أنوارعبدالرحمن
هل لازالت مشكلة البحث عن ملابس أنيقة ومتماشية مع ما يطرح في السوق من «موديلات» جديدة، تؤرق كثيرات من المبتليات بالسمنة..؟!
- هيا.. شوفي هالمحل عنده مقاسات كبيرة؟
- انتي للحين امصممة اتدخليني هالمحلات؟.. ماتدرين ان وزني نقص 5 كيلو.
- يا معودة انتي يبيلچ تنزلين من هالشحم 30 كيلو مو 5 كيلو!
- كلامچ هذا كلام الدكتورة اللي ماعندها سالفة.. تبيني انزل وزني وأصير باربي.
- مولازم اتصيرين مثل الباربي.. بس عالأقل يصير وزنچ طبيعي.
- واااي اتبطين الجبد.. يا كثر ما اتدقرين، وبعدين آنا دايما ألبس كورسيه، يعني يغطي على بعض البلاوي.
- ياليت الكورسيه عاد يسوي شي معاچ.
- المهم.. اشرايچ ابهالبدلة؟.. حلوة صح حق استقبال أحلام؟
- أول شوفي مقاسها.. هذي ترى مو قدچ.
- لو سمحت عطني مقاس رقم 5.
- من صجچ تطلبين مقاس رقم 5؟.. انتي يبيلچ رقم 6 وبالعزر يصير قدچ.
- ياربي.. انتي ماتكرمينا بسكوتچ؟!.. الحين بقايسه وأراويچ اشلون قدي.
- خلاص.. روحي لبسيه، كاهي غرفة القياس.. وبنشوف اللي تقولينه.
- ها.. اشرايچ؟
- انتي شفتي شكلچ اشلون قبل لا اتراويني؟!
- ها؟!.. مممم ميخالف، لأن مو معقولة أشتري بدلة مقاسها كبير وأنا وزني قاعد ينقص، وبعدين الهدوم بتطيح بچبدي.
- لا تخافين.. ماراح اتطيح ابچبدچ.. وإذا تبين تقتنعين ان هذا المقاس مايناسبچ روحي شوفي نفسچ بالمنظر، وشوفي شكلچ يفشل، شي طالع منيه ومنيه، يعني تلال وجبال وصواريخ بعد هههه
- اهئ اهئ اهئ.. واااي لي متى آنا چذيه؟!
- هيوه.. هيوه.. شوفي هالبنت اللي ادخلت المحل من اشوي.
- اشفيها؟
- طالعيها.. خذت البدلة اللي نفس بدلتچ.. اتصدقين اختارت مقاس رقم 1؟!
- ابيييه.. لا تقهريني أزيد !
- صبري.. صبري.. خلينا انسوي نفسنا انطالع بهالهدوم ليما تقيس البدلة ونشوفها عليها.
- يعني تبين اتحريني لأن المقاس اللي معاي ماصار قدي؟!
- طالعي الهدوم وانتي ساكتة، خل ننطرها تطلع من غرفة القياس.
- كاهي.. اطلعت، شوفيها ابسرعة.
- ابييه.. طالعي اشلون صارت البدلة عليها؟
- اتهبل.. اتزوق !
- شي.. موطبيعي.. صچ اش ياب الياب !
- يعني.. يا هانم.. الموضوع كله.. (الرك على الحشو) !
- إيه.. للأسف صح كلامچ.. امشي نطلع، ياليتها ما اختارت البدلة اللي اعجبتني.
- يعني وين تبين انروح؟
- نروح.. محل للخامات باخذلي قطعة خام وأخيطها.. ياختچ الستر زين !
شي ماشفتوه :
- هيوه.. اشرايچ ابهالبدله اللي في الكتلوج، مو لايقة على عارضة الأزياء صح؟!
- إي طبعا.. هذي البدلة يبيلها وحدة مثل مقاسي ومقاسچ.
- يعني قصدچ مقاس الـ xxxl؟!
- هههه.. اي طبعا.. يختچ الثقة زينة.
- عيل اشرايچ نروح محل الحلويات.. مشتهية كنافة وخاطري بالوربات؟
- أفا عليچ.. أفا.. وانا عند ويهچ هههه.