أنوارعبدالرحمن
براك شاب غيور على أخته، ويحاول الحفاظ عليها بطريقة خاطئة، ولكن كيف كانت تتصرف معه أمام استجواباته التي لا تنتهي؟.. وماذا حدث بعد ذلك؟! بين براك وأخته هنوف:
- هنوف
- نعم
- من وين يايه؟
- توني امخلصه محاضراتي.. اشعندك بعد؟
- هالأيام أشوفچ قمتي تتأخرين، شالسالفه؟
- ترى مليت من قرقتك، وأسئلتك اللي تنرفز، ماتدري اني كل يوم أرجع بنفس هالساعة؟ ولا اتسوي نفسك ماتشوف.
- اللي أشوفه، ان أختي متغيرة، زادت كشختها، وكثرت طلعاتها، ومكالماتها!
- آنا فاهمة اش قصدك، شك فيني على كيفك، آخرتك بتتعب وتندم عاللي قاعد اتقوله حق أختك، وما قول إلا (كلن يشوف الناس بعين طبعه)!
- اش تقصدين ؟
- أقصد يعني انت اللي قاعد اتسويه، حسبالك آنا مثلك أسويه، وبعدين تعال هاللي طايح اتغزل فيهم مو بنات ناس؟ وإلا ميخالف وحلال عليك وعليهم؟
- شوفي عاد، لا تقعدين اتقارنين بيني وبينچ، آنا غير، آنا ريال، شايل عيبي، أما أنتي أقص ارقبتچ إذا طحت عليچ افيوم بعلاقة بواحد، وربي ما تلومين إلا نفسچ .
- مسكين.. عيش بالوهم محد بيتعب غيرك.
بين هنوف وصديقتها دلال:
- دلول.. تكفين شسوي مع هالأخو اللي املوع چبدي بكلامه اللي يسم البدن؟
- مالچ شغل فيه، سحبي عليه، طاف حده طاف.
- اتصدقين أمس بالليل عقب مارد من لهياته مالته، ياني بداري، يقول لي اش عندچ هالأيام طايحتلي تسمعين أم كلثوم آخر الليل ؟
- هههه اش قلتي له؟
- قلت له ربي يكملك بعقلك، شايف هاللي اتكلمهم طايحات الحظ ومن كل متردية ونطيحة، وحسبالك أختك مثلهم، لا.. مو آنا اللي تمشي بهالسوالف البطاليه، آنا بنت أبوي اللي رباني عالأخلاق والأدب، أصحى على نفسك يا شاطر.
- صچ انچ قوية!.. واش قالچ ؟
- قالي آنا احساسي ما يخيب، وبتشوفين شسوي فيچ لو ألقاچ في يوم فكرتي بس مجرد تفكير، اتكلمين واحد .
- ابييه.. اش سويتي بعدين؟
- عطيته نقالي وقلت له فتشه على كيفك، وقلت له تبي تراقبني هم ما يهمني لأني وحدة ماشية سيدة مو مثلك، چان أطرده من داري، صچ نرفزني وخلاني طول الليل أبچي.
- وي.. أخوچ براك هذا يخرع، أشوه ان أخوي مشاري مو مثله!
- من صچچ؟ اش ياب الياب؟!
- مممم هنوف عندي لچ فكره!
- شنهي؟
- طريقة لو اتسوينها راح اتخلين فيها أخوچ براك أحسن مايكون معاچ، مثل ما اخوي مشاري يتقلقس عندي تقلقس، ويصير مثل العسل، بس لا تقولين لأ.. وآنا أضبطچ.
- صچ.. قوليها تكفين، وما راح أقول لأ .
بين هنوف وأخوها براك:
- براك .
- اش تبين؟
- بقولك شي اموصيني عليه ناس، بس الصراحه اللي قاعد اتسويه فيني ما يخليني أقوله لك، لأنك ما تستاهل.
- شنو؟.. استحي على ويهچ على هالكلام، قولي بسرعه، لا اتخليني أطلّع الكلام منچ غصب .
- صديقتي دلال أمس فاجأتني يوم قالت لي انها هالأيام موقادرة تصبر عالسر اللي ابقلبها، امممم تقول انها اتحبك!
- هااا؟!.. من صچها ؟!
- إي.. وتموت عليك، ومحترق قلبها فيك، وكانت ساكتة كل هالمدة لأنها حاسة انك تحب وحدة وماتبي تخرب بينكم و..
- من قالها اني أحب وحدة؟.. هاا؟
- آنا.. لأني أشوفك مشغول مع هالأشكال اللي معاك ومابي أقول لها ان أخوي لوتي وچذاب!.. فقلت لها انك اتحب وحدة وعالأقل هذا أشرف لك!
- امممم قولي لها انچ كنتي تتغشمرين معاها، انزين ما قالت لچ انها تبي اتكلمني ؟
- امبلا.. بس كنت باخذ رايك قبل!
- دقي عليها ابسرعه.. ناطرها على ناااار!
شي ما شفتوه :
- ههههه صچ انچ مو هينه، (هالأيام) صار أخوي براك معاي أحسن من العسل.
- مو قلت لچ.. اني بضبطه لچ!
- انزين.. خلينا نرد لسالفتنا، قولي لخوچ مشاري، ترى زعلانه عليه حدي عشان چذيه مو قاعده أرد عليه، إي.. اتصدقين أمس نام، وما فكر يتصل علي ويقول لي تصبحين على خير مثل كل مره!
- هههه عن الدلع عاد، ردي عليه، يعني يهون عليچ تسوين چذيه معاه، بعد حب (هالسنين)؟!