أنوارعبدالرحمن
بعض الأسر عندما تهرب منهم الخادمة، يصبح الوضع في البيت مأساة بسبب عدم تعود أفراد المنزل على تحمل مسؤولية التنظيف وإعداد الطعام وغيرها، فنجد أن ربة الأسرة تعمل جاهدة لتدليل خادمتها، والحفاظ عليها، حتى لا تلحق بركب الهاربات..
بين الأم وأبنائها:
- سمعوني كلكم، ولا أبي واحد فيكم يقاطعني، اعتقد شفتوني وانا داشة الحين ومعاي هالخدامة اليديدة، اللي يايبتها مسترجعة من المكتب، ويوم لقيتها عقب مادرت ألف مكتب، وطلعوها لي قلت لهم اللي تامر فيه بعطيها بس خل تشتغل عندي.
- يعني يمه انتي لهالدرجة محتاجتها.
- أي طبعا، وإلا ما شفتوا حالنا يوم انحاشت خدامتنا ذيك، واللي قبلها بعد، واللي يبتهم قصوا تذكرة من معاشاتهم وهجوا بسبتكم.
- يما.. انتي تعطينهم ويه وايد وامدللتهم.
- صكوا احلوجكم كلكم، محد نحش الخدم من هالبيت غيركم، كان عندي ثنتين وكلهم انحاشوا بنفس الوقت من أذيتكم، انتوا من يستحملكم قولولي؟ ها؟.. لو وحدة منهم تطلب مني معاش 100 دينار بقول تستاهل من اللي تشوفه.
- يما الصراحة الخدم يبيلهم عين حمرا.
- شوفوا عاد آنا حالفة لو واحد منكم يؤذيها بطرده من البيت، كفاية ولا واحد منكم ساعدني يوم انحاشت ذيك الغبرة، ولا فيكم احد حس ودخل معاي المطبخ، ولا حتى كسرت خاطره وقالي يا يمه خنساعدج بشي، عشان جذيه هذي اللي يبتها بتمسك فيها بضروسي ولا راح أخلي واحد فيكم يتعدى حدوده ويمد لسانه عليها، أو يقعد يتشرط ويآمر عليها.
- يمه، انتي لو كنتي تعطينا فلوس عشان انساعدج مثل ما تعطين الخدامة، جان شفتينا اشلون انخليج ماتحتاجينها كلش.
- أيا جليلين الحيا، بعد بتاخذون فلوس على مساعدتكم لأمكم، صج ماتستحون على هالكلام، الله يستر باجر إذا كبرت اشلون بتشيلوني؟ أتوقع بتقطوني بدار العجزة إذا كان هذا ردكم.
- يمه.. احنا ما نقصد.
- تدرون اشلون؟ الظاهر الإيد مغسوله منكم، وماراح ينفعني إلا هالخدم، واللي يطلب منها لو قلاص ماي لحش ريله حش.
- جذيه يعني؟.. اطلعت الخدامة اعز من اعيالج؟
- يكون بعلمكم يوم دخلت المكتب بغيت أحب راسها بس عشان ترضى اتيي معاي، واشرطت اشروط اشكثرها وقلت لها ميخالف، وأول شرط انها ما تبي تشتغل في بيت فيه يهال، وساحلتها وقلت له اعيالي اكبار، وكل واحد معتمد على نفسه وما عندي بيبي صغير، وغصب رضت ويت معاي.
- يعني شنو؟ ما راح اتنظف دورنا واتغسل اهدومنا و...
- قلت لكم آنا حالفة اللي يؤذيها ويطفشها من البيت راح اتصرف معاكم تصرف عمركم ما شفتوه.
- يعني شي ما شفتوه ههههه!
- أي أضحك انت يا كبيرهم يا هبيلهم، وخنشوفك بس اتيننها بطلباتك اللي ما اتخلص يالربادي.
بعد ساعة بين الأم والخادمة:
- تعالي اهنيه، انتي شنو قلتي لي اسمج بالمكتب؟
- آنا نيم.. كنتريباتس سنتيكماو.
- شنو هذا؟ هذا اسمج وإلا عنوان بيتكم؟
- هذا نيم مال آنا.
- واشلون بناديج اسمج صعب؟ عطيني اسم لج سهل عشان اناديج فيه.
- بيت مال آنا أول ماما ينادي مونيكا.
- أي زين، مونيكا سهل.
- ماما، آنا يبي سوي تيلفون عشان برذر مال آنا، لازم يبي يعلم آنا في بيت منيه.
- يعني أكيد برذر موشي ثاني؟ مو انتوا كل واحد عندكم برذر وسستر، وبعدين تطلع السالفه اخرطي.
- لا ماما.. هذا اكيد برذر مال آنا، وبعدين لازم يعطي ماما آنا موبايل عشان سوي تيلفون آنا جوج ويا ولد.
- ويعه، حتى هذولي تعلموا عالموبايلات، تدقق تيلفونات، وتدزز مسجات، خلاص اشتري لج واحد باجر.
- ماما، انتي يقول في خدامة ثاني يبي يجي صح؟ آنا مايقدر بروحي بيت شغل.
- إي قلت لج، آنا طالبة ثانية، تحملي شوي على ما توصل.
بعد أربع أيام:
- يمه، ترى خدامتج هذي اتعاند، اطلب منها تغسل اهدومي، اتسوي نفسها ما تسمع.
- وآنا صار لي يومين أسألها عن بنطروني الجنز، ماترد علي.
- وآنا مختفية ساعتي الفضية، لما أقولها وينها اتحقرني اهئ اهئ.
- مو قلت لكم مالكم شغل فيها، وكل واحد يحط باله على أغراضه.
- يعني شنو؟.. مو اهيه المسؤولة عن التنظيف؟
- شوفوا عاد، لا اتهججونها علي مثل اللي قبلها، آنا ما صدقت أفتك من الكراف ابهالبيت، مو مستعدة أرد على الأذية، كل واحد فيكم يسوي شغله، ويدور أغراضه، ويحافظ على داره، وهذا آخر انذار لكم، سامعين?
بعد يومين:
- مونيكا، وين لابجيني الأزرق؟
- آنا مايدري، روه انته دور.
- مونيكا، داري ترى يبيلها تنظيف صار لج ثلاثة أيام ما نظفتيها.
- سوي انتي نظف، آنا فيه شغل واجد.
- مونيكا، اكوي تي شيرتي.
- انتي سوي كوي، آنا إيد عوّر.
- مونيكا...
- شنو كله بيت قول مونيكا، مونيكا، رووه بره.
بعد يومين:
- انتو اشقاعدين اتسوون؟
- قاعدين انظف البيت، مونيكا ماتبي تشتغل اتقول تبي خدامة ثانية اتساعدها.
- آنا قلت لها، بعد اسبوع راح توصل الثانية، أووف، واهي الحين وينها؟
- قاعده اتسوي بودي كير ومني كير.
- شنووو؟
شي ماشفتوه:
- يا علج ما تربحين يا مونيكا، كل شي سويته لج، آخرتج اتسوين نفسج مريضة، وتندعسين بهالدار، وأطيح عليج مع هالزفت البرذر مالج صج مالكم صاحب، ولا لكم أمان، آآآه ياراسي.