مشعل الجاسر: ما تمنيت المشاركة في «الهدّامة» لأني مثّلت بـ «الدروازة»

بشار جاسم المذيع والفنان مشعل الجاسر محظوظ جدا من ناحية الأدوار التي يجسدها بالدراما فبدايته كانت مع أدوار البطولة في العديد من المسلسلات منها عذاري وبين الهدب دمعة والدروازة في كل دور يقدمه الجاسر يحاول ان يكون مختلفا عن الدور الآخر. «الأنباء» دردشت مع مشعل وناقشته في أعماله الأخيرة، واليكم التفاصيل: مشعل خلنا نتكلم عن دورك في مسلسل «رسائل من صدف» انت الدور حبيته؟ اي بصراحة حبيته وايد خصوصا النقلة في الشخصية نفسها والمراحل العمرية. على طاري المراحل العمرية كانت بالعمل وايد اخطاء في ذاك الزمن؟ ما في عمل ما فيه اخطاء والحمد لله عمل «رسائل من صدف» ناجح واذا نجاحه 80% فهذا انجاز والـ 20% اخطاء وحتى افلام هوليوود فيها اخطاء والحمد لله على هالنجاح. بس ستايل النظارة اللي لابسينها انت وفيصل العميري قديم وما تغيرت فوق العشر سنوات؟ ترى عادي الموضوع وانا اتكلم عن نفسي وايد دكاتره نظارتهم چذيه واللي تتعايش مع كل العصور. بس شكل النظارة اندثر من زمان؟ (يضحك) لا هم عادي وحاولنا نوصل الشكل العام للشخصية وأنا شاريها من احد محلات النظارات. طيب هم دورك في مسلسل «وعاد الماضي» مو مقنع؟ شفيه بعد.. وليه (يضحك). انك ولد بدرية أحمد اللي شكلها بالمسلسل يوحي بانها بالعشرينيات؟ روح اي مجمع وشوف الولد مع امه چنهم اخوات. بس بدرية مصغرة شكلها وايد بالعمل؟ يعني الخطأ مو خطئي ووجه السؤال لها مو لي. وكان من المفترض ان يعرض مسلسل «رصاصة رحمة» برمضان يعني راح تطل على المشاهدين بثلاثة ادوار وتشتتهم؟ صح كلامك والحمد لله ان تأجل عرضه وانا عموما اكتشفت شغلة ان لكل فضائية جمهور معين يعني حتى لو تشارك في أكثر من مسلسل راح يتابعك المشاهد. وشنو دورك في رصاصة رحمة؟ راح يكون دور عمري ومفاجأة. هم انت قلت نفس الكلام عن دورك بالبارونات ان دور عمرك والعمل ما نجح؟ لا بالعكس لما انعاد عرضه مرة ثانية نجح. ليش تكابر بالخطأ؟ (يضحك) والله ما أكابر وانا سمعت ردود افعال حلوة عنه ولما انعرض على «الراي» كان وقته مو مناسب. بأي مسلسل حسيت انك ممثل وعندك ادوات التمثيل؟ بمسلسل الدروازة. وكنت خايف من الدور؟ وايد وايد وحتى نبرة صوتي حاولت أغيرها مع المخرج خلف العنزي وشعري حلقته على «الزيرو». على طاري الدروازة تمنيت انك تشارك في الهدامة؟ الهدامة عمل اخراجه قوي لكني ما تمنيت اني اشارك فيه علشان ما اكرر نفسي كوني مثلت بالدروازة وعلّم عند الناس. وشنو الدور اللي تمنيت انك تمثله؟ بصراحة دور الزير سالم للنجم سلوم حداد. وشنو العمل اللي عجبك؟ أم البنات لأنه عمل متكامل وحلو وهم رسائل من صدف. ووين المذيع مشعل الجاسر من البرامج؟ والله ياي بالطريچ وعندي عروض وايد بالعديد من المحطات وللحين ما اخترت شي معين. وشلون تنسق بين التمثيل والتقديم؟ البرنامج ان كان اسبوعي راح ياخذ مني ساعة وما راح يؤثر على التمثيل.