سونار

أنوارعبدالرحمن حصه زوجة شابة لديها من الأولاد أربعة وبنت واحدة.. واليوم أخبرتها الدكتورة إنها حامل، فما هي ردة فعلها.؟ نتيجة الحمل- سالم.. عندي لك خبر موزين.. ترى طلعت حامل - مبروووك.. ليش خبر مو زين احمدي ربج.. في ناس تتمنى العيال - أي أكيد انت مستأنس.. لأنك ماراح تشيله تسعة شهور ابطنك.. وتربيه، عاد لو هالمرة اييب ولد بموت من القهر.. كافي هالأربع صبيان اللي عندي ومطلعين براسي الشيب.. ومنورة بنتي بعد قلبي ضايعه بينهم. - اللي ايي من الله حياه الله.. عسى بعد بتتشرطين.. والولد يشيل اسم العايله وهذي نعمة من رب العالمين. - شسوي في الولد إذا يشيل اسم العايلة ومايشيلني إذا كبرت.. مافي مثل البنت بحنانها على أهلها.. ابهالزمن ماتنفع إلا البنت.. ان شاء الله ربي يعطيني بنت عشان تصير أخت حق منورة.. دام حملت بالغلط. - بالغلط ؟!.. أقول تعوذي من ابليس وحمدي ربج. مع أولادها- يمه.. سألتي الدكتور شنو في بطنج ولد والا بنت؟ - يقول مو امبين.. المشكله الحين أي لون أختار للمستشفى حق استقبالي. - ان شاء الله يا يمه اتييبين ولد عشان نصير خمسة.. وتكشخين فينا. - لا.. مابي ولد.. كافي علي هاللويه معاكم.. ان شاء الله اييب بنت. مع زميلاتها في العمل- ها حصه.. شنو قالج دكتور السونار.. بنت ولا ولد. - يقول.. مو امبين. - اشدعوه عاد.. الحين مافي سونار مايعرف شنو في الحامل. - هذا اللي صار.. بعد شسوي؟ - عاد اتصدقين شكلج فيج ولد.. مثل حملتج بولدج حمود. - من قال؟ بالعكس أحس انها مثل حملتي في بنتي منورة.. لا تفاولين علي. قبل الولادة:- سالم.. أنا الحين متوهقه شنو اللون اللي بحطه بغرفتي بالمستشفى أزرق ولا وردي.. ومادري شحط حق استقبالي حلو للتقديم.. كل ما اسوي سونار يقولون مو امبين شنو فيني - صج بطرانه.. الحين فكري بسلامتج.. وسلامة الياهل بعدين فكري شنو بتحطين بالمستشفى.. وردي وإلا أزرق. - يعني تبي رفيجاتي اييوني بالمستشفى وما أزين غرفتي.. ولا أقدم لهم حلو وأضيفهم..؟ - يعني الحين اشبتسوين؟.. دام ماعرفتي شنو فيج.. خلاص حطي لون بيج وإلا أي لون يصلح للولد.. والبنت.. صج انكم حريم ناقصات عقل، تفكرون بالاستقبال أكثر من الولادة. ساعة الولادة- آآآي ساااالم الحقني بسرعه ياني الطلق - هااا.. يالله بسرعه امشي المستشفى - آآآي.. بس لا تنسى إذا وديتني المستشفى.. تييب معاك الحلو من أم خالد.. وفرشة غرفتي اللي حاطتها عند أمي.. والزينة اللي طلبتها.. واتصل بالمصورة عشان اتصور الياهل أول ما ينولد.. ودز مسجات حق رفيجاتي من موبايلي ولا تنسى ال... - بس.. بس خلاص حشى.. جنج رايحه حفلة.. مو جنج رايحه توليدين. - آآآي.. زاد الطلق في المستشفى- مبروووك.. يامدام.. جالك ولد - ولــد ؟!! لأ.. مــابــي.. آآآه... اهــــئ اهــــئ اهئ شي ما شفتوه زميلاتها في العمل:- يابنات.. دريتو؟.. ترى حصة يابت ولد - صج؟.. عشان جذيه خاشه علينا تقول دكتور السونار موعارف شنو فيها. - عيارة الحريم.. صار عندها الحين خمس اصبيان. - إي أكيد.. خايفة من الحسد.. صج حظها يكسر الصخر.