أنوارعبدالرحمن
«ليش؟»، هي عدة تساؤلات طرأت على ذهني، ليست بالضرورة تنطبق على جميع الناس، لكن تشمل حياة البعض منا، وقد يردد جزء منهم معي.. ليش؟
ليش دايما بالأفلام القديمة يصورون الشخص المبدع انه ما يعتني بنفسه ولا يتنظف وكله غارق بين أوراقه، غير زقارته اللي طولها عشرة امتار، وكأن هموم الدنيا فوق راسه، وما يتزوج ولا يحب كثرة العيال، ويقابل الناس بمواعيد وكله مشغول، واللي يشوفه يقول «بيحل لغز هالعالم»؟!
ليش مسلسلاتنا العربية كلها صارت مكررة، قصص حب وزواج وطلاق ودموع ومآس، واكثرت سالفة الطراقات في كل الحلقات التلفزيونية؟
ليش اعيالنا صاروا يمشون كلمتهم علينا، وياكلون قبلنا، ويحددون حتى مكان طلعتنا ووناستنا؟
ليش صارت المدارس والدراسة مأساة، لدرجة ننحرم من زيارة أقرب الناس لنا في أيام الدراسة، عكس أيامنا قبل؟
ليش قمنا انحاتي الأمور المادية على حساب حياتنا الاجتماعية وظروفنا الخاصة؟
ليش نحط أولويات لرأي الناس، مقابل سعادتنا وراحة بالنا؟
ليش أغلب شبابنا، صار يسوي نفسه مثل قيس مع حبيبته ليلى، وهو ما وصل حبه لها ربع حب قيس حق ليلى، وأغلبه كذب بكذب؟
ليش صار الكلام في أعراض الناس سهل ويسير وينسى النمام عقاب رب العالمين؟
ليش الإشاعة صارت أسرع من النار في الحطب، رغم ان أغلبها غير صحيح ومفبرك؟
ليش صار الحسد متفشي بين وايد من الناس، وكأن الرزق ليس من عند الله وهو مقسوم؟
ليش بعض الناس ما يصلحون مسار حياتهم إلا لما تييهم ظربة عالظهر؟
ليش نقول إن الحياة صارت صعبة ومعقدة، والحقيقة إن احنا اللي امصعبينها ومعقدينها بعد؟
ليش كله انسوف الأمور وانقول هالشي بنسويه باچر، ويروح علينا الوقت، ولا انسويه حتى بعد سنة؟
ليش أغلب الأوقات لما انطلع اليهال عشان يستانسون، لازم بعد ما يرجعون من اللعب للبيت تلقاهم مو راضين ومعترضين وبالنهاية يبكون؟
ليش إذا شفنا في الشارع حادث ولو بسيط لازم السير يتعطل حتى لو كان بعيدا؟
ليش إذا خذينا إجازة من الشغل، نقضي أغلب لياليها في السهر، والنهار في النوم؟
ليش نقضي نص حياتنا بالدراسة وما نطلع حافظين حتى نص الدروس اللي خذيناها، ولا مستفيدين منها؟
ليش بعضنا يحس بالاحباط بعد أول محاولة فشل فيها في طريق النجاح؟
ليش لما اثنين يتهاوشون ويسب الأول الثاني ويقوله يا غبي، يرد الثاني عليه اش قصدك؟ يعني هل يبي منه تحليل عشان يثبتها؟!
ليش لما بعض الشباب يردون من السفر والدراسة خاصة من أميركا، يحطون لوحة سيارتهم الأميركية خلف جام السيارة عشان يقولون للناس انهم كانوا هناك؟
ليش بعض الناس إذا عندهم مشكلة مرضية مثلا في العين، لو يصادف دكتور ولادة يطلب منه تشخيص لحالته ودوا؟
ليش في الأفلام العربية، لما تطيح الزوجة على زوجها وهو خاينها في دارها، يقولها «ما تفهميش غلط»؟
ليش مسلسلاتنا الخليجية ما يضمونها لبعض ويسوونها مسلسل واحد من ألف حلقة، مع ان كل قصصها متشابهة، ونرتاح احنا من التقلب بين القنوات؟
شي ما شفتوه:
ليش صار عندنا فضول في حياة غيرنا أكثر من أول، ودايما نسأل الناس ليش وليش؟ وفي المقابل ما نبي الناس تتدخل بحياتنا وتسألنا ليش؟ انزين قولولي.. ليش؟