أنوار عبدالرحمن
هناك ذكرى سنوية تمر على كل زوجين وهي ذكرى زواجهما، وتختلف من حيث الاهتمام والتقدير بينهما.. لكن زوجة مشعل اليوم، قررت ان تحتفل بهذه المناسبة مع زوجها رغما عن أنفه..!!
- مشعل.. اشوفك اليوم ساكت.. كأنك ماتدري.. أو اتسوي نفسك ناسي.
- عن شنو تقصدين؟
- ماتدري ان اليوم مر علينا 18 سنه، من عمر زواجنا.
- صج؟!.. الله يا الدنيا، مرت هالسنين كلها من عمري،حسافة شبابي اللي راح!
- بدال ماتحمد ربك انك خذيت وحدة مثلي واقفة معاك بالزينة والشينة ومو مقصرة معاك ابشي وفوق هذا كل ما أكبر أصير أحلى وأحلى.
- هههه ضحكتيني.. ترى حفظت هالاسطوانة، خصوصا انچ كل ماتكبرين تصيرين احلى واحلى.
- قول اللي تقوله مايهمني.. بس واضح انك تتهرب ماتبي تحتفل معاي ابهالمناسبة.. لكن غصبا عليك اليوم اتطلعني واتعشيني وتشتري لي هدية.
- اوف.. عمري ماشفت واحد يحتفل غصبا عليه.. وانا يعني شنو بطلع من ورى هالاحتفال.. اللي ماوراه الا الفلس؟!
- اممم انت لك مفاجأة خاصة لما نرجع.
- وشنو هالمفاجأة الخاصة اللي بتفاجئيني فيها.. اكيد فيها بعد صرف افلوس.
- المفاجأة لازم تظل مفاجأة.. يعني اشلون بعد تبيني افهمك؟
- ها؟!.. حبيبتي اشرايچ انخلي سالفة العشا والهدية بعدين.. وانخليها على المفاجأة مالتچ وبس؟
- شنو؟!.. حامض على بوزك!
في المطعم:
- يالله اكلي كل هاللي طلبتيه
- وانت اشفيك قاعد تقرم ابهالخبزة اللي جدامك، ليش ما تاكل من هالأطباق اللي اشكثرها؟
- انسدت نفسي بعد ما شريت هالساعة الغالية اللي راح معاها كل معاشي.
- يعني متحسف؟.. قولها اشكره.
- آآخ متحسف على أشياء وايد.. احس اني مثل اللي ممسوك بسلسلة في ارقبتي، موقادر أهج منچ.
- احسن.. عشان ماتفكر تاخذ وحدة غيري.
- يعني تعترفين ان خطتچ بتفلسيني عشان ما فكر اتزوج عليچ.
- إي اعترف.. واش عندك من كلام زايد؟
- انزين.. انزين.. اكلي واطفحي.
- اكل وياي.. شنو؟.. يعني آنا باكل بروحي هالأكل كله؟
- آنا لما أشوفچ تاكلين تطفح جبدي.. وأشبع، خلصيني واكلي بسرعة ترى اليهال ابروحهم في البيت مساكين.
- من طلعنا وانت كل ساع يايب سيرة اليهال وليش خليناهم، يعني انت الحين كل يوم تطلع من البيت وماترد إلا والكل نايم.. وماتسأل عن أي احد فينا.. واليوم كل دقيقة تدق على اليهال تبي اتسمعني انهم ناطرينا نرجع.
- يـــعني ماتبــــيني أسأل عنــهم.
- آنا ادري شنو قصدك.. انت تبي ترجعني البيت عشان تروح لربعك.. بس حالفة ماهدك اليوم.. نحتفل حالنا حال هاللي يحتفلون ابهالمناسبة كل سنة.. وإلا يعني حتى هالسالفة مستكثرها علي؟
- خلاص.. خلاص.. ترى يتني النومة من لوية السوق مساع وهالعشا اللي من شفته انغثيت.. خلصيني يابنت الحلال اكلي.. خلينا نرد البيت.
- مالت.. هذا يعني اليوم طالعة معاك عشان استانس.. قلبتها تحلطم؟!
- ها؟.. ما اسمع!!
شي ماشفتوه:
في البيت:
- مشعل.. مشعل ممكن اتسكر التلفزيون اللي عندك بالصالة وتيي عندي بالدار.. ترى المفاجأة جاهزة.
- خخخخ
- مشعل.. مشعل.. اشفيك ماترد؟!
- خخخخ
- أبيييه.. ناااام... آآخ يالحظ!