بولند: المصيبة أن الاختصاص «ضايع» في تلفزيون الكويت

بشار جاسم محمد بولند، احد اهم المخرجين الشباب بتلفزيون الكويت، فهو خريج جامعة كاليفورنيا اعلام، اخراج تلفزيوني، واخرج العديد من البرامج منها نيوزيكا ونجوم على الارض وكلمة راس وديوانية الاسبوع. «الأنباء» حاورته في العديد من الامور منها الاخراج والمذيعون الذين عمل معهم والبرامج التي اخرجها والعديد من المواضيع، واليكم تفاصيل الحوار: انت خريج افضل الجامعات في الاخراج التلفزيوني، هل انت راض عن مستوى البرامج عندنا بالتلفزيون؟على امكانيات تلفزيون الكويت اي راضي كإضاءة وديكور وغيرها من الامور. انت كمخرج شنو تطالب الوزير كتطوير؟اطالب بمعدات جديدة وغرفة كونترول متطورة وكوادر تلفزيون اهي اساسا اللي سوت وطورت القنوات الخاصة، خصوصا بثنا للحين انالوج وما صار ديجيتال ومهما اخرج واضبط اضاءة البث يطلع العكس وهم نطالب باستديوهات اكثر. ندش بالاسئلة الصريحة ولا انت ما تحب الصراحة؟دش بالاسئلة وانشاء الله محد يزعل (يضحك). انت مع البرنامج اللي يخرجونه مخرجين او ثلاثة وثلاثة او اربعة معدين؟في برامج تحتاج 3 معدين واكثر، وفي برنامج يحتاج اكثر من مخرج. والسفينة چم قبطان يقودها؟واحد (يضحك)، بس خل اقولك شغلة ترى البرامج او بالاحرى البرنامج اللي اخرجه مثل نيوزيكا انا اخرجه مع اخوي جاسم العتيبي، فأهو يخرج التقارير وانا بالاستديو وساعات عالهوا يساعدني فشيء طبيعي ان يكون فيه اسمان بالاخراج، مثل مساء الخير يا كويت وايد تجينا فاكسات. مقاطعة.. «مساء الخير» وضعه يختلف لأنه يتكلم عن 90% من اللي يصير بالكويت باليوم الواحد مو مثل برنامج منوع. صدقني مثل ما قلت لك ان البرامج اللي فيها اكثر من مخرج، البرنامج يتطلب فيها هالشي، والبرنامج اللي ما يتطلب اكثر من مخرج فأنا ضد هالشي ومعاك في الكلام اللي قلته وعندك برنامج «ديوانية الاسبوع» اللي قدمه د.شفيق الغبرا كنت أخرجه بروحي. بس المخرج له رؤية بالبرنامج وما يصير تكون أكثر من رؤية؟صح كلامك لكن اذا قعدنا كمخرجين اثنين مع بعض وتفاهمنا على الخطوط الرئيسية صدقني راح يكون شغل حلو لكن أنا ضد كثرة العدد لوجود عدد وبس. شنو البرنامج اللي تمنيت انك تخرجه؟قبل البرنامج انا كان ودي وتمنيت اني اخرج حفلات هلا فبراير وليالي الوطن عجبني اخراجها. والبرنامج؟حبيت برنامج العراب وكنت أتمنى اني اكون ضمن فريق العمل. ترى «العراب» طاولة وكرسيين ودرج وفرقة ليش ما تسوي نفسه.احنا كقناة حكومية...ليش دائما تكررون هالعبارة، ترى اللي اعرفه ان القناة الحكومية ممكن تصرف أكثر من الخاصة لأنها مدعومة.صح كلامك بس عندنا خطوط حمراء ولا تنسى ان ورانا مجلس الأمة فما نقدر نبدع زيادة والمصيبة ان الاختصاص ضايع بتلفزيون الكويت وشلون خريجين المعهد العالي للفنون المسرحية يخرجون برامج تلفزيون ومهندس الصوت صار مخرج والطباع صار مخرج ولا تنسى ان قلة الدورات عندنا اثرت على التلفزيون يعني ما اعطي دورات حق ناس تبي تتقاعد من الوزارة. منو المخرج اللي تستمتع وانت تخرج معاه؟الاستاذ علي الريس طبعا ويشرفني ان يكون اسمي تحت اسمه في برنامج نجوم على الأرض، كذلك جابر الحربي استفدت منه وفوزان الفوزان ومن الشباب اللي احس بمتعة الشغل معاهم احمد النجدي ومحمد الموسوي وجاسم العتيبي. والمذيع اللي استمتعت معاه في الشغل؟عندك منيرة عاشور رغم مشوارها الإعلامي الكبير إلا انها تتقبل من أي شخص كذلك حليمة بولند ومحمد لويس ونادر كرم، وعيد الرشيدي مذيع مثقف ومشكلته الوحيدة انه ما يجب يقدم برنامج المنوعات. والضيوف اللي صدمتك شخصيتهم وتعاملهم؟طبعا عبدالله الرويشد فهو رجل متواضع وأذكر اني سجلت له سهرة تمنى تقريبا 5 ساعات وما مل وقال لي يا محمد اخذ وقتك بالشغل، كذلك عبدالكريم عبدالقادر وصباح ولطيفة التونسية تشرفت بلقائي معها قبل البرنامج وهذا كله يضيف لي كمخرج. شتحب تقول بالنهاية؟احب اقول للي يقولون ان تلفزيون الكويت انتهى اقول لهم ان الكويت من أول التلفزيونات اللي بثت بالملون وتلفزيون الكويت داخل كل بيت وراجع بقوته وعمره ما راح ينتهي لأنه باقي باسمه وصرحه الاعلامي مو بالاشخاص وشاكر لكم على هالحوار الجميل يالـ «الأنباء» وان شاء الله محد يزعل من كلامي. الصفحات الفنية في ملف ( PDF )