أميرة محمد: السفر مع أهلي أحلى

النجمة البحرينية أميرة محمد لا يوجد لديها وقت محدد للسفر خصوصا إذا كانت غير مرتبطة بأي أعمال فنية. تحبين السفر بالعطلات ولا في الأيام العادية؟ ٭ أحب السفر وايد في الإجازة خصوصا الصيف لأن في الأيام العادية غالبا أكون مشغولة بتصوير أعمالي الفنية، ودراستي الجامعية، وما آخذ راحتي في السفر، عكس إذا كنت مسافرة في إجازة لأنها تكون صچ وناسة وترفيه وتغيير. أي المواسم تحبين تأخذين اجازتچ؟ ٭ ممكن اطلع اجازة في أي وقت أشوف نفسي فاضية فيه لأني متفرغة تماما للفن. فإذا لقيت نفسي ما عندي تصوير أعمال اطلع اجازة اسبوعين أو شهر بالكثير. أكثر الدول العزبية اللي تحبين تروحينها؟ ٭ أحـــــب قطـــــر وايــــد، واكثر سفراتي تكــــون حق قطر لأن ربعي هناك وايدين، وأحب مصر وبيروت والكويت. شنو تسوين بالسفر؟ ٭ سياحة حالي حال الناس، واحب التسوق والتمشية بالأسواق والمجمعات لشراء الملابس، خصوصا المجمعات اللي في الكويت أحب الموديلات اللي فيها وايد. تحبين السفر مع أهلچ ولا مع ربعچ؟ ٭ الاثنين، احب السفر مع أهلي خصوصا أمي وخواتي. هل صارت لچ مواقف طريفة في السفر؟ ٭ طبعا صارت لي وايـــد مواقف طريفة، ففي كل سفرة أسافرها لا بد أن يحدث لي موقف، سواء مع المعجبين أو أطيح طيحة چايدة، وآخر هذي المواقف كانت في زيارتي الأخيرة للكويت عندما تأخرت في الذهاب الى المطار فطارت عني الطيارة فاضطررت للحجز مرة ثانية، وترتب على التأخير تأجيل ارتباطاتي في البحرين. أكثر الدول الأوروبية اللي تحبين السفر اليها؟ ٭ إسبانيا، فرنسا، إيطاليا، بريطانيا. أكثر شيء تحرصين تأخذينه معاچ في السفر؟ ٭ أحرص على كاميرتي الفوتوغرافية لأني أحب التصوير في معالم الدولة اللي أروح لها وأزور المناطق السياحية، المتاحف والمعارض وكل اللي يميز الدولة.