أنوارعبدالرحمن
زوج (منى) اليوم، قدر لها وقفتها معه في مرضه، وهو واجبها الذي تؤديه بطيب عن نفس، ولكن ماذا لو؟.. تابعوا معي تلك الحوارات.. وستعرف ايها القارئ ما المقصود من.. ماذا لو..؟
- ألو.. مريوم لا تلوميني.. هاليومين امجابله بو االعيال، حايشته افلونزا، ومو قادر يشيل نفسه، وقالب راسي مثل الياهل، كل ساع فاك حلجه، ويتشكى، ويتطلب، حتى نومي مو مثل الناس، طول الليل احط له هالكمادات الباردة، واشيك على حرارته، واعطيه دواه، وانقعه ابهالفكس اللي يشق الخشم من ريحته الخايسة.. حتى اليهال مادري عنهم من كثر لويتي معاه.
- منى.. منى.. منوووه.
- مريوم ترى زوجي قاعد يناديني، اكلمچ وقت ثاني.. مع السلامة.
- منووووووه.
- كاني يايه.. هلا حبيبي تبي شي؟
- تعالي قيسي حرارتي.. وعطيني المضاد، واعصري لي ليمونة مع قشرها، وسوي لي شوربة خفيفة، ودهنيني بالفكس مرة ثانية آآتسووو.
- بس چذيه؟
- اي بس.. ولا اتروحين عني.. ترى جسمي متكسر، دلكيني عدل.
- وبعد.
- وبعد.. ممم بعدين اقولچ آآتسووو.
- انت تامر.. من لي غيرك ابهالبيت ألبي طلباته.
بعد ساعة
- منوووه.
- هلا.. آمرني.
- تعالي حطي لي كمادات احس بحرارة بجسمي آآتسووو.
- حرارتك زينه.. توني قايستها لك من عشر دقايق.
- آنا اللي احس بالسخونة مو انتي.. تعالي سوي اللي قلت لچ عليه.
- ان شاء الله (يارب متى تشفيه وتفكني من حنته هاللي قالب فيها راسي من طاح مريض، وينجلع عن ويهي، ويذلف عند ربعه.. صچ توني اعرف قيمة الديوانية، عالأقل ترتاح المرة من قرقة ريلها).
- انتي اتكلمين نفسچ؟
- لأ.. قاعدة ادعي لك ان ربي يشافيك.. وترد لك صحتك، واشوف ضحكتك اللي فقدها البيت من يوم استمرضت.
- اي عبالي.
بعد ساعة
- منوووه.
- نعم.. كاني عند راسك.. ليش اتصرخ؟ ما شفتني؟
- لأ.. يمكن لأني غطيت لي اشوي، حسبالي رحتي مكان ثاني.
- لا تطمن.. وين اروح عنك.. انا اصلا فضيت نفسي لك انت بس.
- اي.. هذي المرة السنعة.. حتى لما زوجها ينام.. ما تنام عشانه.
- عاد يبين فيكم انتو يالرياييل؟
- اي ليش ما يبين.. كاني ما طلعت لي اسبوع من البيت امجابلچ.
- قول عشان آنا مريض جابلتج.. وإلا مو عشاني.
- لا.. أفا.. اشدعوة.. انتي راس المال من غيرچ مانسوى شي آآآتسووو.
- هااك دواك.. والشوربة جاهزة.. والعصير مثل ما تبي.. والفكس جاهز.. والكمادات الباردة امزهبتها لك والـ...
بعد ثلاثة أيام
- منوووووه.
- كاني بالدار.
- تعالي اخذي اعراض الجمعية اللي طلبتيهم مني.
- عطهم الخدامة.. انا ما اقدر اتحرك.
- اشفيچ.
- اش فيني بعد؟.. كالعادة عاديتني.
- أفا..
- هذي آنا.. اطبب اللي في البيت كله وآنا اللي اطيح بعدكم.
- انزين.. امممم انا طالع تبــــين شي؟
- عطني بندولة تكفى راسي بينفجر من العوار.
- هاا؟.. اممم بنادي بنتچ تعطيچ اللي تبينه.
- وانت اشفيك ما تعطيني؟
- لا يبا.. لا يحوشك.. مابي اقرب عندچ لا تعاديني.
شي ما شفتوه- ألو.. منى اشلونچ الحين؟
- بعد اشلوني؟ تعبانة وايد.. والا اتسوي نفسك ما تدري؟
- ممم ما تشوفين شر.. اقول.. ترى الليلة بنام عند امي داقة علي تبيني ابسالفة خاصة اشوي.