخر وهو الاعلامي فيصل الرشيد اللي أتمنى ان يعود للديرة وهو بخير وسلامة. دعم النقابة من وين؟ ٭ النقابة محد يدعمها لأنها ما تتبع أي جهة وهي تتبع منظمات عالمية لذلك شغلها ماشي على ما يرام ونتمنى ان تكون هذي النقابة لجميع الفنانين لأنه ستكون هي المدافع الأول عنهم وهي اللي تطالب بحقهم وتساعدهم اذا لا سمح الله احدهم يتعرض لعارض صحي يصعب علاجه في الديرة وخصوصا الفنانين اللي ما عندهم واسطة، ولكن هناك بعض الفنانين للحين يهاجمون هالنقابة ويقللون من شأنها ولله الحمد هذا الهجوم يعطينا القوة في الاستمرار بتحقيق أهداف النقابة التي أنشئت لأجلها. طارق مسرحياتك تنباع بالشوارع، هذي ما تسبب لك خسارة؟ ٭ والله هذي مشكلة كبيرة أتعرض لها وللأسف الاخوان في المصنفات الفنية اذا رحت لهم ما يفيدونك بشي ويقول اذا شفت احد يبيع مسرحياتك مسكه واتصل علينا نجيك وأنا للأسف أشوف كل يوم أطفال صغار مستغلين من قبل ناس ينسخون هالمسرحيات علشان يبعونهم هالاطفال وإذا طحت عليهم يطلع هالطفل بدون أو من جنسيات ثانية شسوي فيهم امشي واخليهم بس لازم المصنفات الفنية يسوون شي علشان نحافظ على حقوقنا الفكرية والأدبية وعلى فلوسنا اللي قطيناهم على تصوير هالمسرحيات وأتمنى ان هالسالفة لازم تنتهي وينحط لها ضوابط علشان لا تكبر وتضيع حقوقنا چدام عيونا واحنا ساكتين. العلاقة الجميلة اللي بينك وبين داود حسين شنو سببها؟ ٭ مالها أي سبب بوحسين فنان بمعنى الكلمة وعلاقتي فيه من زمان وأنا هالشخص ما شفت منه الا كل خير وهو بعد ما شاف مني الا كل خير وأتمنى له كل توفيق ونجاح في أعماله وان شاء الله نشوف مثل هالعلاقات في المجال الفني لأنها تصب في مصلحة الفن. شلون شايف نجاحات حسن البلام حاليا؟ ٭ والله حسن يستاهل كل خير والقروب اللي معاه جميل جدا والله يوفقهم بأعمالهم المسرحية والتلفزيونية. راح نشوف عبدالناصر درويش في مسرح طارق مرة ثانية؟ ٭ ليش لا.. عبد الناصر درويش نجم وأنا من الناس اللي اضحك عليه لما يجسد دور المرة الهبلة و«العبيطة» وهو نجح في مثل هالادوار المركبة والله يوفقه وبعدين عبدالناصر مكسب لأي عمل يشارك فيه. الإنسان الفنان في مداخلة هاتفية لأستاذة قسم التمثيل والإخراج في المعهد العالي للفنون المسرحية الفنانة أحلام حسن كشفت فيها الجانب الإنساني لضيف «الأنباء» النجم طارق العلي الذي شجعها على استكمال دراستها لنيل شهادة الدكتوراه وكيف احتضنها وسهل لها الكثير من الأمور وكأن والدها لم يغادر هذه الدنيا. وتضيف أحلام: بومحمد إنسان بمعنى الكلمة وفنان كبير له وقفات معي لا تنسى وهو الأب الروحي لي الذي يشجعني دائما وأتمنى له الصحة والعافية.   تلاميذ في مدرسته الممثل الشاب خالد المظفر شكر النجم طارق العلي لقبوله له في أعماله المسرحية حتى يكون احد تلاميذ مدرسة طارق العلي ولو انه «يعصب» عليه ويشد عليه، إلا انه عرف ليش يشد عليه بعد نجاح دوره في مسرحية «صيدة بلندن» المعروضة حاليا. وتمنى المظفر في ختام مداخلته الهاتفية أن يكون دائما عند حسن معلمه طارق العلي.   داعم للشباب مدح الفنان خالد بوصخر النجم طارق العلي لتعامله الراقي مع الفنانين الشباب وهذا ما شاهده بأم عينه عندما شاركه في مسلسل «وسع صدرك» الذي استفاد منه كثيرا لمواصلة مشواره الفني سواء بالتلفزيون أو المسرح. من جانبه وعد النجم طارق العلي الممثل خالد بوصخر بأن يشاركه على خشبة المسرح لأنه يمتلك موهبة حلوة.