أنوارعبدالرحمن
لوحات معدودة رسمتها لنا الحياة بين شخصين، لنشاهد جزءا منها..
( 1 )
- خالد.. ترى ماصارت، مليت وأنا أنطر متى تتقدم لي؟
- قلت لج.. فتره بسيطه وكوّن نفسي وبييج عالحصان الأبيض اللي وعدتج فيه ونطير على بساط الريح
- انزين شقول للناس والخطاب اللي قاعدين اييوني وأرفضهم؟
- من صجج في أحد يفكر يخطبج؟!!
( 2 )
- تهقى منو كان يحب أكثر قيس وليلى والا آنا وأنت؟
- قيس وليلى طبعا
- شنووو؟ وانته؟!!
- أنا من يوم فتحتي الدريشه اللي بيني وبينج ودخلت منها.. طلعتج من قلبي!
( 3 )
- منى، اتصدقين اليوم قريت عن برجي وبرج محمد، لقيت مانتناسب كلش، وآنا خايفه اتزوجه ويطلع صج هالشي، شسوي الحين؟
- شوفي إذا برجه يناسب برجي؟!!
( 4 )
- ألو منو معاي؟
- معجب
- ياربي ترى ماصارت كل يوم تتصل؟!
- لأن عندي موضوع ضروري
- أبييه،انزين من متى انت معجب؟
- من يوم اولدتني أمي!
- وليش ساكت كل هالمده
- ما سكت.. كل ما قلت لج تضحكين وتسكرينه
- ابييه استحيت.. انزين انت صاج وإلا تلعب؟
- لا والله صاج
- عيل بقولك من الحين أنا ماعندي هالسوالف البطاليه، أنا وحده سيده، إذا تبيني صج اتيي من الباب وتخطبني من أهلي
- شنو؟.. انتي مجنونه! سألتيني منو معاي، قلت لج معجب.. هذا اسمي يا آنسه، حوليني عالمدير لأن عندي له موضوع ضروري وحضرتج كل يوم اتسكرينه بويهي!
- وااااي يالفشله!
( 5 )
- خالد ترى أنا وصلت حدي.. كل يوم قاعد اتحلم باسامي حريم وأنا صابره، لاتخليني افيوم أخنقك وأريح قلبي منك
- شنو؟ لا اتسوينها بعد انت عقلج هالأيام مو معاج
- يعني شنو آخرتها معاك؟ أول كنت اتحلم باسم نهى وبعدها ســــعاد، وبعـــدها هناء ومن يــــومين تريلا، منو هذي بعد العميه اللي طايح تحلم فيها؟!
- تريلا؟!.. اممم احم احم، كنت قاعد أغني تري لا.. تري لا
- تريلا يعني اتغني؟.. ها؟!!
- إي.. ياللي اذبحج الشك والغيره.
- هاك موبايلك.. شوفها داقه عليك امية مره
- هااااا!!
( 6 )
- عبير، اليوم مر على زواجنا عشر سنين عشان جذيه.. شبيت لج هالشمعه وسكرت الليتات كلها، وبنعيش على أجوائها هذي الليله وعلى نورها
- رومانسي حدك،عيل قولي دام اليوم صاير لي شاعر، شنو تمثلك هالشمعه؟
- تمثل لي سنوات حب بيني وبينج.. بس جمالج أكبر من جمالها، ونورج أروع من نورها، وانتــي؟
- آنا، أشوف دموعها ترسم الدموع الساكنه في قلبي، وذوبانها يصف شعوري بالخذلان والأسف على اليوم اللي تزوجتك فيه!
- شتقولين انتي؟!.. شنو هالكلام اللي قاعد اسمعه؟!
- وباقي شي ما سمعته
- شنو بعد أكثر من هاللي قلتيه؟
- مجرد نفخه مني عليها بنهيها وانهي حياتي معاك!
- لأ يا مينونه لأ لأ!!
- أفففف
- عبير.. عبير.. ويييينج؟!!
شي ماشفتوه
( 7 )
- اتصدق اني مستانسه منك، لأنك هالأيام كل يوم تزورني، كفو ياولد أخوي فيك البركه
- أكيد ياعمتي انتي غلاج عندي أكثر من كل عماتي بس لا تقولين لهم هههه
- هههه لا تطمن
- (أمر على الديار بغير حاجة لعلي أراهم أو أرى من يراهمو)!