أنوارعبدالرحمن
في لحظة غير متوقعة نفد صبر أبوعدنان من تصرفات سائق سيارة الطلبات الخارجية لأحد المطاعم، الذي لا يتورع عن أخذ المال المتبقي من الحساب، فقرر أن يؤدب هذا السائق بطريقته الخاصة.
- ألو.. إذا ما ياب لي السايق الـ 100 فلس اللي باقها أبلغ عليكم المدير.. وحماية المستهلك بعد!
- بوعدنان اشفيك؟
- هالنصاب اللي وصل لي الطلب مال الوجـــبات.. المفروض يرد لي 100 فلس بس قب ونحاش.
- الله يهداك على الـ 100 فلس زعلان.
- إي.. ليش ما ازعل هذي جم مرة يسويها فيني؟! أراويهم إن ما طلعت من جبدهم هالبوق اللي عينك عينك.
- الحين تعوذ من ابليس.. واكل عشاك.. بعدين شوف السالفة شنهي.
- أنا ماحب أحد يستغفلني وينصب علي.. وتبيني آكل؟!.. أكلي أنتي وعيالج.. الحين بروح له هناك بالمطعم.. وأغسل له شراعه عدل.
- ياربي هالريال حار حار جبريت.. ياكل عمره بعمره.
- يمه وين أبوي؟ ليش ما يبي يتعشى؟
- محتر من هالسايق مال المطعم.. اللي كل ما طلب شي منه لازم ياخذ هالـ 100 فلس زياده وينحاش.. راح لهم هناك الله يستر، اش بيصير!
- يمه ليش خايفه.. أبوي ماينخاف عليه.. يخوف بلد.
بعد ثلاث ساعات:
- يا رب وين راح هالريال.. عسى ما صار فيه شي؟
- يمه.. صوت سيارة أبوي!
- افتح الباب.. ابسرعة.
- يباااا.. اشفييييك.
- تعال امسك ايدي.
- يبا.. قول.. منو سوى فيك جذيه.. اشهالخياط براسك.. وريلك ليش امجبسه ويا إيدك؟!!
- مادري.. مادري.
- يابعد قلبي يابوعدنان.. اهئ اهئ اهئ.
- يمه الله يهداج لا تبجين جدامه.. يبا قولنا اللي تتذكره الله يخليك.
- لقيت نفسي بالشارع.. وخذوني اعيال الحلال للمستشفى.. لين يابوني أنا وسيارتي لي اهنيه.
- انت كنت رايح للمطعم هذا اللي قلته لنا.. عشان تشتكي عليهم.
- هاااا؟؟!!.. ما ادري.. ما ادري.
- خنت حيلي عليك يابو عيالي اهئ اهئ اهئ.
- يمااااا بس بس.. ابروحه ابوي حالته حاله.
- عدنان حبيبي.. شيل ابوك وده لداره خاليرتاح.. الله يستر عسى ما فقد ذاكرته.. اهئ اهئ اهئ؟!
- يبااا حط ايدك على كتفي.. ساعدني.. خلني أوديك لدارك أريح لك.
- عدنان حبيبي.. دق عالاسعاف.. أبوك شكله موحاس بالدنيا خنشوف اشسالفته.. أخاف محتاج يتنوم بالمستشفى.
- خلاص بدق على أي مستشفى خاص عشان اييون ابسرعة، ألووو.. المستشفى الخاص.. نبي الاسعاف.
بعد ساعة:
- ها؟ دكتور بشر؟
- مفيش إلا الخير.. حالته كويسه.
- يعني ذاكرته زينه؟
- آه ما تخافيش.. مجرد رضوض.
- يعني إذا سولفت معاه يعرفني؟
- أكيد.. اسأليه وحيرد عليكي.
- بوعدنان.. أنا مرتك.. تبي مني شي.. تامر على شي.
- دقي عالمطعم.. قولي لهم.. ردوا الـ 100 فلس، وإلا بييهم أكسر اضلوعهم.. آآي ياراسي!!
شي ما شفتوه:
- ياوليدي.. ماكو إلا نقول لأبوك.. إن احنا اشتكينا عالمطعم والـ 100 فلس رديناها.
- أخاف بعدين يسوونها فيه مرة ثانية.. ويكتشف السالفة.
- عدناااان.. عدناااان.
- هلا يبا.
- الدكتور اللي خذا منكم فلوس أمس.. مارد لكم الـ 100 فلس؟!