حنان أبلتي

أنوارعبدالرحمن طفلة صغيرة أحبت معلمتها، ولكن إلى أين وصل هذا الحب؟! بين المعلمة نجلاء وأبوروان - بو روان، اتصدق آنا من دريت انك انفصلت عن مرتك، وبنتك عايشة عندك وفاقدة حنان الأم، وآنا أفكر فيها ليل نهار، ودي أعوضها لو شي بسيط عن اللي افقدته. - فيچ الخير وما تقصرين يا أبله نجلاء، أنا شايف اهتمامچ في بنتي واضح واللي اتقومين فيه عشانها يا ليت كل الأبلات مثلچ. - عشان جذيه آنا اعطيها الأولوية في الصف وبكل شي أكثر من أول، وكل ما حسيت انها ضايق خلقها أضمها على صدري، عشان تحس بالأمان. - اهي دايما تكلمني عنچ وايد في البيت، وتقول لي الأبله تحبني أكثر وحدة بالصف. - اتصدق يا بوروان، آنا حساسه وااايد وقلبي ركيك حده، واتأثر بهالأمور والمواقف بسرعة، اتصدق لو أقولك شنو صار فيني يوم شفت ذاك البرنامج اللي حطوه عن اليتامى واللقطاء، تمنيت اني أكون أمهم كلهم وأحسسهم بالحضن الدافي اللي محرومين منه. - باين من كلامچ ان بقلبچ حنان وطيبة نادر ما تلقينها بهالزمان. - الصراحة، احرجتني بكلامك هذا، وآنا دايما أدعي ربي يعطيني الزوج اللي يقدر هالصفات الحلوة فيني. - انتي مو متزوجة؟ - لا مو متزوجة، كنت مالجة، بس انفصلت بعد يومين من الملجة. - أفا.. لا، ما يستاهلچ الصراحة، عموما إذا تامرين على شي في يوم، آنا بالخدمة ومن عيوني. - هههه، تسلم عيونك بعد عمري. - بعد عمري؟! - لا.. وي، اطلعت بالغلط! بين روان وأبيها - يبا. - هلا حبيبتي روونه. - أنا أحب أبلتي نجلاء وايد لأنها دايما تمدحني جدام البنات، وتعطيني بفك وحلاو وكاكاو، ويوم قلت لها: أبله آنا أحبچ واااايد، قالت لي قولي لبوچ! - امممم ليش يعني؟ - عشان اتعرف اني أحبها. - ها؟.. إي.. عرفت، حتى آنا. - شنو؟.. أنت تحبها بعد؟ - لا.. أقصد حتى آنا أدري انچ اتحبينها. - يبا.. آنا ودي أعزمها في بيتنا، بس إهي قالت لي ما تقدر تستحي منك، يبا أنت قولها اتيي يمكن ترضى. - انزين آنا عندي لچ فكرة، اشرايچ نخلي أبله نجلاء تعيش عندنا على طول، عشان تكون يمچ دايما؟ - يعني يصير يبا؟ - إي يصير ونص! بين أبوروان والمعلمة نجلاء - أبله نجلاء، ممكن أكلمچ بموضوع خاص، ويا ليت ما ترفضين طلبي. - آمر يا بوروان، أنت تمون! - انتي عارفة ان روان بنتي كل يوم اتييب سيرتچ بالخير، وما قامت تستغني عنچ كلش، وأنا خايف ان السنة الياية تنتقل لصف ثاني، ويضيق خلقها ويصير معاها كآبة لأنچ ماراح اتدرسينها. - إي حتى آنا، قاعدة احاتيها، بس شسوي ما بيدي شي، غير اني أحاول اتواصل معاها بالطريقة اللي أقدر عليها، ولو بيدي أكون يمها 24 ساعة! - آنا مقدر لچ هالشي، وحبچ واضح حق بنتي وقاعد أحس فيه. - أصلا روان هذي عمري وقلبي وروحي وحياتي ودنيتي و.. - عشان جذيه آنا بعرض عليج انچ تقبلين الزواج مني، إذا كان ما عندچ مانع، وتفكرين على راحتچ بطلبي هذا. - ها؟.. وي.. أبيييه فاجأتني بوروان بهالموضوع. - أنا أتمنى تكونين لي زوجة، وأم ثانية لبنتي، وانتي أحق وحدة فيها. - اتصدق مادري شقول، أحرجتني، أبيييه استحي. - لا تقولين شي الحين، واخذي وقتج بالتفكير. - لا مـــا لاداعـــي.. أنا موافقة.. موافقة! شي ما شفتوهبعد الزواج: - يبا.. يبا. - يا ربي بنتك ترى وايد صايرة لزقه، خلها تفك عنا، وإلا ودها لأمها أو يدتها يربونها. - هااا؟.. وين كلامچ أول، انچ تحبينها وهي قلبچ وروحچ ودنيتچ؟ - روح زين، يعني انت متزوجني عشان أصير مربية حق بنتك؟ - أفااا.. أثاريچ طلعتي منهم؟! - ها؟.. منو اللي منهم؟!